«كارانتين ۋاقىتى تىم جاي وتۋدە. ۇنەمى ۇيدە بولعاندىقتان شىعار. مۇمكىندىگىنشە جاتتىعۋ جاساۋعا تىرىسامىن. نەگىزىنەن, ۇيدە بولامىن. بارلىق قاۋىپسىزدىك شارالارىن قولدانىپ ءجۇرمىن», دەيدى بوكسشى.
لەۆيت امماندا وتكەن ىرىكتەۋ ءتۋرنيرى تۋرالى ءسوز قوزعاپ, كوماندانىڭ دايىندىعى جوعارى دەڭگەيدە بولعانىن مالىمدەدى.
«وليمپياداعا ىرىكتەۋ ءتۋرنيرى قازاقستان ەرلەر كومانداسى ءۇشىن ءساتتى ءوتتى. ءۇش جەكپە-جەك وتكىزدىم. ءبىرىنشى كەزدەسۋدە شارشى الاڭدى سەزىنىپ, بوي ۇيرەتتىم. ويتكەنى, تۋرنير اقپان ايىندا ءوتۋى ءتيىس بولاتىن. ءبىز سول مەرزىمگە دايىندالدىق تا, كەيىن كوروناۆيرۋسقا بايلانىستى جارىس ۋاقىتىن اۋىستىردى. سول سەبەپتى, ءبىرىنشى كەزدەسۋ وتە ماڭىزدى ەدى. قانداي جاعداي بولسا دا, ءبىرىنشى جەكپە-جەكتە جەڭۋ كەرەك. ەكىنشى اينالىمدا يوردانيالىق بوكسشىمەن كەزدەستىم. بۇل كەزدەسۋ پسيحولوگيالىق تۇرعىدا قيىن سوقتى. ويتكەنى, شارشى الاڭ قوجايىنىنا جانكۇيەرلەردىڭ قولداۋى جەتكىلىكتى ەدى.
فينالدا كەزدەسكەن جاڭا زەلانديا بوكسشىسىن قارىمدى قارسىلاس دەر ەدىم. تەحنيكاسى مىقتى, جەكپە-جەك تە وڭاي بولعان جوق. جەڭىسكە جەتۋىمە سەبەپكەر بولعان بارلىق باپكەرلەرگە, تۇتاس كومانداعا راحمەت. مەن بۇرىشتاعى باپكەرلەر داۋسىن تىڭداپ, ولاردىڭ نۇسقاۋىن ورىندادىم. تۋرنير ۋاقىتى اۋىستىرىلسا دا, ءوزىمدى جاقسى سەزىندىم. باپكەرلەر جاقسى جۇمىس ىستەدى. پسيحولوگيالىق, فيزيكالىق تۇرعىدان دايىن ەدىم», دەيدى ۆاسيلي لەۆيت.
سونداي-اق ول وليمپيا ويىندارىنىڭ كەلەسى جىلعا اۋىسقانىنىڭ ءتيىمدى تۇسىن اتادى.
«مەن بۇل جاڭالىقتى قالىپتى قابىلدادىم. ءوزى دە سولاي بولۋ كەرەك ەدى. قازىر وپتيميستەردىڭ ءوز پىكىرى, پەسسيميستتەردىڭ دە وزىندىك ويى بار. بىراق مەنىڭ پىكىرىم وپتيميستەرگە كەلەتىن سياقتى. وسى جىلى قاتەلىكتەرىممەن جۇمىس ىستەپ, كەلەسى جىلعى وليمپياداعا 100 پايىز بابىمدا بارامىن».
