18:30
نەمىس ۆاكتسيناسى كلينيكالىق سىناقتان وتۋگە دايىن
گەرمانيانىڭ فەدەرالدىق ۆاكتسينالار ينستيتۋتى COVID-19 ۆيرۋسىنىڭ ۆاكتسيناسىن كلينيكالىق سىناقتان وتكىزۋگە رۇقسات بەرىلگەنىن مالىمدەدى.
زەرتتەۋ بارىسىندا 18-دەن 55 جاسقا دەيىنگى 200 ساۋ قاتىسۋشى نەمىس BioNTech بيوتەحنولوگيالىق كومپانياسى ازىرلەگەن ۆاكتسينانىڭ بىرنەشە نۇسقاسىن الادى. ال عالىمدار ەكپەلەردىڭ ۆيرۋسقا قارسى يممۋنيتەت قالىپتاستىرۋدا تيىمدىلىگىن زەرتتەيدى.
قازىر الەمدە 86 توپ COVID-19 ۆاكتسيناسىن ازىرلەپ جاتىر. وسىعان دەيىن ۇلىبريتانيا, قىتاي جانە اقش ۆاكتسينالارى كلينيكالىق سىناققا كىرىسكەن.
15:35
اۆستراليا شەكاراسى تاعى ءتورت ايعا حالىقارالىق ساپارلار ءۇشىن جابىق بولادى
شەت ەلدەن قايتىپ كەلگەن وسى ەلدىڭ ازاماتتارىنا عانا كىرۋگە رۇقسات ەتىلەدى.
«حالىقارالىق احۋالعا قاراساق, قازىرگى ۋاقىتتا شەكاراداعى كەز كەلگەن شەكتەۋ شارالارىن باسەڭدەتۋ ۇلكەن قاۋىپ تۋدىرۋى مۇمكىن. مەن قاۋىپسىزدىك جونىندەگى ۇلتتىق كوميتەتكە اۆستراليالىقتاردىڭ ەلدەن شىعۋىنا سالىنعان قاتاڭ تىيىم مەرزىمىن ۇزارتۋدى جانە ەل اۋماعىنا شەتەلدەن ورالعان ازاماتتارىمىزعا عانا كىرۋگە رۇقسات بەرۋدى ۇسىندىم» دەپ حابارلادى وسى ەلدىڭ باس سانيتارلىق دارىگەرى برەندان مەرفي.
اۆستراليادا بارلىعى 6 659 ادام COVID-19 جۇقتىرعان. ەپيدەميا باستالعالى بارلىعى 4 671 ادام ساۋىعىپ, 75 ناۋقاس قايتىس بولعان.
وتكەن تاۋلىكتە اۆستراليادا تاعى 12 ادامنىڭ ۆيرۋس جۇقتىرعانى انىقتالدى, بۇل 9 ناۋرىزدان باستاپ بەلگىلەنگەن ەڭ تومەنگى كورسەتكىش بولدى.
11:25
ۋكراينا كارانتيندى 11 مامىرعا دەيىن ۇزارتتى
ۋكراينانىڭ مينيسترلەر كابينەتى ەلدەگى كارانتين رەجيمىن 11 مامىرعا دەيىن ۇزارتۋ تۋرالى شەشىم قابىلدادى.
ەلدىڭ ۇلتتىق عىلىم اكادەمياسىنىڭ ەسەبى بويىنشا ۆيرۋس جۇقتىرعانداردىڭ ەڭ كوپ سانى 3-8 مامىر ارالىعىندا تىركەلەتىن كورىنەدى.
دەگەنمەن كارانتين جاعدايىندا كەيبىر مەكەمەلەردىڭ جۇمىسىن جالعاستىرۋىنا رۇقسات بەرىلەدى.
ۋكراينانىڭ پرەمەر-ءمينيسترى دەنيس شمىگال 11 مامىرعا دەيىن تەست سانىن كوبەيتىپ, اۋرۋحانالاردى تولىق جابدىقتاۋ كەرەك ەكەنىن ايتتى. ودان بولەك ول جاعداي تۇراقتاسا ساياباقتار, سكۆەرلەر مەن كەيبىر ساۋدا ورىندارىن قايتا اشۋدى قاراستىرۋعا بولاتىنىن جەتكىزدى.
10:47
قىتايدا ناۋقاستاردىڭ 93%-دان استامى ايىققان
قازىرگى ۋاقىتتا بۇل ەلدە سىرتتان كەلگەن جانە جەرگىلىكتى جەردە كوروناۆيرۋس ينفەكتسياسىن جۇقتىرعانداردىڭ سانى كۇن سايىن ازايىپ كەلەدى. سوڭعى مالىمەتتەرگە سايكەس, قىتايدا بارلىعى 82 798 ادام كوروناۆيرۋس جۇقتىرعان, ونىڭ 77 207-ءسى ەمدەلىپ اۋرۋحانادان شىعارىلعان, بۇل - سىرقاتتانعانداردىڭ جالپى سانىنىڭ 93,2%-ى. اۋرۋحانالاردا شامامەن 1 مىڭ ەمدەلۋشى قالعان.
قحر دەنساۋلىق ساقتاۋ ماسەلەلەرى جونىندەگى مەملەكەتتىك كوميتەتىنىڭ مالىمەتتەرى بويىنشا, كوروناۆيرۋس ينفەكتسياسىن جۇقتىرعانداردىڭ 93,2%-ى ساۋىعىپ, 5,59%-ى قايتىس بولعان.
10:03
كوروناۆيرۋس ينسۋلت پەن ەپيلەپسيا تۋدىرۋى مۇمكىن
نەمىس عالىمى, نيۋرنبەرگ كلينيكاسىنداعى نەۆرولوگيالىق ورتالىقتىڭ مەڭگەرۋشىسى فرانك ەربگۋت COVID-19-دىڭ سالدارىنان تۋىندايتىن نەۆرولوگيالىق اۋرۋلاردى اتاپ ءوتتى. پروفەسسور اۋىر حالدە جاتقان ناۋقاستاردا اۋرۋدىڭ اسقىنۋ بەلگىلەرى رەتىندە ينسۋلت, مي قابىعىنىڭ قابىنۋى, باس اينالۋى جانە ءتىپتى ەپيلەپسيا پايدا بولۋى مۇمكىن ەكەنىن ايتادى. ۆيرۋس اعزانىڭ ءوز جۇيكە جاسۋشالارىنا كەرى شابۋىلدايتىن وزدىگىنەن جويعىش اۋتويممۋندىق پروتسەستى ىسكە قوسادى.
فرانك ەربگۋت نەۆرولوگيالىق اسقىنۋلار قىتايدىڭ ۋحان قالاسىنداعى ەمدەلۋشىلەردىڭ 36,4 پايىزىندا بايقالعانىن اتاپ ءوتتى. دەگەنمەن مامان مۇنداي اسقىنۋ بەلگىلەرى كوپشىلىكتە بايقالمايتىنىن ەسكەرتتى. بۇل بەلگىلەردى ۆيرۋستىڭ سيمپتومى دەپ ساناماي, اسقىنعان جاعداي دەپ قاراعان ءجون.
دۇنيەجۇزىندە 2 627 630 ادام كوروناۆيرۋس جۇقتىردى.
183 336 ادام قايتىس بولدى.
711 144 ناۋقاس قۇلان-تازا ايىقتى.
اقش-تا 841 556 جاعداي تىركەلدى, 78 474 ادام ساۋىعىپ شىقتى, 46 769 ادام قايتىس بولدى.
يسپانيادا 208 389 جاعداي تىركەلدى, 85 915 ادام ساۋىعىپ شىقتى, 21 717 ادام قايتىس بولدى.
يتاليادا 187 327 جاعداي تىركەلدى, 54 543 ادام ساۋىعىپ شىقتى, 25 085 ادام قايتىس بولدى.
فرانتسيادا 157 135 جاعداي تىركەلدى, 41 331 ادام ساۋىعىپ شىقتى, 21 373 ادام قايتىس بولدى.
گەرمانيادا 150 648 جاعداي تىركەلدى, 99 400 ادام ساۋىعىپ شىقتى, 5 315 ادام قايتىس بولدى.
