بۇل الماگۇل باقتيارقىزى قابىلتاەۆانىڭ كارانتين كەزىندەگى كۇندەلىكتى جۇمىسىنىڭ ءبىر ءساتى. كەزەكتى كليەنتكە ەلەكتروندىق ساندىق قولتاڭبانى ونلاين الۋ جولىن تۇسىندىرۋدە. ول «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالى جاساقتاعان Call-ورتالىق وپەراتورى. 1414 ءنومىرى بويىنشا ازاماتتارعا ۇيدە وتىرىپ كەڭەس بەرەدى.
«مينۋتىنا 3-4 قوڭىراۋ تۇسەدى. بارلىق قوڭىراۋعا جاۋاپ بەرۋگە تىرىسامىن. كەيدە قوڭىراۋدىڭ قىزىعىنا ءتۇسىپ, اس ءىشۋدى دە ۇمىتىپ كەتەم. وسىنداي قيىن كەزەڭدە حالىققا پايدام تيسە دەيمىن. ولار دا ەرىككەننەن قوڭىراۋ سوقپايدى. ءوزىڭ بىلگەندى وزگەمەن بولىسكەنگە نە جەتسىن؟! ءارى العىستارى مەن باتالارىن الامىن», - دەيدى الماگۇل جۇمىسىنا قاناعاتتانعان سەزىمدە.
الماگۇل قابىلتاەۆا «ازاماتتارعا ارنالعان ۇكىمەت» مك» كەاق الماتى فيليالىنا وسىدان بەس جىل بۇرىن جۇمىسقا كىرگەن. ت.رىسقۇلوۆ اتىنداعى ەكونوميكالىق ۋنيۆەرسيتەتىندە قارجى-ەكونوميست ماگيسترى دارەجەسىن العان ول, حقو-عا كەلگەنگە دەيىن زەينەتاقى تولەمدەرى جونىندەگى مەملەكەتتىك ورتالىقتا جۇمىس ىستەگەن. بۇگىندە بوستاندىق اۋداندىق فرونت-وفيسىندەگى بىلىكتى دە تاجىريبەلى مامانداردىڭ ءبىرى. وتباسىندا سۇيىكتى جار, ءۇش بالانىڭ اناسى.
قازىرگى جاعدايعا بايلانىستى فيليالدا قاشىقتىقتان قىزمەت كورسەتۋدى ۇيىمداستىرىپ جاتقاندا, ۇجىم الماگۇلدى قاشىقتىقتان كەڭەس بەرەتىن Call-ورتالىق جۇمىسىنا ۇيدەن قوسىلاتىن 50 وپەراتوردىڭ قاتارىنا قوسقان. بۇگىندە وتباسىنىڭ ورتاسىندا, بالاپاندارىنىڭ جانىندا, ۇيدە وتىرىپ حالىققا قىزمەت كورسەتىپ وتىر.
«جۇمىس ورنى ۇيدە دەگەنى بولماسا, تالاپ ادەتتەگىدەي. تاڭعى ساعات 9.00-دە باستالعان جۇمىس كەشكى 18.30-عا دەيىن جالعاسادى. كۇنىنە 200-250 قوڭىراۋعا جاۋاپ بەرەمىن. كەڭەس الۋعا قوڭىراۋ شالاتىندار تۋ تۋرالى كۋالىك الۋ, بالا تۋىنا بايلانىستى جاردەماقىلار, ماب جازۋ, اۆتوكولىككە قاتىستى قۇجاتتاردى ۇيگە جەتكىزۋ قىزمەتى, ونلاين ەتسق الۋ, جەكە كۋالىك الۋ, ۋاقىتشا جانە تۇراقتى تىركەۋ, ەمحاناعا بەكىتۋ تۋرالى, اۆتوكولىك قۇرالدارىن ەسەپتەن شىعارۋ جانە قويۋ, اۆتوكولىككە تىيىم سالۋدى تەكسەرۋ, جۇرگىزۋشى كۋالىگىن قالاي الۋ جانە اۋىستىرۋ تۋرالى, سونداي-اق قايتىس بولۋ تۋرالى كۋالىكتى قالاي الۋ, جەرلەۋگە ارنالعان قۇجاتتاردى, تەحنيكالىق پاسپورت, جەر ۋچاسكەسىنىڭ مەملەكەتتىك اكتىسى, جك قالاي اشۋعا بولادى جانە ت. ب. سۇراقتاردى ءجيى قويادى», - دەيدى الماگۇل.
ءيا, بۇگىندە 608 مەملەكەتتىك قىزمەتتى ەلەكتروندىق ۇكىمەت پورتالى ارقىلى الۋعا مۇمكىندىك بار. سمارتفون ارقىلى 60 قىزمەت ءتۇرى قولجەتىمدى. الايدا, ەكىنىڭ ءبىرى ونلاين قىزمەت الۋدى بىلمەيدى. باسقا تۇسكەندە ادام ارەكەتكە ۇمتىلادى, بىلمەگەنىن سۇرايدى. سول سەبەپتى, فيليال كارانتين كەزىندە حالىققا كەڭەس بەرۋشىلەر قاتارىن كوبەيتكەن.
وسىلايشا, «ازاماتتارعا ارنالعان ۇكىمەت» مك كەاق حالىقتىڭ ەلەكتروندىق ۇكىمەت پورتالىن بەلسەندى پايدالانىپ, سىرتقا شىقپاي-اق, بار جۇمىسىن ۇيدە ءبىتىرىپ, مەملەكەتتىك قىزمەتتەردى ونلاين الۋىنا جاعدايلار جاساعان. فيليالداعى Call-ورتالىقتاعى 60 وپەراتورىمەن قاتار, الماگۇل سەكىلدى ۇيدە وتىرىپ كەڭەس بەرەتىن 50 وپەراتوردىڭ دا كۇندەلىكتى جۇمىسى وسىلاي جالعاسادى.
