قحل-ءدىڭ الەۋمەتتىك جەلىدەگى رەسمي پاراقشالارىندا گاگارين كۋبوگىنىڭ جەڭىمپازىن انىقتاۋ ماقساتىندا بۇل كۇندەرى ونلاين داۋىس بەرۋ ماتچى ءوتىپ جاتىر. وسى ورايدا قازاقستاندىق حوككەي جانكۇيەرلەرى مىنا الەۋمەتتىك جەلىلەر ارقىلى (ۆك, Twitter, وك, Instagram) «بارىس» كلۋبىنا داۋىس بەرە الادى. ونلاين ويىن نۇر-سۇلتان ۋاقىتى بويىنشا تۇنگى 23:00-گە دەيىن جالعاسادى.
بۇعان دەيىنگى ەكى داۋىس بەرۋ ماتچىندا ءنوۆوسىبىردىڭ «سيبير» جانكۇيەرلەرى بەلسەندىلىك تانىتىپ, جەڭىسكە جەتكەن-ءدى. قحل-ءدىڭ ەرەجەسى بويىنشا, كەلەسى كەزەڭگە ءتورت رەت جەڭىسكە جەتكەن كوماندا جولداما الادى.
ايتا كەتەيىك, قحل باسشىلىعى كوروناۆيرۋسقا بايلانىستى ماتچتار توقتاعان سوڭ, ءتۋرنيردى مارەسىنە جەتكىزۋ جانە جەڭىمپاز كوماندانى انىقتاۋ ماقساتىندا ونلاين داۋىس بەرۋ جۇيەسىن ەنگىزگەن بولاتىن. ەندى گاگارين كۋبوگىنىڭ جەڭىمپازىن حوككەيشىلەر ەمەس, جانكۇيەرلەر داۋىس بەرۋ ارقىلى انىقتايدى.
