مال تەرىسىنىڭ شەتەلگە, اسىرەسە كورشى قىتايعا شيكىزات تۇرىندە ارزانعا ساتىلىپ, كەيىن دايىن ءونىم تۇرىندە الدەنەشە ەسە قىمباتقا كەرى قايتاتىنىن ءماجىلىس دەپۋتاتتارى بىرنەشە جىلدان بەرى ماسەلە ەتىپ كوتەرىپ ءجۇر. ولاردىڭ دەرەگىنشە, شامامەن 2 ملرد ەۋرو تۇراتىن مال تەرىسى كولەڭكەلى جولدارمەن ەلىمىزدەن تىسقارى شىعارىلادى. سونىڭ سالدارىنان مەملەكەتتىك ورگانداردىڭ ەسەپتەرىنە ەنبەي قالادى.
ۇكىمەت ساپالى تەرى ءوندىرىسىن ارتتىرۋ ماقساتىندا بورداقىلاۋ الاڭدارىن رەتكە كەلتىرۋ جولدارىن ىزدەۋدە. سونداي-اق مال سوياتىن كاسىپورىنداردى سۋبسيديالايتىن باعدارلاما جاساۋدا. بۇعان بيۋدجەتتەن جىل سايىن 1-1,5 ملرد تەڭگە باعىتتالىپ وتىر.
الداعى ۋاقىتتا يران كاسىپكەرلەرى قازاقستاندا اياق كيىم تىگۋدى قولعا الماق. الەمدە بىلعارى وڭدەۋدەن ۇشتىككە ەنەتىن بۇل ەلدە شيكىزات جەتىسپەيدى. ويتكەنى, يراندا مال وسىرۋمەن اينالىساتىن شارۋاشىلىقتار كوپ ەمەس. ال بىزدە ءبارى كەرىسىنشە. ەندەشە, جاننان بۇرىن مالدىڭ اماندىعىن سۇرايتىن ۇلتىمىز ەڭ سوڭى تەرى وڭدەۋ كاسىبىن دە باسقاعا بەرە سالۋعا دايىن سياقتى.
– ەگەر جەڭىل ونەركاسىبىمىز مەملەكەتتەن قولداۋ تاپپاسا وسى كۇيىندە قالا بەرمەك. شىنى كەرەك, ءبىز شيكىزاتقا تاۋەلدى مەملەكەتپىز. بۇل حالىقتى ونەركاسىپكە ۇيرەتپەيدى نە تابىس اكەلمەيدى. شيكىزات ساتىپ بايىعان بىردە ءبىر ەل جوق. بۇل تەرى وندىرىسىنە دە قاتىستى. مىسالى, ءبىز قويدىڭ ەتىن عانا پايداعا اسىرامىز. ال ونىڭ تەرىسى مەن ىشەك-قارىنى يت-قۇسقا جەم بولادى. وسىدان-اق ويلاي بەرىڭىز. اتا-بابامىز تەرى يلەۋدىڭ ءتۇرلى ءتاسىلىن مەڭگەرگەن. بايپاق, ءماسى, ساپتاما ەتىك تىگۋ تەحنولوگياسى قازاق توپىراعىنان شىققان. ال بۇگىندە ءبارى اڭىزعا اينالدى. تارازدا بىلعارى اياق-كيىم ونەركاسىبى اشىلدى. ءونىمى ساپالى. ەندى بولاشاقتىڭ قامى ءۇشىن سول تازا بىلعارىدان جاسالعان اياق كيىمدەردى نەگە پايدالانباسقا؟ سىرتتان كەلەتىن ارزان اياق كيىمدەردى ىشكە كىرگىزبەۋ كەرەك. ولارعا دەگەن سالىق كولەمىن ارتتىرسا مۇمكىن ىشكى ونىمگە سۇرانىس كوبەيەر, – دەيدى بەلگىلى ەكونوميست جانگەلدى شىمشىقوۆ.
وسىدان ەكى جىل بۇرىن ءماجىلىس دەپۋتاتى قۋانىش سۇلتانوۆ وسى سالانىڭ پروبلەماسىن وتكىر ايتقان ەدى. «ۇلتتىق ەكونوميكا مينيسترلىگى قوي تەرىسى مەن ءجۇنىن وندىرەتىن زاۋىتتى قاي جەرگە سالۋ كەرەكتىگىن ۇسىنبايدى. نەگە ءبىزدىڭ بارلىق قويدىڭ تەرىسى مەن ءجۇنىن جانە باسقا دا ءونىمىن قىتايعا تاسيدى؟ ويتكەنى ونداعى كاسىپورىندار قايتا وندەۋمەن اينالىسادى. بىزدە مەملەكەتتىك قىزمەتكەرلەردىڭ پسيحولوگياسى وزگەرمەگەن» دەدى ول. بىراق ءالى دە باياعى جارتاس سول جارتاس. سودان بەرى قانشا ۋاقىت وتسە دە بۇل سالانىڭ تىرلىگى ناقتى ىستەن گورى قۇر سوزبەن عانا شەشىلۋدە.
