ءوڭىر ديقاندارى جىلدان-جىلعا تىڭايتقىش قولدانۋدى دا ارتتىرىپ وتىر. جەر جارىقتىقتىڭ قۇنارى جىلدان-جىلعا ازايىپ بارادى, تەك تىڭايتقىش قانا ونىڭ ءنارىن ارتتىرادى. سوندىقتان ديقاننىڭ تىڭايتقىش الۋعا دەگەن سۇرانىسى وسە تۇسۋدە. مەملەكەت شارۋانىڭ تالابىن قولداپ وتىر, بيىل بۇل جۇمىسقا 5,5 ملرد تەڭگە سۋبسيديا قاراستىرىلعان. بىلتىرعىمەن سالىستىرعاندا بۇل 1 ملرد تەڭگەگە ارتىق. سۋبسيديا ءتۇرلى زيانكەستەردى قۇرتۋعا دا بەرىلەدى. وبلىس اكىمى قۇمار اقساقالوۆ 2022 جىلدان باستاپ پەستيتسيد پەن گەربيتسيدكە بەرىلەتىن سۋبسيديا 11 ملرد تەڭگەگە دەيىن ارتاتىنىن جەتكىزدى.
ء«بىزدىڭ ۇسىنىسىمىزدى مەملەكەت باسشىسى قولداپ, سۋبسيديا كولەمىن ارتتىرۋعا قول جەتكىزىپ وتىرمىز. ونى ءتيىمدى پايدالانۋ – ءبىزدىڭ مىندەت. سوندىقتان ساپالى حيميكاتتار تابۋ كەرەك. ارزان دەپ ۇسىنىلعان كەيبىرىنىڭ پايداسى جوق, بۇل تەك اقشانى جەلگە شاشۋ. بۇل بويىنشا اۋىل شارۋاشىلىعى مينيسترلىگىمەن دە كەلىسۋ كەرەك», دەدى ءوڭىر باسشىسى ق.اقساقالوۆ.
ديقاننىڭ ءزارۋ ماسەلەسىنىڭ ءبىرى – وزىق تەحنيكا. قازىرگى تەحنيكانىڭ كوبى ەسكىرگەن. جاقىن شەتەلدەردەن كەلەتىن تەحنيكا ساپاسىز, ءجيى اۋىستىرۋعا تۋرا كەلەدى. سوندىقتان كىرىس-شىعىسىن ەسەپتەۋگە ماماندانىپ العان ديقاندار مەملەكەتتىڭ كۇشىمەن بارىنشا ساپالى, بىرنەشە جىل بويى ءتيىمدى جۇمىس ىستەي الاتىن الىس شەتەلدەردىڭ وزىق تەحنولوگيالى تەحنيكالارىن الۋعا قۇشتار. وسى ورايدا وبلىس 2 مىڭ دانا جاڭا تەحنيكا ساتىپ الماق. وعان مەملەكەتتىك بيۋدجەتتەن 40 ملرد تەڭگە قاراستىرىلىپ وتىر. اتالعان قاراجات ءتيىمدى جۇمسالسا, ديقاندار ماشينا-تراكتور پاركىن ءبىرشاما جاڭارتىپ الماق.
بيىلعى كوكتەمگى دالا جۇمىستارىنا بارلىعى 13,7 مىڭ تراكتور, 16 مىڭ تۇقىم سەپكىش, سونداي-اق جوعارى ساپالى 1,2 مىڭ سەبۋ كەشەندەرى دايىن. سونىڭ ىشىندە, جىل باسىنان 5,3 ملرد تەڭگەگە ساتىپ الىنعان جاڭا تەحنيكالار دا بار. وبلىس باسشىسىنىڭ ايتۋىنشا, سولتۇستىكقازاقستاندىقتار بىلتىر 1897 بىرلىك جاڭا تەحنيكا ساتىپ الىپ, ماشينا-تەحنيكا پاركىن 3 پايىزعا جاڭارتقان. وسى كورسەتكىشتى جىل سايىن 6 پايىزعا جەتكىزۋ كوزدەلىپ وتىر. سونىمەن بىرگە قوسالقى بولشەكتەر جەتكىزۋدى ءتيىمدى ۇيىمداستىرا بىلگەن ءجون. قازىر ەڭ قاجەتتى دەگەن بولشەكتەردىڭ تىزىلىمدەرى جاسالىپ, ساۋدا ورىندارىنا جەتكىزىلگەن. شارۋا قالا كوشەلەرىندە ىزدەپ جۇرمەس ءۇشىن بولشەك ساۋدا دۇكەندەرى شاھاردىڭ كىرەبەرىستەرىنە ورنالاستىرىلدى. ولار شەكتەۋ شارالارىنا قاراماي, ءۇزىلىسسىز جۇمىس ىستەيتىن بولادى. ءوڭىر باسشىسى اۋدان اكىمدەرىنىڭ بۇل ىسكە ءجىتى قاراپ, شارۋانىڭ قاجەتتىلىكتەرىن ءبىلىپ وتىرۋى كەرەگىن ەسكەرتتى.
سولتۇستىك قازاقستان وبلىسى
