ناۋرىزدىڭ 6-7 كۇندەرىندە جۇرەتىن گالا-بالەتكە كلاسسيكالىق مۇراعا جاتقىزىلعان سپەكتاكل ۇزىندىلەرىمەن قاتار, نەوكلاسسيكالىق قويىلىمدار دا ەنىپ وتىر. ءبىرىنشى بولىمدە ايگىلى «كورسار» بالەتىنەن «جايقالعان باق» ساحناسى, «شەرتكىش», «اققۋ كولى», «كۇلشە قىز», «ماحاببات تۋرالى اڭىز» جانە «Silent Voices» بالەتتەرىنەن ءۇزىندى كورسەتىلەدى. عاجايىپ پلاستيكا ءتىلىنىڭ قۇدىرەتىمەن ادام بالاسىنىڭ سەزىمى, ارمانى مەن ءۇمىتى جايلى وقيعالار باياندالادى.
«مۇنداي كورسەتىلىمدەر ءبىزدىڭ سوليستەرىمىز ءۇشىن وتە ماڭىزدى ءارى پايدالى. سەبەبى, ولار وسى ارقىلى ءوزىنىڭ شىعارماشىلىعىن پاش ەتە الادى. ءبىر جاعىنان, بۇل ولاردىڭ ءوز مۇمكىندىكتەرىن تاعى ءبىر تەكسەرۋىنە, جالپى, وسۋىنە دە سەپتىگىن تيگىزبەك», – دەيدى «استانا بالەت» تەاترىنىڭ باس بالەتمەيستەرى مۋكارام اۆاحري.
ەكىنشى بولىمدە برازيليالىق حورەوگراف ريكاردو امارانتەنىڭ«A FuegoLento» («باياۋ جالىن») ءبىر اكتىلى بالەتى كورسەتىلمەكشى. زاماناۋي حورەوگرافيا تىلىمەن برازيليالىق حورەوگراف ماحاببات سەزىمىنە العاش ەلىتكەن تۇستا بويىڭىزدى بيلەگەن ۇرەي, ءتانىڭىزدى جاۋلاعان قۋانىش سەزىمى مەن ىشتە جالىنداي لاۋلاعان قۇشتارلىق سەزىمىن سۋرەتتەيدى. سەزىمتال تانگو ءبيىنىڭ ىرعاعىمەن اۋەلەگەن, ىنتىق سەزىمگە تولى ساحنالار ەشبىر كورەرمەندى بەي-جاي قالدىرماس.
سونداي-اق ناۋرىز ايىندا «استانا بالەت» تەاترى اباي قۇنانباەۆتىڭ 175 جىلدىق مەرەيتويى اياسىندا اتىراۋ جانە سەمەي قالالارىندا ونەر كورسەتەدى.
