سولتۇستىك قازاقستان پد تابيعات قورعاۋ ءبولىمى مەن تج قىزمەتكەرلەرى بىرلەسىپ قازىر سۋ قويمالارىنا بارىپ, بالىقشىلارعا مۇزدىڭ جۇقا ەكەنىن ەسكەرتۋدە. «نازار اۋدارىڭىزدار» دەگەن تاقتايشالار دا ءىلىنىپ, مۇزدىڭ جۇقا ەكەنىن حابارلاۋدا. بالىققا شىققاندار كوبىنەسە تويعا بارعانداي ماسايراپ, قالتالارىنا اششى سۋلى شىنىلارىن دا سالىپ الادى. قارىندارىنا اششى سۋدىڭ اشىرتقىسىن جەتكىزۋگە اسىققان وندايلار تاقتايداعى ەسكەرتپەلەرگە قۇلاق اسا قويمايدى. سوندىقتان ءتارتىپ ساقشىلارى بالىقشىلار كوپ باراتىن سۋ قويمالارىنا ءجيى شىعۋعا ءماجبۇر بولۋدا.
وسىندايدا مۇز ۇستىنە شىعاتىن تەحنيكالاردىڭ ءجۇرۋى قاۋىپتى زورايتا تۇسەدى. وندايلاردىڭ مۇز استىنا كەتۋ قاتەرى قازىر ەسەلەنە تۇسكەن. سوندىقتان قازىر تەحنيكانى قولدانۋعا مۇلدە تيىم سالىنۋدا. تابيعات قورعاۋ پوليتسياسىنىڭ اعا ينسپەكتورى اسحات قوجاباەۆتىڭ ايتۋىنا قاراعاندا قازىر بارلىق پوليتسيا بولىنىستەرىنە بالىققا شىعۋدىڭ قاۋىپتىلىگىن حالىققا جەتكىزىڭدەر دەگەن تاپسىرما بەرىلگەن. بالىقشىلارعا وسىنداي شارالار قولدانىلىپ جاتسا وزەننىڭ مۇزىمەن ۇيىنە تەزىرەك, تۋرا جەتۋگە اسىعۋشىلار دا ازايار ەمەس. پوليتسيا وندايلاردى دا قاۋىپتەن ساقتانۋعا تىرىسىپ جاتىر.
«جاۋ جاعادان العاندا يت ەتەكتەن تارتادى» دەمەكشى كورونوۆيرۋستىڭ قاۋپى ۇدەپ تۇرعاندا كوكتەمگى كەزەڭ وسىنداي دا قىستالاڭ تۋدىرىپ تۇر. ايتەۋىر, «ساقتىقتا قورلىق جوق» دەگەن حالىق دانالىعىن ەسكەرگەنى ءجون.
سولتۇستىك قازاقستان وبلىسى
