بىراق بەلبەۋدى بوساتىپ, ارقانى كەڭگە سالۋعا بولمايتىنىن جەرگىلىكتى بيلىك تە, دارىگەرلەر دە اۋىزدارىنان تاستاماي ايتۋدا. ەندى شە, جان-جاعىمىزدا ىندەت انتالاپ تۇرسا, ودان قۇتىلدىق دەپ ايتا الامىز با؟ بىراق ءوزىن عانا ويلايتىن كوپتەگەن ادامدار ءوزى مەن جاقىندارىنا جەتپەگەنىنە ءماز بولىپ, ىندەتتىڭ اۋىلى الىستادى دەپ ويلاپ, اۋىزدارىنا كەلگەن ساندىراقتارىن سوعۋدا. سونىڭ ىشىندە كارانتيننىڭ وزگەرتىلمەگەنى بيلىككە ءتيىمدى دەپ سوعاتىندار دا شىعىپتى. نەگە ەكەنىن ايتا الماسا دا ايتەۋىر اۋىزداعىسىن ساندىراقتايدى. كەرىسىنشە, كارانتين الدىمەن بيلىككە, مەملەكەتكە ءتيىمسىز ەكەندىگىنە, ەكونوميكاعا اجەپتاۋىر سوققى كەلتىرەتىنىنە وندايلار وي جۇگىرتپەيدى.
قالاداعى حابارى مول ادامداردىڭ اراسىنان دا وسىندايلار شىعىپ جاتقاندا اۋىل تۇرعىندارى اراسىنان قاۋىپتى سەزىنبەيتىندەر كوپ. مىسالى, شال اقىن اۋدانىنىڭ ورتالىعىنداعى ىندەت جۇقتىرعان دەگەن كۇدىگى بار ادام اۋرۋحاناعا جاتقىزىلعان ەكەن, 1962 جىلى تۋعان سول جىگىت اۋرۋحانادان قاشىپ شىعىپ, ەكىنشى كۇنى زورعا ۇستالعان. ەگەر بويىندا ىندەت بار بولسا, ونىڭ قانشاما ادامعا جۇقتىرعانى بەلگىسىز.
ءۇي جايىنداعى كارانتيندى ۇستاۋعا مىندەتتەلگەن تاعى ءبىر وسى اۋداننىڭ تۇرعىنى بلوك-بەكەتتى اينالىپ ءوتىپ, اۋدان ورتالىعىنا كىرمەك بولعان. پوليتسيا وسىندايلارمەن كۇرەستە بەلسەندىلىك كورسەتۋدە, بىراق ساناسىنا بەرمەگەندەردى ۇستاۋ دا قيىن. «كارانتين تالاپتارىن ساقتاۋعا مىندەتتى ادامداردىڭ بۇزۋشىلىق جاساۋىنا جول بەرمەۋگە تىرىسۋدامىز. ول ءۇشىن پوليتسيا قىزمەتكەرلەرىنىڭ قىراعىلىعىن ارتتىرىپ جاتىرمىز», - دەيدى اۋداندىق پوليتسيا ءبولىمى باستىعىنىڭ ءبىرىنشى ورىنباسارى پوليتسيا مايورى بەيبىت شانيەۆ. بارىنەن بۇرىن ادامداردىڭ ءوزى ىندەتتىڭ قاۋىپتىلىگىن تۇسىنگەنى دۇرىس, ارينە.
سولتۇستىك قازاقستان وبلىسى
