كۇنى كەشە ۇلتتىق باسكەتبول قاۋىمداستىعىنىڭ (ۇبق) ونەر كورسەتىپ جۇرگەن كەۆين ديۋرانتتىڭ كوروناۆيرۋس دەرتىنە شالدىققانى بەلگىلى بولدى. بۇل ويىنشىعا ءبىز بەكەر توقتالىپ وتىرعان جوقپىز. 31 جاستاعى «برۋكلين نەتس» كلۋبىنىڭ شابۋىلشىسى ءبىراز جىلدان بەرى الەمدەگى ەڭ ۇزدىك باسكەتبولشىلاردىڭ ساناتىندا. ديۋرانت – ۇبق-نىڭ (2017, 2018) ەكى دۇركىن جەڭىمپازى جانە ءتورت رەت (2010, 2011, 2012, 2014) سول جارىستىڭ ەڭ ناتيجەلى ويىنشىسى اتاندى. لوندون مەن ريو وليمپيادالارىندا باس جۇلدەنى ولجالاپ, 2010 جىلعى الەم چەمپيوناتىندا توپ جاردى. 10 مارتە ۇبق-نىڭ «جۇلدىزدار ماتچىندا» ونەر كورسەتۋ قۇرمەتىنە بولەنىپ, ەكى رەت (2012, 2019) ەڭ قۇندى ويىنشى بولىپ تانىلدى. ونىڭ بويى – 206 سانتيمەتر, سالماعى – 109 كيلو.
كەيبىر دەرەك كوزدەرىنە سەنسەك, داڭقتى كەۆين ديۋرانتتان بولەك, «برۋكلين نەتستىڭ» تاعى ءۇش ويىنشىسى كورونوۆيرۋس دەرتىن جۇقتىرعان كورىنەدى. الايدا ولاردىڭ ەسىمدەرى ءالى اتالعان جوق.
