سونىڭ ىشىندە تايىنشا اۋدانىنداعى 39 جاستاعى اۋزى جەڭىل ءبىر ايەل تاعى ءبىر سولتۇستىكقازاقستاندىقتىڭ دياگنوزى راستالعانىن ايتىپ, حابارلامانى «WhatsApp» مەسسەندجەرى ارقىلى قۇرامىندا 10-نان استام ادامى بار «دوستار» توبىنا جىبەرگەن. توپتاعىلار بۇل جالعان اقپاراتتى ارى قاراي وزدەرىنىڭ چاتتارى بويىنشا تاراتىپ جىبەرگەن. جالعان حابارلاما ءبىر كۇن ىشىندە جۇزدەگەن اۋدان تۇرعىنىنا جەتىپ, جەرگىلىكتى تۇرعىندار اراسىندا ۇرەي تۋدىردى. ىسكە جەدەل كىرىسكەن پوليتسيا ۋاكىلدەرى تاراتۋشىنى جەدەل انىقتادى. قازىر جالعان اقپارات تاراتۋ فاكتىسى بويىنشا قك 274-بابى 4-بولىگى بويىنشا سوتقا دەيىنگى تەرگەۋ جۇرگىزىلۋدە. ايەل جەرلەستەرىنەن كەشىرىم سۇراعان.
تاعى ءبىر ارانداتۋشى پەتروپاۆلدا كوروناۆيرۋسپەن اۋىرعان ەكى ادام تۋرالى جانە الداعى ۋاقىتتا وبلىس ورتالىعىنىڭ كارانتينگە جابىلاتىنى جونىندە وتباسىلىق چاتقا حابارلاما جىبەرگەن. «تونگەن قاۋىپتى» توپ قاتىسۋشىلارى تانىستارىنا جىبەرىپ, تاراتىپ جىبەرگەن. سونداي-اق, مامليۋت اۋدانىندا پوليتسەيلەر جەرگىلىكتى پابليكتەرگە مونيتورينگ جۇرگىزۋ كەزىندە اۋدان ورتالىعىندا انىقتالعان ىندەت تۋرالى جالعان كوممەنتاري ورنالاستىرعان ادامدى انىقتادى.
وسى ادامدارعا قارسى قازىر ءتيىستى شارالار قابىلدانۋدا. قىلمىستىق كودەكستىڭ 274-بابىندا جالعان اقپارات تاراتقانى ءۇشىن باس بوستاندىعىنان ايىرۋعا دەيىن جاۋاپكەرشىلىك ايتىلعان. ەگەر بۇل توتەنشە جاعداي كەزىندە ورىن السا, وندا ءۇش جىلدان جەتى جىلعا دەيىنگى مەرزىمگە باس بوستاندىعىن شەكتەۋ نەمەسە سول مەرزىمگە باس بوستاندىعىنان ايىرۋ تۇرىندەگى جازا قولدانىلادى.
«حالىق اراسىندا دۇربەلەڭ تۋعىزاتىن جالعان اقپاراتتىڭ تارالۋىن انىقتاۋ جانە جولىن كەسۋ ماقساتىندا ماقساتتى جۇمىستار جۇرگىزىلۋدە. وسىنداي فاكتىلەر الەۋمەتتىك جەلىلەر مەن مەسسەندجەرلەرگە مونيتورينگ جۇرگىزۋ بارىسىندا انىقتالدى», - دەيدى سقو پد باسقارماسىنىڭ باستىعى رۋسلان مۇحامبەتجانوۆ.
سولتۇستىك قازاقستان وبلىسى
