ينفەكتسيالىق بولىمشەنىڭ مەديتسينالىق قىزمەتكەرلەرى جانكەشتىلىكپەن ارەكەت ەتىپ ءجۇر. سونىڭ ناتيجەسىندە ءولىم-ءجىتىم جوق, جۋىردا ءبىر جاس ايەل ەمدەلىپ, اۋرۋحانادان شىقتى. باس دارىگەر بوتاگوز سۇلەيمەنوۆا: «ارىپتەستەرىمىز ءوز مىندەتتەرىن ادال اتقارۋدا. دارىگەرلەر عاليا سىزدىقوۆا, ايناگۇل قاسىباەۆا, اۋباكىر وماراليەۆ, مەدبيكەلەر شتول, شيروچەنكو, پوبەرەجنيك, سەرگەەۆا, ءبارى دە ءوز ىستەرىنە بەرىلگەن, ادال قىزمەت ەتىپ جۇرگەن جاندار. ال بولىمشەنىڭ سانيتار-تازالىقشىلارى ايتماعامبەتوۆا, قادىروۆا, روجكوۆا, باجەنوۆا, لۋتسەنكولار دا تەك جوعارى باعاعا لايىقتى», دەدى.
قازىر بولىمشەدە 24 ناۋقاس بار. دەرتتىڭ بەتى قاتتى بولسا, دەرەۋ وكپەنى جاساندى جولمەن جەلدەتەتىن اپپاراتقا جاتقىزىلادى. ال ەمدەۋ بارىسى رەسپۋبليكالىق مامانداردىڭ انىقتاعان ادىستەرىمەن جۇرگىزىلۋدە. قاجەتتى ءدارى-دارمەكتەر جەتكىلىكتى. ناۋقاسقا اۋرۋحاناعا تۇسكەننەن 14 تاۋلىكتەن كەيىن ساراپتاما جاسالادى. ەگەر ينفەكتسيا جوعى انىقتالسا, دەرەۋ ءۇستى-باسى تولىقتاي دەزينفەكتسيالانىپ, ۇيىنە ارناۋلى كولىكپەن جەتكىزىلەدى. ال دارىگەرلەر, مەدبيكەلەر جانە تازالىقشىلار ۇيلەرىنە جىبەرىلمەيدى. ءبىر كۇندىك اۋىسىمىن اتقارعان سوڭ ولاردىڭ ءۇستى-باسى تەگىس دەزينفەكتسيالانىپ, ارناۋلى كولىكپەن, ەشقايدا شىعارماي «التىن وردا» قوناقۇيىندەگى جەكە نومىرلەرگە جەتكىزىلەدى. كەلەسى اۋىسىم باستالعانشا ولار قوناقۇيدە بولادى. ءۇي-ءىشى, بالا-شاعاسىمەن تەك تەلەفون ارقىلى سويلەسە الادى. بوتاگوز سۇلەيمەنوۆانىڭ ايتۋىنا قاراعاندا, مۇنداعى جاعداي وتە جاقسى كورىنەدى. سونىمەن بىرگە ول دارىگەرلەردى قولداپ, ءبىر رەتتىك كوستيۋمدەر اپەرگەن اللا پيسارەنكو باسقاراتىن «ىسكەر ايەلدەر قاۋىمداستىعى» قوعامدىق ۇيىمى مەن ءدامدى تاعامدار جەتكىزىپ وتىرعان سايران حامزين باسقاراتىن «رەستوراتورلار قاۋىمداستىعى» قوعامدىق ۇيىمىنا دا العىس ايتتى.
قازىر ينفەكتسيالىق بولىمشەنىڭ مەديتسينالىق قىزمەتكەرلەرى ناۋرىز ايىنىڭ قوسىمشا اقىسىن دا تولىق الدى. بۇل دا اق جەلەڭدى جانداردىڭ ەڭبەگىن ىنتالاندىرا تۇسۋگە زور ىقپال ەتىپ وتىر.
پەتروپاۆل
