مەرەيتويدى رەسمي تۇردە اتاپ ءوتۋ كۇز ايلارىنا قالدىرىلعانىمەن وسى جىلداردا وبلىستىق ارناعا ەڭبەك سىڭىرگەن ارىپتەستەر ءبىرىن-ءبىرى قۇتتىقتاپ, جۇمىس ورنىنداعى قىزىقتى دا, قۋانىشتى جىلدار مەن كۇندەردى ەسكە الۋدا.
قازىر تالانتتى مەنەدجەر ەرلان توقشىلىق باسقاراتىن بۇل ۇجىمنىڭ سولتۇستىكتىڭ ونەرى مەن مادەنيەتىن دامىتۋعا قوسقان ۇلەسى زور. رەسپۋبليكالىق كونكۋرستارعا دا ءجيى قاتىسىپ, جۇلدە الىپ جۇرەدى. اسىرەسە, ءوڭىردىڭ جاڭالىقتارى مەن ەكونوميكالىق دامۋ وزگەرىستەرىن حالىققا الدىمەن وسى ۇجىمنىڭ ماماندارى جەتكىزەدى.
كەزىندە مۇندا ءوزىمىز بىلەتىن شەبەر جۋرناليستەر اراسىنان دۇيسەنبى اۋەلبەكوۆ, جاراسباي سۇلەيمەنوۆ, سابىرجان ءابىلماجىنوۆ, كاميلا مۇقاشەۆا, نىعمەت ابەنوۆ, رايسا بەكمۇحامەتوۆا, ۆلاديمير حارين, الەكساندر يارەمچۋك جانە ت.ب. ۇزاق جىلدار بويى قىزمەت اتقارعان ەدى. تەلەۆيدەنيەنىڭ ديكتورى بۇركىت بەكماعامبەتوۆتىڭ تالانتى رەسپۋبليكا كولەمىندە باعالانىپ, ول قازاق راديوسىنا قىزمەتكە اۋىسقان. ال ۆلاديمير سپيريدونوۆ, راحيما جۇماباەۆا سياقتى ديكتورلار ماسكەۋدەگى ورتالىق تەلەديداردان تاعىلىمدامادان وتكەن ەدى. رەجيسسەرلەر اراسىنان بايان بايمۇحامبەتوۆا, كۇننار قابدوشەۆا, ەلەنا بوگدانوۆا, ءلاززات ابىشەۆا جانە تاعى باسقالار ءوز ىستەرىن جەتىك مەڭگەرگەن ماماندار بولاتىن. دىبىس رەجيسسەرلەرى اراسىنان اتاقتى ءانشى كاميلا الىباەۆانى ەرەكشە اتاۋعا بولادى.
ەلىمىز تاۋەلسىزدىگىن العان, ەكونوميكالىق قيىنشىلىق جىلدارىندا ۇجىمدى بەلگىلى اقىن ءمۇتاللاپ قانعوجين باسقاردى. ول مۇندا وتىز جىلدان ارتىق ەڭبەك ەتكەن. ودان كەيىن تۆ-عا قازىرگى ءماجىلىس دەپۋتاتى كارىباي مۇسىرمان باسشىلىق ەتتى. ءسويتىپ, بۇل ۇجىم ءوز ارالارىنان ج.سۇلەيمەنوۆ پەن ك.مۇسىرمان سياقتى ەكى بىردەي پارلامەنت دەپۋتاتىن شىعارعان.
قازىر ۇجىم رەسپۋبليكالىق قازاقستان تەلەارناسىنىڭ سولتۇستىك قازاقستان وبلىستىق «قىزىلجار» ترك دەپ اتالادى. وسىنداي بەرەكەلى ۇجىمعا جاڭا شىعارماشىلىق تابىستار تىلەيمىز.
