- وبلىس اۋماعىندا كوروناۆيرۋسكە قارسى كۇرەس اياسىندا جالپى سانى 5382 كەرەۋەتتىك 20 وبسەرۆاتسيالىق نىسان دايىندالدى. ودان بولەك 190 كەرەۋەتتىك 3 پروۆيزورلىق ستاتسيونار, 190 ينفەكتسيالىق ورىن دايىن. وڭىردە جاساندى تىنىس الۋعا كومەكتەسەتىن 134 اپپارات بار, ونىڭ 110-ى جوعارىدا اتالعان ستاتسيونارلاردا ورنالاستىرىلدى. بۇگىنگى تاڭدا مەديتسينالىق مەكەمەلەر قاجەتتى ماماندارمەن قامتىلعان, جوعارىدا اتالعان مەكەمە-ستاتسيونارلاردا 110 دارىگەر, 221 ورتا, 187 كىشى مەديتسينالىق پەرسونال قىزمەت كورسەتۋدە. ولارعا ورال مەديتسينالىق كوللەدجىنەن كەلگەن ەرىكتىلەر دە قوسىلدى. ۆيرۋس جۇقتىرعان تۇلعالارمەن تىكەلەي جۇمىس ىستەيتىن دارىگەرلەردىڭ قاۋىپسىزدىك شاراسى جاسالعان, ارنايى كوستيۋمدەرمەن, قورعاۋ قاسيەتى كۇشتى بەتپەردەلەرمەن قامتىلدى. سونداي-اق پرەزيدەنت جارلىعىنا سايكەس بۇل توپتاعى مەديتسينا قىزمەتكەرلەرىنىڭ جالاقىسىنا ۇستەمە قوسىلاتىن بولادى, - دەيدى باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى بولاتبەك كايۋپوۆ.
باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى مۇحامعالي ارىسپاەۆ 2 ءساۋىر كۇنى باتىس قازاقستان وبلىستىق جۇقپالى اۋرۋلار اۋرۋحاناسىندا كوروناۆيرۋسقا شالدىققان 2 ادام, «كۋمىسكا» كەنتىندەگى پروۆيزورلىق گوسپيتالدا – 58 ادام, بايتەرەك اۋدانىندا – جرۆي بەلگىلەرى بار 8 ادام, وبلىستىڭ كارانتيندىك گوسپيتالىندە – اۋرۋمەن قارىم-قاتىناستا بولعان 30 ادام جاتقىزىلعانىن حابارلادى.
وبلىس اۋماعىندا 31 ناۋرىزدان بەرى كۇشەيتىلگەن كارانتين رەجىمى ەنگىزىلگەن بولاتىن. سوعان سايكەس كوپتەگەن مەكەمە-كاسىپورىنداردىڭ قىزمەتى توقتاتىلدى, جۇمىس تارتىبىنە وزگەرىس ەنگىزىلدى. دەگەنمەن, حالىقتىڭ كۇندەلىكتى تىرشىلىگىن قامتاماسىز ەتەتىن مەكەمەلەر قىزمەتىن جالعاستىرادى. توتەنشە جاعدايعا بايلانىستى قۇرىلعان ورال قالالىق جەدەل شتابقا وسىنداي 632 مەكەمەدەن ۇسىنىس تۇسكەن ەكەن. ول وتىنىشتەردىڭ ارقايسىسى قارالىپ, راسىندا دا حالىقتىڭ كۇندەلىكتى قالىپتى تىرشىلىگىن قامتاماسىز ەتۋگە ۇلەس قوساتىن 427 مەكەمەگە قىزمەتىن جالعاستىرۋعا رۇقسات بەرىلگەن. ال 205 مەكەمەنىڭ ءوتىنىشىن ورىنداۋدان باس تارتىلعان.
- ورال قالاسىندا قازىر 9 بلوكپوست ورناتىلدى, قوزعالىس شەكتەلدى. بىراق ارنايى رۇقساتى بار مەكەمە-كاسىپورىن قىزمەتكەرلەرى مەن ولارعا ءتيىستى كولىكتەرگە كەدەرگى بولمايدى. قالالىقتارعا ەسكەرتەرىم, ماقساتسىز ءجۇرىس-تۇرىستى شەكتەڭىزدەر. بۇل ءبارىمىزدىڭ قاۋىپسىزدىگىمىز ءۇشىن وتە ماڭىزدى, - دەدى ورال قالاسىنىڭ اكىمى ابات شىنىبەكوۆ.
باتىس قازاقستان
