قازىرگى كەزدە شەت مەملەكەتتەردىڭ كوپتەگەن بۇقارالىق اقپارات قۇرالدارى ءدال وسىنداي حابار تاراتۋدا. سان مارتە الەمنىڭ ەڭ ۇزدىك فۋتبولشىسى جانە قارت قۇرلىقتىڭ ەڭ ۇزدىك سۇرمەرگەنى رەتىندە تانىلىپ, باسقا دا كوپتەگەن اتاقتاردى يەلەنگەن داڭقتى پورتۋگاليالىق شابۋىلشى 2018 جىلى ءمادريدتىڭ «رەالىنان» ءتۋرنيننىڭ «يۋۆەنتۋسىنا» اۋىسقان ەدى. سول كەزدە كريشتيانۋ رونالدۋدىڭ ترانسفەرلىك قۇنى 112 ميلليون ەۆروعا باعالاندى. 35 جاستاعى شوق جۇلدىز يتاليانىڭ ا سەرياسىندا دا جاسىنداي جارقىرادى. بيىلعى ماۋسىمدا وتكەن ءتۇرلى تۋرنيردە 32 رەت جاسىل الاڭعا شىققان ول 25 گولدىڭ اۆتورى اتانىپ, ءتورت رەت ناتيجەلى پاس بەردى. تالاي ماڭىزدى ماتچتاردا ءوز كومانداسىن العا سۇيرەپ, جەڭىسكە جەتۋىنە سۇبەلى ۇلەس قوستى.
كوروناۆيرۋستىڭ كەسىرىنەن الەمنىڭ وزگە دە فۋتبول كلۋبتارى سەكىلدى «يۋۆەنتۋس» تا مول شىعىنعا باتتى. الداعى ۋاقىتتا ولار رونالدۋعا بۇرىنعى جالاقاسىن تولەي الماۋى دا ابدەن مۇمكىن. قازىرگى كەزدە تۋريندىك كلۋب تەك ايتۋلى فۋتبولشى ءۇشىن عانا جىلىنا 31 ميلليون ەۆرو مولشەرىندە قاراجات جۇمسايدى ەكەن. سول سەبەپتى دە ولار 35 جاستاعى پورتۋگاليالىق سۇرمەرگەندى ساتىپ جىبەرۋى دە مۇمكىن.
