«جەتى مۇشەل بۇرىن جارىق كورگەن بۇل گازەتتەر الىستاعى اۋىلدا قالايشا ءمىنى قۇراماي ساقتالىپ قالعان؟» – قاراپايىم اۋىل مۋزەيىندەگى قۇندى جادىگەردى كورگەن ادامنىڭ ويىنا ەڭ الدىمەن كەلەتىن ساۋال وسى.
- وسىدان بىرەر جىل بۇرىن جانىبەك اۋدانى ورتالىعىندا ورنىنا جاڭا ءۇي تۇرعىزۋ ءۇشىن ءبىر كونە عيماراتتى يەسى بۇزعان بولاتىن سول كەزدە ەسكى ەسىكتىڭ تاقتايلارى اراسىنان ءبىر بۋما گازەت شىققان ەكەن. ونى ءبىزدىڭ كىتاپحاناشىمىز لاۋرا ايۋپوۆا كورىپ قالىپ, اتتاي قالاپ سۇراپ العان ەدى. سودان بەرى ءبىزدىڭ مۋزەيدىڭ ەڭ باعالى بۇيىمدارىنىڭ ءبىرى رەتىندە كورمەدە تۇر, - دەيدى مەكتەپ ديرەكتورى سەرىك سيداعاليەۆ.
لاتىن ارپىمەن شىققان «سوتسياليستىك قازاقستان» گازەتىنىڭ 1938 جىلعى قاراشا ايىنداعى №254, 259, 261, 262, 263, 264, 267, 268, 269, 286 ساندارى سول كۇيىندە ب ۇلىنبەي ساقتالعان. بۇل كەزەڭ كسرو-دا گازەت باسۋ ءىسى بارىنشا جولعا قويىلعان, گازەتتىڭ ءار سانىندا فوتوسۋرەت باسىلعان, «حالىق جاۋلارىنىڭ» قالىڭ توبىن قاۋساتىپ ۇلگەرىپ, سوتسياليستىك دامۋدىڭ ۇراندى جولىنا تۇسكەن الاساپىران ۋاقىت ەدى. سارعايعان پاراقتاردان سول زاماننىڭ لەبى ءالى ەسىپ تۇرعانداي...
بۇل گازەتتەردى ەسىكتىڭ قۋىسىنا كىم تىققانى دا بەلگىسىز. تەك ءبىر گازەتتىڭ سىرتىندا كارانداشپەن «دەتدوم» دەپ جازىلىپتى. شاماسى كونە عيمارات سول كەزدە جەتىم بالالاردى پانالاتقان قازىنا ءۇيى بولسا كەرەك.
بۇگىنگى تالوۆ اۋىلى – بۇرىنعى ىشكى قازاق ورداسى – بوكەيلىككە قاراعان تالوپكە قيسىمىنىڭ اۋماعىندا جاتىر. اقىن-اعارتۋشى عۇمار قاراشتى جاۋلارى قىلىشتاپ ولتىرگەن قۇنانشاپقان اۋىلدىڭ ىرگەسىندە. 5 شاقىرىمدا مەملەكەتتىك شەكارا – رەسەي فەدەراتسياسى باستالادى. بەلگىلى دارىگەر, وباعا قارسى كۇرەسۋشى ءماجيت شومبالوۆتىڭ اتاقونىسى دا وسى وڭىردە. وسىنداي تاريحي اۋىلدا مەكتەپ مۇراجايى وسىدان ءدال 10 جىل بۇرىن – 2010 جىلى اشىلعان بولاتىن. بۇگىندە مۇندا 200-ءدىڭ ۇستىندە جادىگەر جيناقتالعان. مەكتەپ وقۋشىلارى ەل مەن جەر تاريحىنا جەتىك, پاتريوت بولىپ ءوسىپ كەلەدى.
باتىس قازاقستان
