تىگىنشىلىك ونىڭ سۇيىكتى كاسىبى, ابىرويلى ەڭبەگى. كيىم تىگۋدىڭ سان ءتۇرلى ادىستەرى مەن ۇلتتىق ويۋلاردىڭ قانشاما قۇپيالارىن حاس شەبەرگە ءومىر تاجىريبەسى ۇيرەتتى. ءالى ەسىندە, نەبارى 11 جاسىندا كورشى شەبەر اپاسىنا جۇمىس ىستەۋگە نيەتىن بارىن ايتىپ, قولعابىس ەتىپ جۇرەدى. الايدا ۋاقتىلى ءىس تىگۋگە جاسىنىڭ ساي كەلمەيتىنى ويلاندىرادى. 3 اي ەڭبەك ەتكەن سوڭ ەڭ العاشقى جالاقىسىن الادى. ت ۇلىمشاعى جەلبىرەگەن 11 جاسار نۇرياش كورشىلەرىنە قولىنداعى اقشاسىن بەرىپ, باكۋ قالاسىنان تىگىن ماشيناسىن الدىرادى. بۇگىنگە دەيىن وسى تىگىن ماشيناسى شەبەرحانا تورىندە تۇمارىنداي بولىپ ساقتالىپ كەلەدى.
1956 جىلى تۋعان اعاسى وقۋىن ءتامامداپ, اسكەرگە شاقىرىلادى دا, اناسىنا كومەكتەسۋ ءۇشىن 15 جاسار نۇرياش كەشكى مەكتەپكە اۋىسىپ, جۇمىس ىستەۋگە بەل بۋادى. ۇزاق ۋاقىت جۇمىس ىزدەپ, اسكەري پارادتىق كوستيۋمدەر تىگەتىن تسەحقا قابىلدانادى. بۇل ونىڭ كاسىبي شەبەرلەر اراسىندا باستاعان العاشقى ەڭبەك جولى ەدى. كوپ ۇلتتى ادامدارمەن تەز ءتىل تابىسىپ, تابىستى جۇمىس ىستەيدى. 1977 جىلى بارلىق كيىمدى تىگە الاتىن شەبەرگە ۇلتتىق كيىمدەردى تىگۋ تۋرالى وي كەلەدى. ءسويتىپ بىرنەشە مەملەكەتكە بارىپ ماتەريالدار اكەلىپ, فۋرنيتۋرا قولدانىپ ءىسىن باستاپ كەتەدى.
– سوناۋ 1985 جىلى كەيبىر ادامداردىڭ قازاقي كيىمدەرگە توسىرقاي قارايتىن كەزى ەدى. سوعان قاراماستان ۇلتتىق كيىمدەردى تىگۋدى توقتاتپادىق. قازىر زامان مۇلدەم باسقاشا, قازاقى كيىمگە دەگەن سۇرانىس ارتىپ, زاماناۋي ستيلدە تىكتىرىپ كيىپ جاتقاندار كوز قۋانتادى. ءار كەلگەن تۇتىنۋشىلارىما ايتقان كيىمىن تىگىپ بەرىپ, ونىڭ قۋانىپ, العىسىن ايتىپ, ريزا بولىپ بارا جاتقانىن كورۋ باقىت. بۇل جۇمىستى قيىن دەپ تە, وڭاي دەپ تە ايتۋعا بولمايدى. ءوزىمنىڭ سۇيىكتى ءىسىم بولعاندىقتان وسىنداي ەڭبەكپەن ۇلكەن دارەجەگە جەتىپ وتىرمىن, – دەيدى شەبەر نۇرياش نيازوۆا.
قازىر شەبەر باسقاراتىن «ورنەك» ءسان ءۇيىنىڭ نۇر-سۇلتان, اتىراۋ, اقتاۋ قالالارىندا شەبەرحانالارى مەن دۇكەندەرى بار. بارلىعىندا 40 شاقتى ادامدى جۇمىسپەن قامتىپ وتىر. تاپسىرىستار تولاستار ەمەس. بارلىق قالادان سۇرانىسقا يە ۇلتتىق كيىمدەردى, ءتىپتى شەتەلگە سىيلىققا اپاراتىندار كوپتەپ سانالادى. مۇندا ەرلەر مەن ايەلدەرگە ارنالعان بارلىق كيىم ءتۇرى مەن باس كيىمدەر تىگىلىپ شىعادى. تاپسىرىس اسىرەسە, ناۋرىز مەرەكەسى قارساڭىندا قىزا تۇسەدى. بەشپەنت, كامزول, كاجەكەي, شاپان, كەۋدەشە, كويلەك, ساۋكەلە, تاقيانىڭ ۇلتتىق ويۋ-ورنەكپەن كومكەرىلگەن سان الۋان ءتۇرى وسى ءسان ءۇيىنىڭ تۋىندىسى.
پرەزيدەنت وركەسترىنىڭ كيىمدەرىن, ۇلتتىق گۆارديا, ءتۇرلى مادەني ۇجىمدار, ءتىپتى ەكسپو-نىڭ كيىمدەرىن دە «ورنەك» ءسان ءۇيى تىككەن. ساپالى, اسا جوعارى تالعاممەن تىگىلەتىن كيىمدەر كوزدىڭ جاۋىن الادى. شەبەر ماتانىڭ ساپاسى مەن ۇيلەسىمدى سانىنە كوپ ءمان بەرەدى. ۇلتتىق ناقىشتاعى ءستيلدى زاماناۋي ۇلگىمەن قابىستىرىپ تىگۋدەن تاجىريبەلەرى مول. كاسىپكەر زامان كوشىنەن قالماي, جوعارى تالعامدى كيىم تىگۋدى, وعان جەتەكشىلىك ەتۋدى جالعاستىرا بەرمەك. وسىلايشا بار بىلگەنىن جاستارعا ۇيرەتىپ, ءومىرىن ايشىقتى ورنەكتەپ كەلەدى.
ۇلتتىق بولمىستى جاستارعا ناسيحاتتايتىن الدىڭعى بۋىن اپالاردىڭ, اق جاۋلىقتى انالاردىڭ ءتالىمى قاشان دا ماڭىزدى.
ماڭعىستاۋ وبلىسى
