وپەراتسيا جاسالعان ازاماتتىڭ سوزىنشە, جۇمىس كەزىندە قولى بەتون ارالىستىرعىشقا قىسىلىپ قالعان. سونىڭ سالدارىنان وڭ قولىنىڭ سۇيەكتەرى مايدالانىپ, اۋىر حالدە جەدەل جاردەم قىزمەتىمەن اۋرۋحاناعا جەتكىزىلگەن. مەديتسينا ماماندارى جاس جىگىتتىڭ ءومىرىن امان الىپ قالۋ ءۇشىن شۇعىل تۇردە وتا جاساپ, قولىنىڭ مايدالانعان سۇيەكتەرىن جيناپ بەردى.
ءبىرىنشى كەزەڭدەگى وپەراتسيادا حيرۋرگتار جىگىتتىڭ قولىنداعى تامىرلارىن تىگىپ, سۇيەكتەرىن قايتا قالپىنا كەلتىرگەن. مۇنان سوڭ, اراعا ءبىر اي سالىپ, ت.ورىنباەۆ اتىنداعى گيپەرباريالىق وكسيگەناتسيا ورتالىعىنىڭ حيرۋرگى مۇحيت دوسىباەۆتىڭ جەتەكشىلىگىمەن ناۋقاسقا ەكىنشى كەزەڭدى كۇردەلى وتا جاسالدى.
بۇل جولى حيرۋگتار جىگىتتىڭ جاراقاتتانعان قولىنا پلاستيكالىق وتا جاساعان. ناقتىراق ايتقاندا دەنەنىڭ باسقا جەرىنەن تەرى الىنىپ, قولىنا جاپسىرۋعا تۋرا كەلگەن. دارىگەردىڭ ايتۋىنشا, تەرى ءجۇز پايىز جابىسىپتى. ناۋقاستىڭ قازىرگى جاعدايى جاقسى.
- 19 اقپان كۇنى جۇمىستا بولعان قايعىلى جاعداي. العاشقى كەزدە امان قالام دەپ ويلامادىم, قولىم شاشىراپ كەتتى. دارىگەر مۇحيت باستارباي ۇلى تەرى الماستىرۋ وتاسىن جاساپ بەردى. قازىرگى جاعدايىم جاقسى. ت.ورىنباەۆ اتىنداعى گيپەرباريالىق وكستگەناتسيا ورتالىعىنىڭ ۇجىمىنا العىس ايتامىن, - دەيدى ەم الۋشى جىگىت.
