امانحان ءالىم ۇلى 1952 جىلى 20 قاڭتاردا تۇركىستان وبلىسى, وتىرار اۋدانى, قوجاتوعاي اۋىلىندا تۋعان.
1969 جىلى سول اۋىلداعى امانگەلدى اتىنداعى ورتا مەكتەپتى بىتىرگەن. 1975 جىلى قازۇۋ-دىڭ جۋرناليستيكا فاكۋلتەتىنە وقۋعا ءتۇسىپ, 1981 جىلى تامامداعان.
1981-1989 جىلدار ارالىعىندا «قازاقستان پيونەرى», «لەنينشىل جاس», «قازاق ادەبيەتى», «تۇركىستان» جانە «قازاق راديوسى» سياقتى رەسپۋبليكالىق ءباسپاسوز سالالارىندا قىزمەت ەتتى.
1991-1993 جىلدار ارالىعىندا ماسكەۋدەگى م.گوركي اتىنداعى ادەبيەت ينستيتۋتىنىڭ جانىنداعى جوعارعى كۋرسىنىڭ كۇندىزگى بولىمىندە وقيدى.
امانحان ءالىم ۇلى قازاقستان رەسپۋبليكاسىنىڭ مادەنيەت قايراتكەرى, م.ماقاتاەۆ اتىنداعى سىيلىقتىڭ لاۋرەاتى, «وڭتۇستىك قازاقستانعا ەڭبەگى سىڭگەن» مەدالىمەن, سونداي-اق «جاندوس» اتىنداعى سىيلىقتىڭ يەگەرى, «ۇلت پاتريوتى» گراموتاسىمەن ماراپاتتالعان. تۇركىستان وبلىسى, ارىس قالاسىنىڭ قۇرمەتتى ازاماتى.
اقىن ا.ءالىم «وتكىردىڭ ءجۇزى», «اينۇرى الاقانىمدا», «جانىمنىڭ جاپىراعى», «بەس قوڭىراۋ», «اتاقونىس», «كەزدەسۋ» پۋبليتسيستيكالىق جانە ولەڭدەر جيناعىنىڭ اۆتورى.
«اقيقات» جۋرنالىنىڭ باس رەداكتورى قىزمەتىن اتقارىپ تۇرعان ۋاقىتتا امانحان ءالىم ۇلى پرەزيدەنت ق.توقاەۆتىڭ 29 قاراشاداعى جارلىعىمەن «قۇرمەت» وردەنىن يەلەنگەن بولاتىن.
