اۋداندىق سوتتا «TrueConf» ءموبيلدى بايلانىس جۇيەسىن قولدانۋ ارقىلى قر اقبتك-ءنىڭ 476 جانە 608 باپتارىندا كوزدەلگەن قۇقىق بۇزۋشىلىقتاردى جاساعان ازاماتتارعا قاتىستى اكىمشىلىك ىستەر قارالدى.
سوت وتىرىسىندا انىقتالعانداي اۋدان تۇرعىنى توتەنشە جاعدايعا بايلانىستى كولىك قۇرالدارىنىڭ جۇرۋىنە قويىلعان شەكتەۋلەرگە قاراماي, ايتەكە بي كوشەسىنىڭ بويىندا اۆتوكولىگىن ماساڭ كۇيدە باسقارىپ, جول ەرەجەسىن بۇزعان. وسىلايشا قارسى باعىتتاعى كولىككە سوعىپ, جول جيەگىندە تۇرعان تەمىر شارباقتار مەن كونتەينەرلى دۇڭگىرشەككە زاقىم كەلتىرگەن.
كارانتين تالابىن ساقتاماعان, جابىرلەنۋشىلەردىڭ م ۇلىكتەرىن ءبۇلدىرىپ, ماتەريالدىق زالال كەلتىرگەن ول قر اقبتك-ءنىڭ 476-بابى 9-تارماقشاسىمەن جانە 608-بابى 3-بولىگىمەن كىنالى دەپ تانىلىپ, 30 تاۋلىككە اكىمشىلىك قاماققا الىنىپ, جەتى جىل مەرزىمگە كولىك قۇرالىن باسقارۋ قۇقىعىنان ايىرىلدى.
كولىك رۋلىنە ءىشىپ الىپ وتىرعان تاعى ءبىر تۇرعىن قر اقبتك-ءنىڭ 608-بابى 1-بولىگىمەن جانە 476-بابى 9-تارماقشاسىمەن كىنالى دەپ تانىلىپ, تۇپكىلىكتى 18 تاۋلىك اكىمشىلىك قاماققا الىندى. سوت شەشىمىمەن ول دا جەتى جىلعا دەيىن كولىك قۇرالىن باسقارا المايدى.
سونىمەن قاتار, كولىك قۇرالىن باسقارۋ قۇقىعى جوق بولسا دا, ىشىمدىكتەن جۇتىپ الىپ, كوشەدە ىزعىتىپ جۇرگەن تاعى ءبىر ازامات قر اقبتك-ءنىڭ 608-بابى 6-بولىگىمەن جانە 476-بابى 9-تارماقشاسىمەن كىنالى دەپ تانىلىپ, تۇپكىلىكتى 23 تاۋلىك اكىمشىلىك قاماققا الىندى.
