ايماقتار • 28 ناۋرىز، 2020

جەتىسۋدا كوروناۆيرۋس جۇقتىرعان ەكىنشى ادام انىقتالدى

484 رەتكورسەتىلدى

بۇگىنگى تاڭەرتەڭگى جاعداي بويىنشا ەلىمىزدە كوروناۆيرۋس جۇقتىرعاندار  سانى 191 ادامعا جەتتى. جۇقپالى ىندەت بەلگىسى الماتى وبلىسى اۋماعىنان دا انىقتالدى. بۇل ايماقتاعى تىركەلگەن ەكىنشى جاعداي بولىپ وتىر. بۇعان دەيىن وبلىستىڭ قاراساي اۋدانى اۋماعىندا قاجىلىق ساپاردان ورالعان تۇرعىننان ىندەت انىقتالىپ، وقشاۋلانعان بولاتىن.

ال بۇگىن ىندەت جۇقتىرعان ەكىنشى ادام جاعدايى مەن ىندەت وشاعى جايلى تولىق مالىمەتتى وبلىس دارىگەرلەرى رەسمي مالىمدەمە جاساعاننان كەيىن تاراتاتىن بولامىز.

ايتپاقشى، كوروناۆيرۋستان نۇر-سۇلتان قالاسىندا قايتىس اقمولا وبلىسىنىڭ تۇرعىنىمەن قارىم-قاتىناستا بولعان ادامدار الماتى وبلىسىنان دا تابىلدى. بۇعان دەيىن مارقۇمنىڭ الماتى قالاسى مەن جامبىل وبلىسىنىڭ شۋ اۋدانى اۋماعىندا بولعانى جاريالانعان ەدى. ال وبلىس تۇرعىندارى ىندەت جۇقتىرىپ قايتىس بولعان ايەلمەن الماتى قالاسىنداعى قۇدالىق كەزىندە جاقىن بايلانىستا بولعان ەكەن.

- وبلىستىڭ ارنايى ماماندارى تەكسەرۋ جۇرگىزىپ، مارقۇم ايەلمەن ارالاس-قۇرالاس بولعان 7 ادامدى انىقتادى. بۇل ادامدار الماتى وبلىسىنىڭ اۋماعىندا تۇرادى. قازىر ولاردىڭ بارلىعى وقشاۋلانىپ، ءتيىستى قان سىناماسى الىندى. كەشە ءتورت ادامنىڭ تەكسەرۋ ناتيجەسى دايىن بولدى. تۇرعىنداردىڭ قان قۇرامىنان ۆيرۋس بەلگىسى تابىلعان جوق. دەگەنمەن، ولار ءالى دە دارىگەرلەردىڭ باقىلاۋىنا الىنىپ، كارانتيندە بولادى. سونداي-اق، كۇدىك تۋدىرعان تاعى بەس ادامنىڭ اناليزدەرى تەكسەرىلىپ جاتىر. ناتيجەسىن قوسىمشا حابارلايمىز، - دەدى الماتى وبلىسى اكىمىنىڭ ءباسپاسوز حاتشىسى عالىمىۇرات جۇكەل.

 

الماتى وبلىسى

سوڭعى جاڭالىقتار

ۇقساس جاڭالىقتار