«توپان» جشس مۇناي-گاز سالاسىنا قاجەتتى قۇرال-جابدىقتار وندىرىسىندە 20 جىلدان بەرى تابىستى ەڭبەك ەتىپ كەلە جاتقان كاسىپورىن. ونىڭ 50-دەن اسا ءتۇرلى ءونىمىن وتاندىق جانە شەتەلدىك مۇناي-گاز ءوندىرۋشى كومپانيالار قاتار پايدالانىپ كەلەدى. ولاردىڭ ىشىندە ايگىلى قاراشىعاناق پەترولەۋم وپەرەيتينگ ب.ۆ. حالىقارالىق اليانسى دا بار. وسى كەزگە دەيىن جەرگىلىكتى جانە شەتەلدىك 50-دەن اسا كەن وندىرۋشىلەرمەن تىعىز ارىپتەستىك ورناتقان «توپان» جشس ەندى ءوندىرىس اياسىن ودان ءارى ۇلعايتىپ, جىلىنا 20 مىڭ تونناعا دەيىن ءونىم ءوندىرىپ, جاڭادان 50 ادامعا جۇمىس تاۋىپ بەرگەلى وتىر. ايتا كەتەيىك, بۇعان دەيىن ەلىمىزدەگى مۇناي-گاز كومپانيالارى حيميالىق رەاگەنتتەردى قىتاي مەن رەسەيدەن الىپ كەلگەن كورىنەدى.
- قازاقستاننىڭ باتىس ايماعىندا مۇناي-گاز ءوندىرىسى جاقسى دامىعان. سوندىقتان وسى سالاداعى ءار كومپانياعا دا «توپان» شىعاراتىن حيميالىق رەاگەنتتەر كەرەك. بۇرىن ول شەتەلدەن اكەلىنەتىن بولسا, ەندى ءوزىمىزدىڭ ورال قالاسىندا شىعارىلاتىن بولادى. وسى ارقىلى كەمىندە 20 ملن اقش دوللارى كولەمىندە يمپورتتى الماستىرعالى وتىرمىز. وعان قوسا جاڭا جۇمىس ورىندارى اشىلادى, سالىق ءتۇسىمى كوبەيەدى. مۇنىڭ ءبارى ءبىزدىڭ حالقىمىزدىڭ يگىلىگى ءۇشىن جاسالىپ وتىر. مەملەكەت تاراپىنان ءبىز «توپان» كومپانياسىنىڭ نەسيەسىن سۋبسيديالاۋعا كومەك بەرىپ جاتىرمىز, - دەدى جاڭا تسەحتىڭ اشىلۋىنا وراي وتكەن سالتاناتتى شاراعا ارنايى قاتىسقان باتىس قازاقستان وبلىسىنىڭ اكىمى عالي ەسقاليەۆ.
قۇرىلتايشىلاردىڭ ايتۋىنشا, جاڭا جوباعا باس-اياعى 4 ملرد تەڭگە قارجى جۇمسالعان. ال «بيزنەستىڭ جول كارتاسى» بىرىڭعاي باعدارلاماسى بويىنشا نەسيەنىڭ پايىزدىق مولشەرلەمەسىن سۋبسيديالاۋ ءۇشىن مەملەكەت تاراپىنان 726 ملن تەڭگە كومەك كورسەتىلگەن. جاڭا زاۋىت 4 گەكتار اۋماققا ورنالاسقان. بىرنەشە وندىرىستىك بولىككە بولىنگەن تسەحتىڭ دايىن ءونىم ساقتالاتىن قويماسى دا بار.
- ءدال وسىنداي قيىن كەزەڭدە پرەزيدەنت قاسىم-جومارت توقاەۆ جۇمىس ورىندارىن بارىنشا ساقتاۋعا تاپسىرما بەرگەن بولاتىن. سىزدەر ونى ساقتاپ قانا قويماي, قوسىمشا 50 جۇمىس ورنىن اشۋعا قول جەتكىزىپ وتىرسىزدار. بۇل وتە جاقسى جاڭالىق. قازاقستاننىڭ ەكولوگيالىق تازالىعى, وندىرىستىك قاۋىپسىزدىگى ءۇشىن قاجەتتى كاسىپورىننىڭ اشىلۋىمەن قۇتتىقتايمىن. جاڭا تسەح باتىس قازاقستاننىڭ عانا ەمەس, بۇكىل ەلىمىزدىڭ ودان ءارى دامۋىنا ۇلەس قوسادى دەپ ويلايمىن, - دەدى ءوڭىر باسشىسى.
- جاڭا تسەحتىڭ قۋاتى تاۋلىگىنە 70 تەكشەمەتر حيميالىق رەاگەنت شىعارۋعا جەتەدى. ءبىز وندىرگەن ارنايى حيميالىق قوسپالاردى مۇنايگاز ءوندىرۋشى جانە وڭدەۋشى كومپانيالار تۇتىنادى. وسى ارقىلى شەتەلدەن يمپورتتالاتىن ءونىم تۇرلەرىن ازايتىپ, قازاقستاندىق مازمۇندى بايىتا تۇسەمىز, – دەيدى «توپان» جشس-نىڭ دامۋ جونىندەگى ديرەكتورى عايسا جۇماليەۆ.
جاڭا تسەحتا قورشاعان ورتاعا زيانى جوق زاماناۋي قۇرال-جابدىق ورناتىلعان. ماماندار بىرىككەن اراب امىرلىكتەرىندە, ليۆەرپۋلدا, اقش-تا ءبىلىمىن جەتىلدىرگەن ەكەن. بولاشاقتا قازاقستاندا وندىرىلگەن حيميالىق رەاگەنت ءونىمى تمد ەلدەرىمەن قاتار الىس شەتەلدەرگە دە ەكسپورتتالۋى مۇمكىن.
سۋرەتتى تۇسىرگەن ەلۆيرا مەڭدىعالي
باتىس قازاقستان
