سپورت • 08 ءساۋىر، 2020

فۋتبول ماۋسىمى جالعاسا ما؟

21 رەتكورسەتىلدى

بۇل كارانتيندە جاتقان ميلليونداعان فۋتبول جانكۇيەرلەرىن مازالاعان سۇراق دەسەك قاتەلەسپەيتىن شىعارمىز. ادەتتە بۇل ۋاقىتتا الا دوپقا اربالعان فۋتبول جانكۇيەرلەرى ەۋروپا ەلدەرىنىڭ چەمپيوناتىن تاماشالاپ، قاي كلۋب چەمپيون بولادى ەكەن دەگەن سۇراققا باس قاتىرىپ، سۇيىكتى كومانداسىنىڭ تىلەۋىن تىلەپ وتىراتىن ەدى. ءتۇننىڭ قاي ۋاقىت بولعانىنا قاراماستان، چەمپيوندار ليگاسى مەن ەۋروپا ليگاسىنىڭ تارتىستى باسەكەلەرىن تاماشالاۋدان دا تايىنبايتىن.

 

قازىر دۇنيەجۇزى ەلدەرىنىڭ ۇكىمەتى بارلىق جۇمىسىن ىسىرىپ قويىپ، توتەننەن كەلگەن كوروناۆيرۋس پاندەمياسىمەن كۇرەسىپ جاتىر. ال قاۋىپتىڭ كۇشەيگەنىن سەزگەن ءتىرى پەندەنىڭ ءبارى مىنا ىندەتتەن تەزىرەك قۇتىلۋ ءۇشىن كارانتيندە وتىر. تاۋلىكتىڭ جارتىسىنان كوبىن الاڭدا، جاتتىعۋ زالىندا وتكىزەتىن فۋتبولشىلارعا دا كارانتين وڭايعا سوقپاعانى انىق. العاشىندا ءىش پىسقاننان ءتۇرلى فلەشموب ۇيىمداستىرىپ ەدى، قازىر جاعداي كۇردەلەنگەن سوڭ بارلىعى بولماسا دا، ءبىرازى ءتۇرلى قايىرىمدىلىق شارالارىنا قاتىسىپ، جالاقىلارىنىڭ قىسقارۋىنا كەلىسىپ وتىر. وسى ورايدا، جانكۇيەرلەردىڭ «فۋتبول ماۋسىمى جالعاسا ما؟» دەگەن ساۋالىنا جاۋاپ ىزدەپ، ەۋروپانىڭ نەگىزگى چەمپيوناتتارىنىڭ قازىرگى جاعدايىن انىقتاپ كوردىك.

انگليا

ەگەر فۋتبولدان بيىلعى ماۋسىم وسى كەزەڭمەن اياقتالار بولسا، اپل ەڭ كوپ شىعىنعا باتادى. سوندىقتان قازىر بۇل ەلدە ماۋسىمدى اياقتاۋ تۋرالى ۇسىنىس كوپ تالقىلانىپ جاتقان جوق. سەبەبى جوعارىدا ايتقانداي كلۋبتار وراسان زور شىعىنعا باتادى. سوڭعى مالىمەت بويىنشا انگليا چەمپيوناتى مامىردا باستالادى دەپ جوسپارلانۋدا. اۋەلدە ىشكى چەمپيونات 5 ساۋىرگە دەيىن توقتاعان بولاتىن. كەيىن 30 ساۋىرگە دەيىن سوزىلعان-دى.

ءتىپتى اپل-ءدىڭ ءبىر كومانداسى بىرىنشىلىكتىڭ قالعان تۋرىن ۆيرۋستان قاۋىپسىز ەلدە، مىسالى قىتايدا وتكىزۋدى ۇسىنعان. بىراق قالعان 19 كوماندا ۇسىنىستى قولدامادى. قازىر بۇل ەلگە انگليا كۋبوگى ويىندارى كەدەرگى كەلتىرسە دە، جالعاستىرۋ ماڭىزدى. ويتكەنى انگليانىڭ تومەنگى ليگالارىندا باق سىنايتىن كوماندالار ءۇشىن بۇل ماڭىزدى تۋرنير. ءدال وسى كۋبوك ويىندارى ارقىلى ولار اپل-ءدىڭ توپ كلۋبتارىمەن كەزدەسىپ، مول تابىسقا كەنەلەدى.

چەمپيوناتتا «ليۆەرپۋل» ەكىنشى ورىندا كەلە جاتقان «مانچەستەر سيتي» كلۋبىنان 25 ۇپاي الدا تۇر. تاعى 6 ۇپاي ولجالاسا، بيىل چەمپيون اتانادى. ال انگليا كۋبوگىندا شيرەك فينالعا شىققاندار انىقتالىپ قويعان. «توتتەنحەم» مەن «ليۆەرپۋلدەن» بولەك، بارلىق توپ كوماندالار جارىستى جالعاستىرۋدا.

يسپانيا

يسپانيا فۋتبولىنىڭ باسشىلىعى ءتۋرنيردى 29 مامىردا جالعاستىرۋدى كوزدەپ وتىر.  ماتچتار ءار 72 ساعات سايىن جانكۇيەرلەرسىز وتەدى دەپ جوسپارلانۋدا. ال كلۋبتار جانكۇيەرلەردىڭ قاتىسۋىنسىز وتكىزە بەرۋگە قارسى ەمەس. AS باسىلىمىنىڭ مالىمەتىنشە، ليگا بارلىق كلۋبتارعا ماۋسىمدى جالعاستىرۋ ءۇشىن دايىندىقتى باستاۋعا، كارانتيننەن سوڭ باستالاتىن جاتتىعۋعا قاجەتتى ۇسىنىستاردى جىبەرگەن. يسپانيا چەمپيوناتىندا 27 تۋردان كەيىن 58 ۇپايمەن «بارسەلونا» ءبىرىنشى ورىندا كەلەدى. «رەال» كلۋبىندا 56 ۇپاي بار. لا ليگادا ءالى وينالماعان 11 تۋر بار.

يتاليا

ەۋروپادا پاندەميانىڭ وشاعىنا اينالعان يتاليادا قازىر جاعداي تۇراقتالىپ كەلەدى. العاش ا سەريا ويىندارى 24 مامىردا جالعاسىن تابادى دەپ حابارلاعان بولاتىن. بىراق سوڭعى مالىمەتتەرگە قاراعاندا بۇل ۋاقىت تا بەلگىسىز مەرزىمگە كوشىرىلدى.

«ماۋسىمدى مارەسىنە جەتكىزۋ باستى ماقساتىمىز بولىپ تۇر. جوسپار بويىنشا مامىر ايىنىڭ سوڭىندا نەمەسە ماۋسىمنىڭ باسىندا فۋتبولدى جالعاستىرۋىمىز كەرەك. دەسە دە جاعداي وزگەرىپ، بۇل مەرزىم تامىز نەمەسە قىركۇيەككە دە قالىپ كەتۋى مۇمكىن. ءبىر انىعى، بيىلعى ماۋسىمدى اياقتاپ، كەلەسى جىلعى بىرىنشىلىكتى كەشىكتىرىپ بولسىن باستايمىز»، دەدى يتاليا فۋتبول فەدەراتسياسىنىڭ پرەزيدەنتى گابريەلە گراۆينا.

يتاليا ا سەريا ەۋروپا ەلدەرىندە ءبىرىنشى بولىپ 9 ناۋرىزدا ويىنداردى توقتاتقان بولاتىن. قازىر يتاليادا وينالماعان 12-13 تۋر قالدى. تۋرنير كەستەسىندە «يۋۆەنتۋس» 63 ۇپايمەن كوش باستاپ تۇرسا، «لاتسيو» 62 ۇپايمەن تۋرنير كومانداسىن وكشەلەپ كەلەدى.

گەرمانيا

گەرمانيا فۋتبول اسسوتسياتسياسىنىڭ مالىمەتىنشە، چەمپيوناتتىڭ كەلەسى تۋر ويىندارى مامىر ايىنىڭ باسىندا باستالادى. بىراق ول ءۇشىن كوماندالارعا بىرقاتار شارت پەن تالاپ قويىلعان. بارلىق فۋتبولشى Covid-19 بويىنشا تەست تاپسىرادى. ەگەر دە بىرەۋىنەن وڭ ناتيجە شىعاتىن بولسا، بۇكىل كوماندا ەمەس تەك فۋتبولشىنىڭ ءوزى كارانتينگە جاتقىزىلادى.

ءتۋرنيردى جالعاستىرۋ ءۇشىن كوماندادا كەمىندە 13 فۋتبولشى جانە ەكى قاقپاشى بولۋ كەرەك. ەگەر ءبىر كوماندا جوعارىداعى تالاپقا ساي كەلمەسە، ول كومانداعا تەحنيكالىق جەڭىلىس جازىلادى. بارلىق ويىندار جانكۇيەرسىز وتەدى. ليگا باسشىسى كريستيان زايفەرتتىڭ ايتۋىنشا، ماقسات – 30 ماۋسىمعا دەيىن بىرىنشىلىكتى اياقتاۋ. ويتكەنى سول كۇنى كوپ فۋتبولشىنىڭ كەلىسىمشارتى اياقتالادى.

بۋندەسليگادا 25 تۋردان كەيىن «باۆاريا» 55 ۇپايمەن ءبىرىنشى ورىندا كەلەدى. 51 ۇپايى بار «بورۋسسيا د» ەكىنشى ورىندا تۇر.

قازاقستان

مادەنيەت جانە سپورت ءمينيسترى اقتوتى رايىمقۇلوۆا جۋىردا ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا سپورتتىق جارىستار قاشان جالعاساتىنىن ايتقان بولاتىن. «قازىرگى تاڭدا بارلىق سپورتتىق جارىستار ەلدەگى توتەنشە جانە كارانتيندىك جاعدايعا بايلانىستى ۋاقىتشا توقتاپ تۇر. سونداي-اق بىرقاتار دودالار جىلدىڭ ەكىنشى جارتىسىنا اۋىستىرىلدى. سپورتتىق باسەكەلەر قاشاننان باستاپ جالعاسىن تاباتىنىن تاپ باسىپ ايتا المايمىز. ويتكەنى بارلىعى قازىرگى كارانتيندىك جاعدايعا بايلانىستى»، دەدى ا.رايىمقۇلوۆا.

بيىلعى ەل بىرىنشىلىگى 7 ناۋرىزدا باستالىپ، 16 ناۋرىزدا كوروناۆيرۋس پاندەمياسىنا بايلانىستى توقتادى. وسى ۋاقىت ارالىعىندا كوماندالار نەبارى ەكى-اق تۋر وينادى. العاشقى تۋر ويىندارى قالىپتى جاعدايدا وتسە، ەكىنشى تۋر جانكۇيەرسىز ءوتتى. ەكى تۋر قورىتىندىسى بويىنشا «استانا» كوش باستاپ كەلەدى. جوسپار بويىنشا ويىندار 15 ساۋىردەن باستالادى دەپ كۇتىلۋدە.

ۋەفا

ەۋروپا فۋتبول قاۋىمداستىعى كوماندالارعا ماۋسىمدى جالعاستىرۋ ءۇشىن بارلىق جاعداي جاساپ جاتىر. اتاپ ايتار بولساق، ۋەفا ناۋرىز بەن ماۋسىم ايىندا وتەتىن ۇلتتىق قۇرامالاردىڭ ويىنىن كەيىنگە شەگەردى. بيىل ءوتۋى كەرەك بولعان ەۋرو-2020 چەمپيوناتىن كەلەسى جىلعا اۋىستىردى. سونىمەن قاتار چەمپيوندار ليگاسى مەن ەۋروپا ليگاسىن دا ءوز مارەسىنە جەتكىزۋدىڭ دە مۇمكىندىكتەرىن قاراستىرىپ جاتىر.

جۋىردا عانا چەمپيوناتىن اياقتاپ، جەڭىمپاز كوماندانى ماراپاتتاعان بەلگياعا ەسكەرتۋ جاسادى. ەگەر باسقا ەلدەر دە ءتۋرنيردى اياقتايتىن بولسا كەلەسى جىلعى ەۋروكۋبوك باسەكەلەرىنە قاتىستىرىلمايتىنىن ايتتى.  

قورىتا ايتقاندا، ەۋروپا ەلدەرىنىڭ بارلىعى ىشكى چەمپيوناتتارىن جالعاستىرعىسى كەلەدى. بىراق ەشبىر ەل ناقتى كۇن مەن انىق جوسپارىن ايتا الماي وتىر. دەسە دە ەۋروپادا وتەتىن ەڭ العاشقى رەسمي ويىننىڭ ناقتى داتاسى بەلگىلى بولعاندا ءبىر-ءبىرىمىزدى قۇتتىقتايمىز. تەك ميلليونداردىڭ ويىنى باستالعانى ءۇشىن ەمەس، كوروناۆيرۋس ىندەتىن جەڭگەنىمىزبەن.

سوڭعى جاڭالىقتار

ۇقساس جاڭالىقتار