مۇنىڭ ىشىندە قىلمىس جاساعاندار عانا ەمەس, جول ءتارتىبىن بۇزۋشىلار, كوشە ەرەجەسىن ەلەمەۋشىلەر, جولدى بەلگىلەنبەگەن جەردەن كەسىپ وتۋشىلەر دە كوپ. وسىنىڭ ءوزى قالا تۇرعىندارى اراسىندا كوشە مادەنيەتىنىڭ تومەن ەكەندىگىنىڭ بەلگىسى. بۇل - مەكتەپ جانە باسقا دا وقۋ ورىندارىنىڭ بالالار مەن جاسوسپىرىمدەرگە كوشە مادەنيەتىن ەگۋ دارەجەسىنىڭ ناشار دەڭگەيىن كورسەتەدى. وكىنىشكە قاراي, ەرەسەكتەر اراسىندا دا قالا مادەنيەتىنىڭ تومەندىگى بايقالىپ قالادى. بىردە بىرەۋ ءدال الدىمىزدا كەتىپ بارا جاتقان جۇك ماشيناسى تەرەزەسىنەن جىرتىلعان پاكەتتى لاقتىرا سالدى. ونىڭ ويىنشا كوشە-دالا, ال دالاعا بارلىق قوقىستى لاقتىرا سالۋعا بولادى. مىنە, وسىنىڭ ءوزى مۇنداي جۇرگىزۋشىگە كوشە مادەنيەتى مۇلدە تانىستىرىلماعانىنىڭ بەلگىسى. ءتىپتى, اشىق دالاعا دا قوقىستى كەز كەلگەن جەرگە تاستاي سالۋعا بولمايدى عوي. وندايدان بۇل جۇرگىزۋشى مۇلدە بەيحابار ەكەنى سەزىلىپ تۇر. جۇرگىزۋشى كۋالىگىن بەرەردە جول پوليتسياسى جول تارتىبىمەن قاتار كوشە مادەنيەتى جونىندە دە سۇراقتار بەرۋى كەرەك سياقتى. سوندا تىم بولماسا قالادا ءجۇرۋدىڭ, كوشە مادەنيەتىنەن كەيبىر جۇرگىزۋشىلەر حابار العان بولار ەدى.
تەك قاتاڭ تالاپ قانا ءبىزدىڭ ادامدارىمىزعا كوشە مادەنيەتىن ورنىقتىرا الادى. ءبىر جىلدارى نۇر-سۇلتان قالاسىندا ارناۋلى جەر ەمەس, كوشەنىڭ كەز كەلگەن جەرىندە تەمەكى بۇرقىراتقانى ءۇشىن ايىپپۇل سالىناتىن. سونىڭ ارقاسىندا كوشەدە تەمەكى قالدىعى مۇلدە ازايعاندىعى ايتىلىپ ەدى. وسى ءتارتىپتى بارلىق وبلىس ورتالىقتارى دا قولعا العانى ءجون.
جوعارىدا پەتروپاۆل قالاسىنداعى ءبىز ايتقان پاترۋلدىك پوليتسيا انىقتاعان 4400 قۇقىق بۇزۋشىلىقتىڭ ىشىندەگى 49-ى–قىلمىس. ولار ءتيىستى پوليتسيانىڭ ءتيىستى بولىنىستەرىنە بەرىلىپ, قازىر سوتقا دەيىنگى تەرگەپ-تەكسەرۋ جۇمىستارى جۇرگىزىلۋدە. جالپى, قىزىلجاردا تاۋلىك بويى 90-نان اسا پاترۋلدىك پوليتسيا كەزەكشىلىككە تارتىلادى. ولار 10 اۆتوپاترۋلدىك كولىكپەن, 6 «مودۋل» بەكەتى, قالعاندارى جاياۋ جاساقتار تۇرىندە پاترۋلدىك قىزمەتتەر اتقارادى. بىراق قالا ءتارتىبىن وسى قىزمەتتىڭ باقىلاۋىنا عانا بەرىپ قويۋعا بولمايدى. جەرگىلىكتى بيلىك تاراپىنان قالالىقتاردىڭ مادەنيەتىن ارتتىرۋ شارالارى قولعا الىنباسا, كۇنىنە 200 پاترۋل شىعارساڭ دا قۇقىق بۇزۋشىلىقتى قۇرىقتاي المايسىڭ.
پاترۋلدىك پوليتسيا باتالونى كومانديرىنىڭ ورىنباسارى, پوليتسيا پودپولكوۆنيگى بولات جۇماعازين اشىلعان قىلمىستاردىڭ باسىم بولىگىن ۇرلىق قۇرايتىنىن ايتتى. ساياجايلار مەن كولىكتەردى توناۋ, بۇزاقىلىق فاكتىلەرى بويىنشا قىلمىسكەرلەردى پاترۋلدىك پوليتسەيلەر ء«ىزىن سۋىتپاي» ۇستايدى ەكەن. جول قاۋىپسىزدىگى جەلىسى بويىنشا بۇزۋشىلىقتار كوپ جاعدايدا جاياۋ جۇرگىنشىلەر تاراپىنان جاسالادى, سونداي-اق جۇرگىزۋشىلەردىڭ قاۋىپسىزدىك بەلدىگىن تاقپاۋى مەن جول ءجۇرىپ كەلە جاتىپ رولدە تەلەفونمەن سويلەسۋى سياقتى بۇزۋشىلىقتار دا ءجيى ورىن بولىپ جاتادى. سونداي-اق قوعامدىق ءتارتىپتى بۇزۋشىلار اراسىندا ماساڭ كۇيدە جۇرگەن, اباتتاندىرۋ ەرەجەلەرىن بۇزعان جانە ۇساق بۇزاقىلىق جاساعاندارعا قاتىستى حاتتامالار ءجيى تولتىرىلادى.
دەمالىس جانە مەرەكە كۇندەرى پاترۋلدىك پوليتسەيلەر ۋچاسكەلىك پوليتسيا ينسپەكتورلارىمەن جانە پوليتسيا كەشەندى كۇشتەرىنىڭ باسقا دا جاساقتارىمەن بىرگە قىزمەتتى كۇشەيتىلگەن رەجىمدە وتكەرگەن. سونىڭ ارقاسىندا وتكەن مەرەكە كۇندەرى قالا تۇرعىندارى مەن قوناقتارىنىڭ تىنىشتىعى, قاۋىپسىزدىگى قامتاماسىز ەتىلگەن.
ايتا كەتەتىن جايت, وبلىستىق پوليتسيا دەپارتامەنتى شتابىنىڭ اقپاراتىنا قاراعاندا مەرەكە كۇندەرى (7-9 ناۋرىز كۇندەرى) پەتروپاۆل قالالىق جەدەل باسقارۋ ورتالىعىنىڭ «102» نومىرىنە 1369 ءتۇرلى حابارلاما كەلىپ تۇسكەن. ونىڭ ىشىندە 34 – قىلمىستىق, 95 - اكىمشىلىك قۇقىق بۇزۋشىلىق, 166 – ءتۇرلى وقيعالار, سونداي-اق انىقتاما سيپاتىنداعى 1000 قوڭىراۋ كەلىپ ءتۇستى. قالالىق جەدەل باسقارۋ ورتالىعىنىڭ بەينەباقىلاۋ كامەرالارىنىڭ كومەگىمەن قىلمىستىڭ اشىلۋىنا ىقپال ەتكەن 4 فاكتى انىقتالىپ, 129 اكىمشىلىك قۇقىق بۇزۋشىلىق تىركەلگەن.
سولتۇستىك قازاقستان وبلىسى
