اقش-تىڭ تەننيس اسسوتسياتسياسىنىڭ ديرەكتورى (USTA) مايك دوۋس ءتۋرنيردى مەديتسينا قىزمەتكەرلەرىمەن كەڭەسە وتىرىپ ۇيىمداستىراتىنىن مالىمدەدى.
ء«بىز ءتۋرنيردى ۇيىمداستىرعىمىز كەلەدى. بىراق ەڭ ءبىرىنشى سپورتشىلار مەن جانكۇيەرلەردىڭ دەنساۋلىعىن ويلاعانىمىز ءجون. سوندىقتان الداعى ماۋسىم ايىندا دارىگەرلەرمەن كەڭەسە وتىرىپ, شەشىم قابىلدايتىن بولامىز. قازىر كۇن سايىن بەس-التى دارىگەرمەن كۇندە بايلانىسىپ, جاعدايدى نازاردا ۇستاپ وتىرمىز. مەديتسينا وكىلدەرى ءبىر-ەكى ايدىڭ كولەمىندە جارىستى وتكىزۋ قاۋىپسىز دەپ تاپسا, ماۋسىم ايىندا ءبىر شەشىم قابىلدايمىز», دەيدى مايك دوۋس.
ايتا كەتەيىك, بۇعان دەيىن اقش تەننيس فەدەراتسياسىنىڭ باسشىسى دەنني زاۋسنەر US Open جارىسى ءوز ۋاقىتىندا وتەدى دەپ مالىمدەگەن ەدى. اقش-تىڭ نيۋ-يورك قالاسىندا وتەتىن بيىلعى بىرىنشىلىك 31 تامىز بەن 13 قىركۇيەك ارالىعىنا جوسپارلانعان.
