ايماقتار • 04 ءساۋىر، 2020

پەتروپاۆل: 16 جاستاعى بويجەتكەن ۇستالدى

13047 رەتكورسەتىلدى

بىزدە «شاش ال دەسە باس الۋ» دا ءجيى ورىن الادى عوي. مىنا ىندەتكە قارسى كۇرەستە دە سوندايلارعا جول بەرىلە باستادى. كەشە پەتروپاۆلدىڭ ورتالىعىنداعى م.جۇماباەۆ پەن ك.سۇتىشەۆ كوشەلەرىنىڭ قيىلىسىندا كەشكى ساعات جەتىنىڭ ماڭىندا 16 جاسار ءبىر بويجەتكەن ۇستالدى. ول ءوز ۇيىنەن شىعىپ، ءبىر شارۋامەن تۋىستارىنىڭ ۇيىنە بارا جاتقان ەكەن. 

قىزدى ۇستاۋعا نەگىزگى سەبەپ بولعان – ونىڭ كامەلەت جاسىنا تولماي اتا-انالارىنسىز كوشەگە شىققاندىعى بولىپ وتىر. وبلىستىق سانيتارلىق دارىگەردىڭ كارانتين جونىندەگى قاۋلىسىندا وسىنداي تالاپ بار كورىنەدى.

سونىمەن، قىز پوليتسيا باسقارماسىنا جەتكىزىلىپ، اناسى شاقىرتىلدى. وعان قاتىستى اكىمشىلىك قۇقىق بۇزۋشىلىقتار تۋرالى كودەكستىڭ «توتەنشە جاعداي رەجىمىن بۇزۋ» بابى بويىنشا اكىمشىلىك حاتتاما تولتىرىلىپ، ماتەريالدارى مامانداندىرىلعان اكىمشىلىك سوتقا جونەلتىلگەن.

وسى بۇزۋشىلىققا ادامي كوزبەن قاراساق، دۇرىستىققا جاتا ما؟ پوليتسيانىڭ مىندەتى كارانتين تۋرالى قاۋلىنىڭ تالابىن پەرىپ-ۇرىپ، كوزسىز ورىنداۋ ەمەس، بار ماقسات - ادامداردىڭ ساۋلىعىن ساقتاۋعا باعىتتالعاندىقتان سوعان قولقابىس تيگىزۋ عوي. ەندەشە 16 جاسار قىزدى ۇستاماي-اق، ۇيىڭە بار دەگەن ەسكەرتۋمەن جىبەرە سالۋعا بولادى عوي. باعىنباي جاتسا – باسقا ماسەلە. ايى تولماعان-اق شىعار، بىراق 16 جاسار قىز ءوز ىسىنە جاۋاپ بەرەتىن جاستا ەمەس پە؟ تەمىردى دە ءبىر-بىرىنە بەكىتكەندە «جىلجۋ ورنى» («دوپۋسك پوسادكي») دەگەن بولادى عوي. ادامدارعا دا تۇسىنىستىكپەن قاراپ، كامەلەتتىك جاستى تۇپ-تۋرا تالاپ ەتپەي، ءارى-بەرگى 2-3 جىلىنا  كەشىرىم جاساۋعا بولادى عوي. نەگىزگى مىندەت كورونوۆيرۋستىڭ تارالماۋىن بولدىرماۋ عوي. ال بىزدەگى ساقشىلار... جازىلعان نۇسقاۋلىققا جابىسا قالاتىن ادام ەمەس، روبوتتار سياقتى. الدە جاناشىرلىعى – ەسەپتى كوپىرتۋمەن عانا شەكتەلە مە؟ قوعام جاي دا قىسىلىپ، تىنىسى تارىلىپ تۇرعاندا جاساندى تىعىرىق تۋدىرا بەرمەۋ كەرەك قوي...

پوليتسيادان العان اقپاراتتارعا قاراعاندا پەتروپاۆلدا بۇل بويجەتكەننەن باسقا دا كارانتين تالابىن بۇزعان بەس ءجاسوسپىرىم ۇستالعان. ءار وقيعا بويىنشا تەكسەرۋ جۇرگىزىلىپ، حاتتاما تولتىرىلادى.

بۇگىنگى تاڭعا دەيىن سولتۇستىك قازاقستان وبلىسىندا كوروناۆيرۋستىق ينفەكتسيانى جۇقتىرۋدىڭ 18 جاعدايى تىركەلدى.

 

سولتۇستىك قازاقستان وبلىسى

 

 

 

 

سوڭعى جاڭالىقتار

ۇقساس جاڭالىقتار