ەلىمىزدە توتەنشە جاعداي جاريالانۋىنا بايلانىستى مەملەكەتتىك شەكارا قىمتالعان سوڭ شەكارادان ءارى-بەرى وتۋشىلەر سانى شەكتەلگەن بولاتىن. وسىعان وراي رەسەي فەدەراتسياسىنىڭ 5 وبلىسىمەن شەكارالاس جاتقان باتىس قازاقستان وبلىسىندا تۇرعىندار اراسىندا كەيبىر ماسەلەدە تۇسىنبەستىك ورىن العان. اسىرەسە حالىققا قىزمەت كورسەتۋ ورتالىقتارىندا تۇرعىندار قازاقستاننىڭ شەتەلدىك تولقۇجاتىن الۋ ءۇشىن ساعاتتاپ كەزەككە تۇرۋعا ءماجبۇر. ورال قالاسى پوليتسيا باسقارماسى كوشى-قون قىزمەتىنىڭ باستىعى قانات مۇقانوۆتىڭ ايتۋىنشا, تەك سوڭعى ءۇش كۇن ىشىندە تولقۇجات راسىمدەۋ تۋرالى 600-گە جۋىق ءوتىنىش تۇسكەن.
- «تولقۇجات ارقىلى مەملەكەتتىك شەكارادان وتۋگە بولادى» دەگەن – قاتە اقپارات. قازىر قالىپتاسقان جاعدايعا بايلانىستى شەكارا جابىلدى. سوڭعى كۇندەرى شەتەلدەن ەلگە قايتاتىن ءوز ازاماتتارىمىز ىشكە كىرەدى, قازاقستانعا ۋاقىتشا كەلگەن وزگە ەل ازاماتتارى ەلىنە قايتادى, سونداي-اق ديپلوماتيالىق ميسسيا وكىلدەرى عانا شەكارادان وتكىزىلۋدە. مەديتسينالىق مەكەمەلەردىڭ جولداماسى ارقىلى ەمدەلۋ ءۇشىن باراتىندارعا دا قۇجاتتارى تەكسەرىلىپ, دالەلدەنگەن سوڭ عانا شەكارادان وتۋگە رۇقسات بەرىلەدى. باسقا جاعدايلاردا شەكارادان وتۋگە تولقۇجات كومەكتەسپەيدى. سوندىقتان حالىققا قىزمەت كورسەتۋ ورتالىقتارىندا كەزەككە تۇرىپ, جەدەل تولقۇجات الۋدىڭ قاجەتى جوق, - دەدى «ازاماتتارعا ارنالعان ۇكىمەت» مەملەكەتتىك كورپوراتسياسى» ۇاق وبلىستىق فيليالىنىڭ ديرەكتورى مارات باسساروۆ.
جالپى, حقكو-نا كەلگەن حالىقتىڭ 80 پايىزى ءتۇرلى انىقتاما الۋ ءۇشىن ءوتىنىش بەرەدى ەكەن. سوندىقتان, ورتالىقتا تۇرعىنداردىڭ كوپ جينالىپ, ىندەت قاۋپىن بولدىرماۋى ءۇشىن ورال قالاسىنىڭ 20 مەكتەبىندە ءوزىن ءوزى قامتۋ ورتالىقتارى اشىلدى. ول جەردە بىلىكتى مامان قىزمەت كورسەتەدى, حقكو-داعى بارلىق ەلەكتروندى قىزمەتتى, ياعني ءتۇرلى انىقتامالاردى الۋعا بولادى.
- «ەلەكتروندى ۇكىمەت» پورتالىنىڭ قاشىقتان كورسەتىلەتىن قىزمەتتەرىن پايدالانۋدى ۇيرەنىپ الۋ كەرەك. بۇل وتە ىڭعايلى, ءارى قازىرگى توتەنشە جاعداي كەزىندە قاۋىپسىز. مەكتەپتەگى ورتالىقتاردا ارنايى مامان سىزدەرگە بۇل قىزمەتتەردى ءبىر جولعى پارول ارقىلى قالاي الۋعا بولاتىنىن ۇيرەتەدى, كومەكتەسەدى, - دەدى مارات باسساروۆ.
بۇدان بولەك, كەشەگى كۇننەن باستاپ حالىققا قىزمەت كورسەتۋ ورتالىقتارىندا ءبىر مەزگىلدە 50 ادامنان كوپ كىسى بولماۋى قاداعالانىپ, ارنايى ءتارتىپ ەنگىزىلگەن. ياعني عيماراتقا 50 ادامنان ارتىق كىسى كىرگىزىلمەيدى. قالعانى دالادا كۇتۋگە ءماجبۇر. ودان بولەك, ورتالىق عيماراتتارىندا ءار ءۇش ساعات سايىن 20 مينۋتتىق سانيتارلىق-دەزينفەكتسيالىق تازارتۋ شارالارى وتەدى. «حقكو – حالىق كوپ جينالاتىن جەر, سوندىقتان ول جەردە دە ءبىر مەزگىلدە 50-دەن ارتىق ادام بولماۋىن رەتتەپ جاتىرمىز, ىشكە 50 ادامنان كىرگىزەمىز, قالعانى اشىق, جەلدەتىلگەن دالادا تۇرادى, بۇل قاۋىپسىزدەۋ» دەپ ءتۇسىندىردى مارات باساروۆ.
باتىس قازاقستان
