سقو تج دەپارتامەنتى باستىعىنىڭ جاڭادان تاعايىندالعان ورىنباسارى, مايور يگور جۋكوۆ سۋ تاسقىنىنا ۇشىراۋ مۇمكىندىگى جوعارى ايىرتاۋ, ەسىل, ع.مۇسىرەپوۆ, تيميريازەۆ جانە شال اقىن اۋداندارىنىڭ ەلدى مەكەندەرىن ارالادى. وسى ءىس-شارا دەپارتامەنتتىڭ بۇرىنعى ورىنباسارى, قازىر تۇركىستان وبلىسىنىڭ وسىنداي قىزمەتىنە اۋىسقان پودپولكوۆنيك ەرىك سارىباەۆتان جۇمىستى قابىلداۋ-تاپسىرۋ شەڭبەرىندە ءوتتى. ەرىك تەمىرحان ۇلى بۇرىن ءوزى جەتەكشىلىك ەتكەن تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ ماسەلەلەرىن يگور جۋكوۆقا تانىستىرىپ, جەرگىلىكتى اتقارۋشى ورگاندار جانە ازاماتتىق قورعاۋ قىزمەتتەرىمەن بىرلەسىپ جۇرگىزىلىپ جاتقان سۋ تاسقىنىنا قارسى ءىس-شارالارمەن تانىستىردى. تانىسۋ بارىسىندا ي.جۋكوۆ وزدەرىنىڭ ەڭ باستى مىندەتى ەلدى مەكەندەردى سۋ باسۋىنا جول بەرمەي, حالىقتى قورعاۋعا قابىلەتتى بولۋ ەكەنىن اتاپ ءوتتى. «ەڭ باستىسى - تۇرعىن ۇيلەردى جانە اۋلا قۇرىلىستارىن سۋ باسۋعا جول بەرمەي اۋىل تۇرعىندارىنىڭ قالىپتى تىرشىلىك ارەكەتىن قامتاماسىز ەتۋ», - دەدى ول سەرگەەۆ سۋ تورابىن كوزبەن شولىپ قاراۋ كەزىندە.
سونىمەن بىرگە تج وفيتسەرلەرى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ بولىمدەرىن ارالاپ, بولىمدەرگە بارىپ, جەكە قۇرامىمەن تانىستى جانە ولاردىڭ اسكەري-قىزمەتتىك ءتارتىبى مەن الەۋمەتتىك-تۇرمىستىق جاعدايىنىڭ جاي-كۇيىن باعالادى, تەحنيكا مەن قارۋ-جاراقتىڭ, ونىڭ ىشىندە تاسقىنعا قارسى ءىس-شارالاردى وتكىزۋگە جۇمىلدىرىلعان دايىندىعىن, ءورت ءسوندىرۋشى-قۇتقارۋشىلاردى وقىتۋ پروتسەسىن تەكسەردى.
