ايماقتار • 05 ناۋرىز، 2020

تەننيس: قازاقستان مەن نيدەرلاند قۇرامالارى كۇش سىناسادى

29 رەتكورسەتىلدى

جۇما جانە سەنبى كۇندەرى نۇر-سۇلتاندا تەننيستەن دەۆيس كۋبوگىنىڭ ىرىكتەۋ سايىسىندا قازاقستان مەن نيدەرلاند قۇرامالارى كۇش سىناسادى. وسى شەشۋشى سىندا جەرلەستەرىمىزگە قارسىلاس اتانىپ وتىرعان كوماندا جايىندا ءبىز نە بىلەمىز؟

قىزعالداقتار ەلىنىڭ وكىلدەرى دەۆيس كۋبوگىندا وتكەن عاسىردىڭ جيىرماسىنشى جىلدارىنان بەرى باق سىناپ كەلەدى. سول ارالىقتا ولار 166 كەزدەسۋ وتكىزدى. 74 رەت جەڭىسكە جەتىپ، 92 باسەكەدە قارسىلاستارىنا ەسە جىبەردى. ەڭ ۇزدىك ناتيجەگە 2001 جىلى قول جەتكىزدى. ايتۋلى جارىستىڭ باستاپقى باسەكەلەرىندە نيدەرلاندىقتار يسپانيا مەن گەرمانيانى قاپى قالدىردى. بۇل سايىستاردىڭ ەكەۋىندە دە 4:1 ەسەبى تىركەلدى. بىراق جارتىلاي فينالدا اسا مىقتى فرانتسيا قۇراماسىنا ەسە جىبەردى. ەسەپ – 2:3.  

بىلتىرعى جىلدىڭ قاراشا ايىندا يسپانيانىڭ باس شاھارى – مادريدتە وتكەن دەۆيس كۋبوگىنىڭ فينالدىق كەزەڭىندە قازاقستان مەن نيدەرلاند قۇرامالارى ءبىر توپقا تۇسكەن ەدى. قوس كوماندا اراسىنداعى تارتىس 2:1 ەسەبىمەن وتانداستارىمىزدىڭ پايداسىنان شەشىلدى. جەكەلەگەن سايىستارعا توقتالاتىن بولساق، ميحايل كۋكۋشكين بوتيك ۆان دە ءزاندشۋلپتى ۇتسا، الەكساندر بۋبليك روبين حااسەگە ەسە جىبەردى. ال جۇپتىق باسەكەدە ءبىزدىڭ جىگىتتەر قارسىلاستاردىڭ ۋىسىنان جەڭىستىڭ ج ۇلىپ اكەتتى. الايدا ايتۋلى كوماندانىڭ ەكەۋى دە شەشۋشى تۇستا ۇلىبريتانياعا جول بەرىپ، شيرەك فينالعا شىعا المادى. 

نۇر-سۇلتانداعى دودادا نيدەرلاندتىڭ تۋى استىنا روبين حااسە، بوتيك ۆان دە زاندشۋلپ، تاللون گريكسپۋر، جان-جۋلەن رويەر جانە ۋەسلەي كۋلحوف سىندى ويىنشىلار ونەر كورسەتەدى. بۇگىنگى تاڭدا بۇل ەلدىڭ بىردە-ءبىر وكىلى «توپ-150» تەننيسشىسى قاتارىندا جوق. بۇل جاعداي ايتۋلى كوماندانىڭ اسا ازۋلى ەمەس ەكەنىن اڭعارتىپ تۇرعانداي.

قازىرگى كەزدە نيدەرلاند قۇراماسى ساپىنداعى ويىنشىلار اراسىندا ەڭ ۇزدىك ناتيجە روبين حااسەگە تيەسىلى. اتر رەيتينگىندە 162 ورىندا تۇرعان 32 جاستاعى گااگە قالاسىنىڭ تۋماسى كەزىندە 32 ساتىعا (2012 جىلى) دەيىن جوعارلاعان. ول «ۇلكەن دۋلىعا» ساناتىنداعى تۋرنيرلەردىڭ العاشقى ەكى-ءۇش اينالىمىنان اسا الماعانىمەن، جۇپتىق سايىستا اۋستراليانىڭ اشىق بىرىنشىلىگىنىڭ فينالىنا (2013) دەيىن جەتتى. 

قىزعالداقتار ەلىنىڭ ەكىنشى راكەتكاسى، 24 جاستاعى بوتيك ۆان دە زاندشۋلپ ۇزدىكتەر تىزىمىندە 171 ورىنعا جايعاسسا، 23 جاستاعى تاللون گريكسپۋر 199 ساتىعا تابان تىرەدى. ال جان-جۋلەن رويەر مەن ۋەسلەي كۋلحوفتىڭ جەكەلەگەن رەيتينگتەرى تومەن بولعانىمەن، ولار جۇپتىق سايىستىڭ حاس شەبەرلەرى ەكەنىن جانكۇيەرلەر جاقسى بىلەدى. ماسەلەن، رويەر ۋيمبلدون (2015) پەن اقش-تىڭ اشىق بىرىنشىلىگىندە (2017) جەڭىمپاز اتانىپ، رولان گارروسپەن اۋستراليانىڭ اشىق بىرىنشىلىگىندە ەكى رەت جارتىلاي فينالدا ونەر كورسەتتى. سونىمەن قاتار، ول اتر تۋرنيرلەرىندە 29 مارتە توپ جاردى. ال كۋلحوف بولسا، ءدۇبىرلى دودالاردا بەس رەت دارا شىقتى.

مىنە، نۇر-سۇلتاندا جەرلەستەرىمىز وسى كوماندامەن كۇش سىناسادى. بۇل ماتچتا قازاقستان قۇراماسى ساپىندا الەكساندر بۋبليك، ميحايل كۋكۋشكين، اندرەي گولۋبەۆ، دميتري پوپكو جانە الەكساندر نەدوۆەسوۆ ونەر كورسەتەدى. وسى مەملەكەت اراسىنداعى تارتىستا جەڭىسكە جەتكەن كوماندا دەۆيس كۋبوگىنىڭ فينالدىق تۋرنيرىنە جولداما الادى.

سوڭعى جاڭالىقتار

ەرتەڭ قىزىلوردادا كۇن كۇرت ىسيدى

ايماقتار • بۇگىن، 17:22

اقمولادا 3 ادام سۋعا كەتتى

ايماقتار • بۇگىن، 13:42

ۇقساس جاڭالىقتار