جيىن بارىسىندا ول ءدارى-دارمەكتەردى ەلىمىزدىڭ مەديتسينالىق ۇيىمدارىنا جەتكىزۋ جوسپارلى تۇردە جۇزەگە اسىرىلىپ جاتقانىن اتاپ ءوتتى.
«2020 جىلعا ارنالعان بىرىڭعاي ديستريبيۋتورلاردىڭ تىزىمىنە 259 ملرد تەڭگە سوماسىنا 1385 ءدارى-دارمەك پەن مەديتسينالىق ماقساتتاعى بۇيىم الۋعا شارت جاسالدى. ەپيدەميالىق جاعدايدى ەسكەرە وتىرىپ, بىرىڭعاي ديستريبيۋتور رەسپۋبليكانىڭ مەديتسينالىق ۇيىمدارىن ءدارى-دارمەكتەرمەن جانە مەديتسينالىق ماقساتتاعى بۇيىمدارمەن ۇزدىكسىز قامتاماسىز ەتۋ ءۇشىن شارالار قابىلداعانىن اتاپ وتكىم كەلەدى. 86 ملرد تەڭگەنىڭ ءدارى-دارمەكتەرى رەسپۋبليكا بويىنشا مەديتسينالىق ۇيىمدارعا جونەلتىلدى. سونىڭ ىشىندە ءدارى-دارمەكتەردى امبۋلاتوريالىق نەگىزدە قابىلداعان پاتسيەنتتەرگە 47 ملرد تەڭگەگە ءدارى-دارمەك جەتكىزىلدى. سونىمەن قاتار 27 ملرد تەڭگە مولشەرىندە ءدارى-دارمەك تەگىن بەرىلدى. رەسپۋبليكاداعى اۋرۋحانالارعا 39 ملرد تەڭگەگە ءدارى-دارمەكتەر مەن مەديتسينالىق ماقساتتاعى بۇيىمدار جىبەرىلدى. بۇل اۋرۋحانادا ەمدەلەتىن پاتسيەنتتەردى ۇزدىكسىز قامتاماسىز ەتۋ ءۇشىن جەتكىلىكتى بولۋى كەرەك. قازىرگى ۋاقىتتا مەديتسينالىق ۇيىمداردا كوروناۆيرۋس ينفەكتسياسىن جۇقتىرعان 10 مىڭنان استام ىقتيمال ناۋقاستى ەمدەۋگە جەتكىلىكتى ءدارى-دارمەك بار», دەدى ب.ءشارىپ.
سونىمەن قاتار ول, ەلىمىزگە اقش, قىتاي, وڭتۇستىك كورەيا, جاپونيا, تۇركيا جانە ءباا-دەن گۋمانيتارلىق كومەك كورسەتىلگەنىن جانە قازاقستاننىڭ ءىرى كومپانيالارى COVID-19 ەپيدەمياسى جاعدايىندا وتانداستارىنا بارلىق مۇمكىن كومەكتى كورسەتىپ جاتقاندارىن جەتكىزدى.
«ايتا كەتەتىن تاعى ءبىر جايت, بۇگىنگى تاڭدا بۇقارالىق اقپارات قۇرالدارىندا, الەۋمەتتىك جەلىلەردە «ەۋتيروكس» پرەپاراتىنىڭ جەتىسپەۋشىلىگىنە قاتىستى ماسەلە كوتەرىلۋدە. سوعان تۇسىنىك بەرگىم كەلەدى. «ەۋتيروكس» پرەپاراتى مىندەتتى الەۋمەتتىك مەديتسينالىق ساقتاندىرۋ جۇيەسىندەگى ءدارى-دارمەكتەر مەن مەديتسينالىق ماقساتتاعى بۇيىمداردىڭ تىزىمىنە ەنگىزىلگەن. پرەپاراتتى گيپوتيرەوز, گيپوپاراتيرەوز دياگنوزىمەن تىركەلگەن بارلىق ناۋقاس قابىلداي الادى. پرەپارات التى دوزادا بىرىڭعاي ديستريبيۋتوردان ساتىپ الىناتىن ءدارى-دارمەكتەر تىزىمىنە ەنگىزىلگەن. جەتكىزۋ كەستەسىنە سايكەس وسى ۋاقىتقا دەيىن جوسپارلانعان بارلىق ءونىم بىرىڭعاي ديستريبيۋتوردىڭ قويمالارىنا كەلىپ, مەديتسينالىق ۇيىمدارعا ولاردىڭ سۇرانىسى بويىنشا جەتكىزىلدى. وسى «ەۋتيروكس» ءدارىسى نەگىزىندە ءبىز 158 ملن تەڭگەگە شارت جاساستىق. 68 ملن تەڭگەگە بۇل ءدارى-دارمەك بارلىق مەديتسينالىق مەكەمەلەرگە جەتكىزىلدى. سوندىقتان ول جەتكىلىكتى», دەدى باسقارما توراعاسى.
