تۋردىڭ ورتالىق ويىنى «تاراز» – «ورداباسى» كلۋبتارى اراسىندا ءوتتى. وڭتۇستىك دەربيىندە فۋتبولشىلار قاقپاعا بەس گول سوقتى. ونىڭ ەكەۋى – اۆتوگول, ەكەۋى پەنالتيدەن سوعىلدى. ءبىرىنشى تايمدا «ورداباسى» ويىنشىلارى سيمچەۆيچ پەن كلەششەنكو ءوز قاقپاسىنا گول سوعىپ الدى. ەكىنشى تايم باسىندا ابزال تاۋباي «تارازدىڭ» ءۇشىنشى گولىن قاقپاعا ەنگىزسە, «ورداباسى» ساپىنان ابدۋللاي دياكاتە ەكى پەنالتيدى ءساتتى ورىنداعانىمەن, كومانداسىن جەڭىلىستەن قۇتقارىپ قالا المادى. ماتچتىڭ 68-مينۋتىندا «تاراز» ساپىنان ميحايل ميششەنكو الاڭنان قۋىلدى.
سونىمەن قاتار تۋردىڭ سەنساتسياسى قوستانايدا تىركەلدى. ۇيدەگى ويىنىن ۋاقىتشا قوستانايدا وتكىزۋگە ءماجبۇر بولعان «شاحتەر» الماتىنىڭ «قايراتىن» قابىلداپ, 1:0 ەسەبىمەن جەڭىسكە جەتتى. ماتچتاعى جالعىز گولدى «قايراتتىڭ» بۇرىنعى ويىنشىسى باۋىرجان تۇرىسبەك سوقتى. ال ەل چەمپيونى «استانا» جوعارى ليگاعا ورالعان «كاسپي» كلۋبىمەن كەزدەسىپ, 3:2 ەسەبىمەن باسىم ءتۇستى.
ەكىنشى تۋر ويىندارىنان كەيىن قازاقستاننىڭ كاسىپقوي فۋتبول ليگاسى COVID-19 كوروناۆيرۋس ينفەكتسياسىنىڭ تارالۋىنا بايلانىستى ىشكى چەمپيونات ءبىر ايعا توقتاعانىن حابارلادى. II تۋر ناتيجەلەرى: «ەرتىس» – «قىزىلجار» – 1:1, «جەتىسۋ» – «توبىل» – 0:0, «وقجەتپەس» – «قايسار» – 0:1, «تاراز» – «ورداباسى» – 3:2, «شاحتەر» – «قايرات» – 1:0, «كاسپي» – «استانا» – 2:3.
