ايماقتا دەرت جۇقتىرعانداردىڭ كوبەيۋىنە بايلانىستى شەكتەۋ شارالارىنىڭ قاتاڭداتىلعانى بەلگىلى. ال ونىڭ ورىندالۋىن سارالاعان شامشيددين ءاميتوۆ از ۋاقىت ىشىندە قر اكىمشىلىك قۇقىق بۇزۋشىلىق كودەكسىنىڭ 476 بابىن ساقتاماعان 526 فاكتى انىقتالعانىن اتاپ ءوتتى. وسىعان بايلانىستى سوتتا 236 اكىمشىلىك ءىس ونلاين تۇردە قارالىپ, 112 ادامعا 10 ايلىق ەسەپتىك كورسەتكىش سوماسىندا ايىپپۇل سالىنىپ, 124 تۇرعىن اكىمشىلىك قاماققا الىنعان.
وسىعان قاراماستان ءالى دە كارانتين تالابىنا باعىنباي, ءوزىنىڭ دە, وزگەنىڭ دە ءومىرىن قاتەرگە تىگىپ جۇرگەندەر از ەمەس.
مىسالى, 13 ءساۋىر كۇنى «Nur Otan» پارتياسى وبلىستىق فيليالىنىڭ عيماراتى الدىنا الەۋمەتتىك كومەكتىڭ جاي-جاپسارىن بىلمەك بولعان توپ ادامنىڭ جينالعانى بەلگىلى بولدى. جەرگىلىكتى اتقارۋشى ورگان مەن پروكۋراتۋرا وكىلدەرىنىڭ تۇسىندىرمەسىنەن كەيىن توپتاعىلاردىڭ ءبىرازى تارادى. جۇرتتى جينالۋعا ۇندەپ, تارتىپكە باعىنباعان 27 جاستاعى قالا تۇرعىنى سوتقا تارتىلىپ, 10 اەك كولەمىندە ايىپپۇل ارقالادى, – دەدى شامشيددين ءاميتوۆ.
ءتارتىپ بۇزعاننان كەيىن دە پوليتسەيلەرگە باعىنباي, بالاعاتتاعان تاعى ءبىر تۇرعىننىڭ ءىسىن سوتقا دەيىنگى تەرگەپ-تەكسەرۋ باستالدى. ايىبى انىقتالسا, ونىڭ دا جازاسى جەڭىل بولمايىن دەپ تۇر.
كۇنى كەشە عانا وبلىستىق باس سانيتارلىق دارىگەرىنىڭ №9 قاۋلىسى قابىلداندى. سوعان سايكەس, كارانتين كەزىندە قالاعا كىرىپ-شىعۋعا رۇقسات العان كولىكتەر سانى تاعى قىسقاردى. بۇگىن باقىلاۋ بەكەتتەرىندەگى ۇزىن-شۇباق كەزەك وسىعان بايلانىستى تۋىنداپ وتىر. جەرگىلىكتى بيلىك وسى ماسەلەنى جەدەل شەشۋ جولدارىن قاراستىرۋدا.
پوليتسيا دەپارتامەنتى باسشىسىنىڭ ورىنباسارى قازىرگى جاعدايعا بايلانىستى الەۋمەتتىك جەلىلەرگە دە تۇراقتى مونيتورينگ جاسالىپ وتىرعانىن جەتكىزدى. جەلى ارقىلى جالعان اقپارات تاراتىپ, جۇرتتى دۇرلىكتىرگەندەر دە جازاسىز قالمايدى.
