اتالعان ورتالىق مينيسترلىكتىڭ باستاماسىمەن «بولاشاققا باعدار: رۋحاني جاڭعىرۋ» باعدارلاماسىنىڭ اياسىندا ۇلتتىق مۋزەيدىڭ جانىنان قۇرىلدى.
مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆانىڭ ايتۋىنشا, بيىل مينيسترلىكتىڭ باستاماسىمەن ءتورت ورتالىق اشىلعان. العاشقى ورتالىق شەت ەلدەر مەن ءوز ەلىمىزدە كونتسەرتتىك جۇمىستاردى ۇيىمداستىرۋ ءۇشىن قۇرىلىپ, جۇمىسىن باستاپ كەتكەن. ەكىنشى ورتالىق تەاتر سالاسى بويىنشا جۇمىستار اتقارۋدا. ءۇشىنشى ورتالىق «تۋعان جەرگە تاعزىم» دەگەن اتپەن اشىلىپ, كىتاپحانالار قورىنداعى كىتاپتارمەن جۇمىس ىستەۋدى قولعا الماق. ال ءتورتىنشىسى جوعارىدا اتالعان «قازاقستان مۋزەيلەرىن دامىتۋ بويىنشا ۇيلەستىرۋ-ادىستەمەلىك ورتالىعى».
ءىس-شارادا ۇلتتىق مۋزەي ديرەكتورىنىڭ ورىنباسارى ايبار قاسەنالى: «قازىرگى تاڭدا قازاقستان مۋزەيلەرىندە ادىستەمەلىك ءارى ۇيلەستىرۋشىلىك فۋنكتسياسى بار ەشقانداي ورتالىق جوق. مادەنيەت جانە سپورت مينيسترلىگى ءوزىنىڭ قۇزىرەت شەڭبەرىندە عانا قىزمەت اتقارىپ كەلەدى. جالپى مۋزەيلەرگە ادىستەمەلىك تۇرعىدان, دامىتۋ بويىنشا نۇسقاۋلىق رەتىندە باعىت كورسەتىپ وتىراتىن ۇيىم كەرەگى انىق. وسى ماسەلەلەرگە بايلانىستى اتالعان ورتالىق قۇرىلىپ وتىر», دەدى.
ءىس-شارا بارىسىندا ورتالىقتىڭ مىندەتى بولىپ تابىلاتىن مەملەكەتتىك مۋزەيلەردەگى قازىرگى زامان تالابىنا سايكەس حالىقتىڭ ءتۇرلى ساناتىنا باعىتتالعان مادەني تۋريزم, ولكەتانۋ جانە ەكسكۋرسيالىق جۇمىستاردى دامىتۋ, مەملەكەتتىك مۋزەيلەردى كەلۋشىلەردى تارتۋ جونىندەگى ادىستەمەلىك قۇرالدارمەن قامتاماسىز ەتۋ, مۋزەيلەردەگى كورسەتىلەتىن قىزمەتتەردىڭ ساپاسىن جەتىلدىرۋ, مۋزەي قىزمەتكەرلەرىنىڭ بىلىكتىلىگىن ارتتىرۋ باعدارلامالارىن ازىرلەۋ جانە بىلىكتىلىكتى ارتتىرۋ شارالارىن ۇيىمداستىرۋ ماسەلەلەرى تالقىلاندى.
جالپى, ەلىمىزدەگى مۋزەيلەردىڭ ءبىر بولىگىنىڭ مارتەبەسى رەسپۋبليكالىق بولسا, قالعاندارىنىكى وبلىستىق ەكەنى بەلگىلى. رەسپۋبليكالىق مۋزەيلەر مادەنيەت جانە سپورت مينيسترلىگىنە, ال وبلىستىق مۋزەيلەر وبلىستىق اكىمدىككە باعىنىشتى. بۇل تۇرعىدان العاندا ەلدەگى مۋزەيلەر تۋرالى بۇكىل اقپاراتتى ءبىر ورتالىققا شوعىرلاندىرۋ ماڭىزدى بولسا كەرەك. جاڭادان اشىلعان ورتالىقتىڭ مىندەتتەرىنىڭ ءبىرى دە وسى بولماق. ياعني ەلدەگى بۇكىل مۋزەيلەردىڭ جۇمىسىنا مونيتورينگ جاساۋ, كەمشىن تۇستارىن انىقتاعان سوڭ ونى دامىتۋ بويىنشا ۇسىنىستار جاساۋدى دا ورتالىق قولعا الماق.
