ورال قالاسىنا قارايتىن دەركول اۋىلىندا ناۋرىزدىڭ 12-ءسى كۇنى 1988 جىلى تۋعان قىز بالا ءوز-وزىنە قول جۇمساماق بولىپ, دەركول اۋىلى اۋماعىنداعى شاعان وزەنىندەگى كوپىردەن سەكىرىپ كەتكەن. بۇل جونىندە ساعات 20:30 كەزىندە پوليتسيانىڭ «102» كەزەكشى وپەراتورىنا قوڭىراۋ تۇسكەن.
- سۋىت حابار تۇسكەن بويدا سول اۋماقتا كەزەكشىلىكتە جۇرگەن ورال قالالىق پوليتسيا باسقارماسى پاترۋلدىك پوليتسيا باتالونىنىڭ قىزمەتكەرلەرى, پوليتسيا لەيتەنانتى پاراسات جولباەۆ پەن پوليتسيا كاپيتانى ەرلان قوجاسوۆ وقيعا ورنىنا جەتەدى. اينالانى بارلاپ, سول ماڭايداعى ساياجاي قوعامى تۇرعىندارىنان قايىق سۇراستىرادى. «سۋعا ادام قۇلاپ ءتۇستى, كومەكتەسۋ كەرەك» دەگەن ساتتە اۋىل تۇرعىنىنىڭ ءبىرى قايىعىن بەرەدى, - دەيدى پوليتسيانىڭ ءباسپاسوز قىزمەتكەرى اسىلاي عۇباشەۆا.
پوليتسيا قىزمەتكەرلەرى قايىقپەن سۋ ورتاسىنا جەتكەن كەزدە بويجەتكەننىڭ دەنەسى سۋ بەتىندە قالقىپ تۇر ەكەن. ونى بىردەن كوپىر استىنداعى بەتون الاڭقايعا شىعارىپ, جاساندى تىنىس الدىرۋعا كىرىسەدى. ءسويتىپ, قىزدىڭ ءتىرى ەكەنى بىلىنگەن ساتتە ارنايى جاتتىعۋلار جاساپ, جۇتقان سۋىن شىعارادى. كوپ كەشىكپەي قۇتقارۋشىلار جاساعى مەن جەدەل جاردەم دە كەلىپ جەتەدى. بويجەتكەندى قايىققا سالىپ, جاعاعا دەيىن جەتكىزىپ, دارىگەرلەردىڭ قولىنا تاپسىرادى.
قازىرگى ۋاقىتتا قىزدىڭ جاعدايى ءبىر قالىپتى. ايتا كەتەيىك, ورالدىق پوليتسيا قىزمەتكەرلەرى بۇعان دەيىن دە ەكى مارتە ءدال وسىنداي جاعدايدا سۋيتسيد جاساماق بولعان قىزداردى قۇتقارعان بولاتىن.
باتىس قازاقستان
