- 30 ناۋرىزدا سامارا قالاسىنان 57 ستۋدەنت كەلگەن بولاتىن, ولاردىڭ سمارتفوندارىنا «GeoStatus» موبيلدىك قوسىمشاسىن ورناتتىق, بۇل قوسىمشا كارانتين رەجيمىنىڭ بۇزىلۋى مۇمكىن جاعدايلاردى قوسپاعاندا, ءوزىن ءوزى وقشاۋلاۋ ورىندارىنا تۇرىپ, ۇسىنىمداردى تاراتۋدى جانە ولاردىڭ جاي-كۇيى مەن ورنالاسقان جەرىن مونيتورينگ جاساۋعا, جەدەل مەديتسينالىق كومەك كورسەتۋگە مۇمكىندىك بەرەدى, - دەيدى باتىس قازاقستان وبلىستىق توتەنشە جاعدايلار دەپارتامەنتى باستىعىنىڭ ورىنباسارى, پودپولكوۆنيك اقىلبەك احمەتجانوۆ.
ايتا كەتەيىك, 29 ناۋرىزدا باتىس قازاقستان وبلىسىندا 2 ادام كوروناۆيرۋستىق ينفەكتسياسىن جۇقتىرعانى بەلگىلى بولعان ەدى. باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆتىڭ ايتۋىنشا, وبلىستىق جۇقپالى اۋرۋلار اۋرۋحاناسىندا قاجەتتى ەم-دوم الىپ جاتقان قوس ناۋقاستىڭ دا جاعدايى قاناعاتتانارلىق. ودان بولەك, كۋمىسكا كەنتىندەگى پروۆيزورلىق گوسپيتالدە – 57 ادام, بايتەرەك اۋدانىندا جرۆي بەلگىلەرى بار – 13 ادام, وبلىستىڭ كارانتيندىك گوسپيتالىنە – اۋرۋمەن قارىم-قاتىناستا بولعان 28 ادام جاتقىزىلدى. ولار كۇندەلىكتى مەديتسينالىق باقىلاۋعا الىنعان.
مامانداردىڭ پىكىرىنشە باتىس قازاقستان وبلىسى اۋماعىندا ەپيدەميولوگيالىق جاعداي سالىستىرمالى تۇردە تۇراقتى, كوروناۆيرۋستىق جۇقپا بويىنشا جاڭا وقيعا تىركەلگەن جوق. وبلىس اۋماعىندا كۇشەيتىلگەن كارانتين رەجىمى ەنگىزىلدى, ورال, اقساي قالالارىندا, اۋدان ورتالىقتارىندا تج بولىمدەرى داۋىس زورايتقىشپەن حالىققا اقپارات تاراتۋدا. ورال قالاسىنداعى الاڭدار, كوشەلەر, اۆتوبۋس ايالدامالارى مەن ورىندىقتاردى جۇيەلى دەزينفەكتسيالاۋ ءۇشىن 132 ادام, 36 تەحنيكا جۇمىلدىرىلعان. جامان ايتپاي جاقسى جوق, كوروناۆيرۋس ينفەكتسياسىمەن اۋىرعاندار شىعا قالسا, ولاردى ستاتسيونار مەكەمەلەرىنە تاسىمالداۋ ءۇشىن ورال قالاسىندا جوعارى ءوتىمدى 5 تەحنيكا, اقسايدا 1 كولىك دايىن تۇر. تۇرعىنداردىڭ كەز كەلگەن ساۋالىن قابىلداپ, جاۋاپ بەرۋ ءۇشىن جەدەل شتاب تاۋلىك بويى جۇمىس ىستەپ تۇر.
باتىس قازاقستان
