– بۇل يدەيا اقپان ايىنىڭ باسىندا تۋعان ەدى. «ناۋرىز مەرەكەسى تايانعاندا ءبىر-بىرىمىزگە ءوزىمىز وسىرگەن ءتىرى گۇل سىيلايىق. ول ءۇشىن قازىردەن باستاپ وسكىندەردى تامىرلاندىرىپ, ابدەن تامىر جايعاسىن ارنايى ىدىستارعا ەگىپ, باپتايىق» دەگەن باستاما كوتەردىك. بۇل يدەيانى ۇجىمنىڭ ۇلكەن-كىشىسى تۇگەل قولدادى. نەگىزى, ءوز قولىڭمەن وسىرگەن گ ۇلىڭدى اينالاڭداعى ادامدارعا سىيلاۋ – جەردىڭ ءجۇزىن گۇلدەندىرىپ, تۇرلەندىرەتىن ناۋرىز مەيرامىنىڭ تابيعاتىنا ءتان عوي. سول سەبەپتى ءبىزدىڭ ۇجىمنىڭ بۇل باستاماسى بۇقارالىق سيپات الادى دەپ سەنەمىز, – دەيدى «ورال ءوڭىرى» گازەتىنىڭ باس رەداكتورى, جازۋشى باۋىرجان عۇبايدۋللين.
ايتا كەتەيىك, شىعا باستاعانىنا عاسىردان اسقان بايىرعى گازەتتە اۋەلدەن تاتۋلىعى جاراسقان تاماشا ۇجىم قىزمەت ەتەدى. ءار اپتانىڭ جۇما كۇندەرى ارنايى داستارحان جايىپ, شەلپەك ءپىسىرىپ, وسى رەداكتسيادا قىزمەت ەتكەن اعا بۋىن جۋرناليستەردىڭ ارۋاعىنا دۇعا باعىشتايتىن ءداستۇرى دە كوپكە ۇلگى. الەمدى ابىگەرگە سالعان كوروناۆيرۋس ىندەتىنە بايلانىستى توتەنشە جاعداي كەزىندە دە ۇجىمنىڭ اۋىزبىرشىلىگى ارتا ءتۇستى. جاس ءتىلشى ءلاززات شاعاتاي ءوزى تىگىپ دايىنداعان بەتپەردەنى ارىپتەستەرىنە تەگىن تاراتىپ, جاناشىرلىق كورسەتتى.
باتىس قازاقستان
