الماتى قالاسى اكىمدىگى مەن تۇرعىن ءۇي قۇرىلىس جيناق بانكىنىڭ بىرلەسكەن جوباسىنا 35 جاسقا دەيىنگى الماتىلىقتار قاتىسا الادى. وتىنىمدەر الماتى قالاسىنداعى مەملەكەتتىك قالالىق جانە رەسپۋبليكالىق ۇيىمداردا قىزمەت ەتەتىن كەلەسى ازاماتتاردان قابىلدانادى:
- دارىگەرلەر مەن مەدبيكەلەر;
- پەداگوگتار مەن تاربيەشىلەر;
- ارتىستەر, جازۋشىلار, مادەنيەت سالاسىنىڭ قىزمەتكەرلەرى;
- باپكەرلەر مەن سپورتشىلار;
- جوو مەن عىلىمي ينستيتۋتتاردىڭ وقىتۋشىلارى مەن عىلىمي قىزمەتكەرلەرى;
- الەۋمەتتىك سالا قىزمەتكەرلەرى;
- وندىرىستىك قىزمەتپەن اينالىساتىن باق قىزمەتكەرلەرى مەن جۋرناليستەر(مەملەكەتتىك جانە كوممەرتسيالىق).
«الماتى جاستارىنا» قاتىسۋشىلاردىڭ رەسمي جۇمىس ءوتىلى سوڭعى التى ايدان كەم بولماۋى ءتيىس. ءوزىن-ءوزى جۇمىسپەن قامتىعان مادەنيەت سالاسىنىڭ وكىلدەرى ءۇشىن كەمىندە جارتى جىل بويى الماتى قالاسىندا جەكە كاسىپكەر رەتىندە تىركەلۋ مىندەتتى.
-«الماتى جاستارى» باعدارلاماسى قالا اكىمدىگىمەن بىرلەسكەن جەمىستى جۇمىستىڭ كورنەكتى مىسالى. قالالىق تۇرعىن ءۇي باعدارلاماسى العاش رەت 2017 جىلى باستالىپ, ۇلكەن سۇرانىسقا يە بولدى. ەكى جىل ىشىندە وسى جوبا اياسىندا 1 383 ءوتىنىم قابىلداندى. ءبىز قالالىق بيلىك وكىلدەرىمەن 2,2 ملرد تەڭگە سوماسىنا قالانىڭ 240 جاس تۇرعىنىن باسپانامەن قامتاماسىز ەتتىك. بيىل باعدارلامانىڭ جۇزەگە اسىرىلۋىنا قالالىق بيۋدجەتتەن 10 ملرد تەڭگە جانە تۇرعىن ءۇي قۇرىلىس جيناق بانكىنىڭ بيۋدجەتىنەن 3 ملرد تەڭگە بولىنەدى. بۇل قاراجات 1 000 الماتىلىق تۇرعىننىڭ باسپانا ماسەلەسىن شەشۋگە مۇمكىندىك بەرەدى, - دەپ اتاپ ءوتتى تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا.
www.almaty-zhastary.kz سايتىندا وتىنىمدەردى قابىلداۋ اياقتالعاننان كەيىن, الماتى قالاسىنىڭ تۇرعىن ءۇي باسقارماسى 20 جۇمىس كۇنى ىشىندە ۇمىتكەرلەر تىزىمىمەن قوسا, ولاردىڭ وتكىزگەن قۇجاتتارىنىڭ دۇرىستىعىن تەكسەرىپ, جيناعان بالل سانىنا قاراي باعدارلاماعا قاتىسۋشىلاردى تاڭدايتىن بولادى. وعان نەكەدە قانشا جىل تۇرعاندىعى, بالالارىنىڭ بار ەكەندىگى, كاتەگوريا بويىنشا ۇزدىكسىز جۇمىس ءوتىلىنىڭ مەرزىمى, حالىقتىڭ الەۋمەتتىك-ءالسىز توبىنا جاتاتىندىعى اسەر ەتەدى.
پۋل قۇرىلعاننان كەيىن, قاتىسۋشىلاردىڭ بارلىعىنا تۇرعىن ءۇي قۇرىلىس جيناق بانكىندە نەسيە راسىمدەۋ ءۇشىن جولداما بەرىلەدى. بۇل جولداما 15 جۇمىس كۇنى ىشىندە جارامدى. تۇرعىن ءۇيدى ىزدەپ-تابۋعا بانك ەكى اي ۋاقىت بەرەدى. پاتەردى جاڭا جانە قولدانىستاعى ۇيدەن الۋعا بولادى.
ونى ساتىپ الۋ ءۇشىن تۇرعىن ءۇي قۇرىلىس جيناق بانكى 13 ملن تەڭگە كولەمىندە ماكسيمالدى سومانى نەسيەگە بەرەدى. باستاپقى جارنا كەمىندە 10%-دى قۇراۋى ءتيىس. نەسيە بويىنشا پايىزدىق مولشەرلەمە - جىلدىق 5%.
ماسەلەن, قۇنى 13 ملن تەڭگەلىك پاتەردى ساتىپ الار كەزدە زايم بويىنشا تولەم العاشقى 8 جىلدا 101 967 تەڭگەگە, ال قالعان 11 جىل ىشىندە ازايىپ, 54 100 تەڭگەگە تەڭ بولادى. الەۋەتتى ۇمىتكەرلەردىڭ تولىق تىزىمىمەن www.almaty-zhastary.kz سايتىنان بىلۋگە بولادى.
