سۋرەتتى تۇسىرگەن نۇربەك ورازاەۆ
– ءبىر عاسىردان ارتىق تاريحى بار «ورال ءوڭىرى» گازەتىنىڭ ۇجىمى ءبىراز جىلدان بەرى قالىڭ قار مەن مۇز استىندا قالعان بالىقتار دۇنيەسىنە وتتەگىن جىبەرۋ شاراسىن تۇراقتى وتكىزىپ ءجۇر. ونىڭ ۇستىنە ەلوردادا پرەزيدەنت قاسىم-جومارت توقاەۆ بيىلعى ۆولونتەرلەر جىلىن رەسمي اشىپ, رەسپۋبليكانىڭ تۇكپىر-تۇكپىرىنەن جينالعان ۆولونتەرلەرمەن كەزدەستى عوي. ءبىز دە بيىلعى شارامىزدى وسى كۇنگە ورايلاستىردىق. رەداكتسيانىڭ ونشاقتى جىگىتى ارنايى كەلىپ, مۇزعا ويىق ويدىق, – دەيدى گازەتتىڭ باس رەداكتورى باۋىرجان عۇبايدۋللين.
اعىسى جوق, تۇيىق, شاعىن سۋ ايدىندارى قىستا قالىڭ مۇزبەن كومكەرىلىپ, قاتىپ قالادى. مۇنداي سۋداعى بالىقتار مەن باسقا دا سۋ جاندىكتەرى قۇتقارۋ شاراسى جاسالماسا, تۇنشىعىپ ولەدى. سوندىقتان مۇنداي كەزدە 1 گەكتار ايدىنعا كەمىندە 10 جەردەن ويىق جاسالۋى كەرەك. ەرىكتىلەر ويىق قايتادان قاتىپ قالماسى ءۇشىن وعان جاعالاۋدان قامىس سىندىرىپ اكەلىپ تىعادى. ءسويتىپ قامىس بويىمەن بارعان اۋا سۋ جاندىكتەرىن اجالدان ساقتايدى.
– وبلىس اۋماعىندا بالىعى تۇنشىعۋى مۇمكىن 170-كە جۋىق سۋ ايدىنى تىركەلگەن. بۇلاردىڭ 39-ى جالعا بەرىلگەن, ياعني ناقتى قوجايىنى بار. ودان بولەك 70-كە جۋىق وزەن-كولدە بىلتىرعى جەلتوقسان ايىنان باستاپ ءبىزدىڭ مەكەمە قىزمەتكەرلەرى جەرگىلىكتى اتقارۋشى ورگاندارمەن, ورمان شارۋاشىلىعى قىزمەتكەرلەرىمەن بىرلەسىپ, تۇنشىعۋ قاۋپى بار سۋ ايدىندارىن وتتەگىمەن بايىتۋ جۇمىسىن جۇرگىزىپ كەلەدى. بۇل باستامانى جالپى حالىق, ەرىكتىلەر قولداعانى وتە ماڭىزدى, – دەيدى باتىس قازاقستان وبلىسى ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ جەتەكشى مامانى تولەندى يمانعازيەۆ.
شاعان مۇزىنداعى شاراعا جۋرناليستەردەن بولەك, قالاداعى وقۋ ورىندارىنىڭ ستۋدەنتتەرى دە قاتىستى. باتىس قازاقستان ينجەنەرلىك-تەحنولوگيالىق ۋنيۆەرسيتەت جانىنداعى كوللەدجدىڭ 2-كۋرس ستۋدەنتى الىبەك قۋانىشبەكوۆ بارلىق جاستاردى وسىنداي يگى ىسكە جۇمىلۋعا شاقىردى. قىسقى ايدىندا ساۋاپتى ىسكە جينالعان توپقا قوسىلا كەتكەن ميحايل ماركوۆ ەسىمدى قاريا بۇرىن بۇل وڭىردە بالىقتىڭ سان ءتۇرى بولعانىن ساعىنا ەسكە الدى:
– جايىقتا بۇرىن قىزىل بالىقتىڭ سان ءتۇرى بولاتىن. ءدال وسى اقپان ايىندا ۋىلدىرىق شاشۋعا قۇرتپا بالىق (بەلۋگا) كەلە باستايتىن, ءساۋىر-مامىردا جاپپاي قاپتايتىن. ودان كەيىن بەكىرە كەلەدى, جاز بويى سايران سالادى. سوسىن تامىزدان باستاپ قاراقانات شوقىر كەلىپ, جايىقتىڭ قازان شۇڭقىرلارىندا قىستاپ قالاتىن. ءبارى قۇرىپ كەتتى عوي. بۇعان وزەن سۋىنىڭ ازايۋى دا, حيميالىق قوسپالارمەن ۋلانۋى دا اسەر ەتتى. قاشان دا تابيعاتتى ءبۇلدىرۋ وڭاي, قالپىنا كەلتىرۋ قيىن. مىسالى, قۇرتپا بالىق 13-15 جىلدان باستاپ قانا جەتىلەدى, بەكىرە 8-9 جاسقا كەلگەن سوڭ عانا ۋىلدىرىق شاشادى, – دەيدى ميحايل قاريا بالىقتىڭ سىرىن قوراداعى مالىنداي سيپاتتاپ.
ۆولونتەرلەر جىلىنىڭ باستاۋىندا اتقارىلعان بۇل شارا جاستى دا, جاسامىستى دا جاڭا ىسكە جىگەرلەندىرىپ, ساۋاپتى قادامعا شاقىرعانداي بولدى.
باتىس قازاقستان وبلىسى
