ماماندار بۇگىندە UFC ۇيىمى ارەناعا جانكۇيەر جيناۋ, تەلەترانسلياتسيا ساتىلىمى جاعىنان بولسىن كاسىپقوي بوكس سپورتىنا جەتىپ قالدى دەپ ەسەپتەيدى. سەبەبى بۇل سپورت ءتۇرىنىڭ دە الەمگە ايگىلى جۇلدىزدارى جەتەرلىك. جالپى UFC داڭقىنىڭ جەر جاھانعا كەڭ تارالۋىنا وسى ۇيىمنىڭ بەلدى فايتەرلەرى دەمەتريۋس دجونسون, جورج سەن-پەر, اندەرسون سيلۆا, دانيەل كورمە, حابيب نۋرماگومەدوۆ, كونور ماكگرەگور جانە تاعى باسقا دا سپورتشىلارىنىڭ ەڭبەگى وراسان. اسىرەسە تەك سەگىز بۇرىش ىشىندە ەمەس, سىرتىندا دا ءتۇرلى شوۋ جاساۋدىڭ حاس شەبەرى, ءوز باسىنا جەتەرلىك «سايقىمازاقتىعى» بار ماكگرەگور UFC سپورتىن الەمدىك دەڭگەيگە جەتكىزدى دەسەك ارتىق ايتقاندىق ەمەس. قازىر ماكگرەگوردى تانىمايتىن ادام كەمدە كەم شىعار.
ءبىزدىڭ نەگىزگى ايتپاعىمىز UFC-ءدىڭ قالاي الەمدىك دەڭگەيگە شىققانى ەمەس, UFC ۇيىمىنىڭ پرەزيدەنتى دانا ۋايتتىڭ بەس جىلدان بەرى ءبىر جەكپە-جەكتى ۇيىمداستىرا الماي جۇرگەنى تۋرالى بولماق. قاي جەكپە-جەك ەكەنىن دە سەزىپ وتىرعان شىعارسىزدار. ءيا, سول باياعى حابيب نۋرماگومەدوۆ پەن توني فەرگيۋسون اراسىنداعى ايقاس.
بۇعان دەيىن حابارلانعانداي رەسەيلىك حابيب نۋرماگامەدوۆ پەن اقش وكىلى توني فەرگيۋسون اراسىنداعى ايقاس 18 ساۋىرگە جوسپارلانعان بولاتىن. دۇنيەجۇزىلىك دەنساۋلىق ساقتاۋ ۇيىمى 11 ناۋرىزدا كوروناۆيرۋس ىندەتىن پاندەميا دەپ جاريالاعاننان كەيىن بارلىق سپورت ءتۇرىن ۇيىمداستىرۋعا شەكتەۋ قويىلدى. تەك UFC پرەزيدەنتى دانا ۋايت قانا جوسپارلانعان ءتۋرنيرىن ۇيىمداستىرۋ ءۇشىن بار كۇشىن سالاتىنىن, ءتىپتى كەرەك بولسا ۆيرۋسپەن ايقاسۋعا دا دايىن ەكەنىن مالىمدەدى. ونىڭ بۇلاي ايتۋىنا ەكى سەبەپ بار ەدى.
ءبىرىنشىسى, بۇعان دەيىن حابيب نۋرماگومەدوۆ – توني فەرگيۋسون جەكپە-جەگى ەكى رەت ءحابيبتىڭ, ەكى رەت ءتونيدىڭ جاراقاتىنا بايلانىستى 4 رەت وتپەي قالعانىندا ۋايت ەشتەڭە ىستەي الماعان-دى. ال بيىلعى ايقاسقا ەكى سپورتشى دا ساقاداي-ساي تۇرىپ, الەم جۇرتى كۇتكەن ەكى جۇلدىزدىڭ جۇدىرىقتاسۋى انە-مىنە بولادى دەپ تۇرعاندا ۋايتتىڭ بۇل جولى جەڭىلگىسى كەلمەدى.
ەكىنشى, پاندەمياعا بايلانىستى بارلىق جارىس توقتاپ جاتقاندا ۋايت وسى ءتۋرنيردى وتكىزۋ ارقىلى ءاپ-ساتتە مول تابىسقا كەنەلگىسى جانە وسىنداي قيىن-قىستاۋ كەزەڭدە ەشتەڭەگە قاراماي, ۆيرۋستان دا قورىقپاي تۋرنير وتكىزۋ ارقىلى ول سپورت-پروموۋشەن الەمنىڭ اڭىزىنا اينالعىسى كەلدى.
ءتىپتى, اقش-تىڭ برۋكلين قالاسىنداعى Barclays Center ارەناسىندا ءوتۋى ءتيىس بولعان كەزدەسۋ نيۋ-يورك شتاتىنىڭ اتلەتيكالىق كوميتەتى شەشىمىمەن كەيىنگە قالدىرىلعان كەزدە دە ۋايت ەش ساسپاستان جەكپە-جەك 100 پايىز وتەدى دەپ سەندىردى. كەرەك بولسا, كوروناۆيرۋس جەتپەگەن جەكەلەگەن ارالدى جالعا الىپ بولسىن بۇل ايقاستى ۇيىمداستىرام دەگەن-ءدى. بىراق كەزدەسۋگە 10 كۇن قالعاندا حابيب رەسەي فەدەراتسياسى پاندەمياعا بايلانىستى شەكارانى جاۋىپ, ۇشاق قاتىناسىن توقتاتىپ تاستاعانىن العا تارتىپ, بۇل ايقاسقا قاتىسا المايتىنىن حابارلادى. دانا ۋايت بۇل حاباردى ەستي سالا تونيگە قارسىلاس ىزدەي باستادى. اينالدىرعان 1-2 كۇن ىشىندە وعان قارسىلاس تاۋىپ, ءتىپتى اندەركاردتا ونەر كورسەتەتىن سپورتشىلاردىڭ دا ءتىزىمىن جاريالاپ قويدى. ايتكەنمەن باسەكەنىڭ وتۋىنە ءبىر اپتا قالعاندا ۋايت جەڭىلگەنىن مويىنداپ, تۋرنير وتپەيتىنىن مالىمدەدى. «ميلليونداعان جانكۇيەر تاعاتسىزدانا كۇتكەن ءتۋرنيردى قالاي دا ۇيىمداستىرۋ ءۇشىن بارىمدى سالدىم. بىراق جوعارى جاقتان ماعان ۇلكەن ادامدار حابارلاسىپ, ءوتىنىش جاسادى. سولاردىڭ ايتقانىنا كونبەسكە بولمادى», دەيدى دانا ۋايت. وسىلايشا, حابيب نۋرماگومەدوۆ – توني فەرگيۋسون جەكپە-جەگى تاريحتا بەسىنشى رەت وتپەي قالدى. وسىدان كەيىن جانكۇيەرلەر تاراپىنان ەكى سپورتشىنىڭ ايقاسى سىنعا ۇشىراپ, بۇل ءبىر «قارعىس اتقان» جەكپە-جەك بولدى دەپ ايىپتاپ جاتىر. ارينە, جانكۇيەرلەردى دە تۇسىنۋگە بولادى. ادەيى ۇيىمداستىرىلعان شوۋ دا مۇنشالىقتى ۇزاققا سوزىلماس ەدى.
ارالاس جەكپە-جەك جانكۇيەرلەرىنىڭ ەسىندە بولسا, حابيب پەن توني اراسىنداعى ەڭ العاش جەكپە-جەك وسىدان 5 جىل بۇرىن, ياعني 2015 جىلى ءوتۋى كەرەك بولعان-دى. بىراق سول جىلى نۋرماگومەدوۆ جاتتىعۋ بارىسىندا جاراقات الىپ, كەزدەسۋدەن باس تارتتى. ال 2016 جىلعى جەكپە-جەك اقش سپورتشىسىنىڭ جاراقاتىنا بايلانىستى كەيىنگە قالدىرىلدى.
ارادا ءبىر جىل وتكەندە ەكى سپورتشى تاعى دا ايقاس وتكىزۋگە ۋاعدالاستى. بۇل جولى جەكپە-جەككە ءبىر كۇن قالعاندا حابيب سالماق قۋامىن دەپ اۋرۋحاناعا ءتۇسىپ قالدى. 2018 جىلعى كەزدەسۋ ەندى ءتونيدىڭ جاراقاتىنا بايلانىستى تاعى دا كەيىنگە قالدىرىلدى. ال ەندى ەكى سپورتشى اراسىنداعى بەسىنشى ايقاسقا جاراقات ەمەس, الەمدى جالماعان كوروناۆيرۋس ىندەتى سەبەپ بولدى.
دەسە دە ميلليونداعان جانكۇيەر كۇتكەن جەكپە-جەكتىڭ بيىل دا وتپەي قالعانى وكىنىشتى, ارينە. عاسىر ايقاسىنا ۇمىتكەر بولاتىن بۇل كەزدەسۋ ۇيىمداستىرىلعاندا كارانتيندە وتىرعان UFC كورەرمەندەرى تاماشا جەكپە-جەكتىڭ كۋاسى بولار ەدى. بىراق بۇل جۇدىرىقتاسۋدى ۇيىمداستىرۋ ازىرشە دانا ۋايتتىڭ, ايقاستى تاماشالاۋ ءبىزدىڭ, ياعني جانكۇيەرلەردىڭ ماڭدايىنا جازىلماعان ەكەن. بالكىم, ۋايت اعاي كەلەسى جىلى ۇيىمداستىرىپ قالار.
