قوعام • 27 اقپان، 2020

ەلوردالىق پوليتسەيلەر بىلتىر ەسىرتكى ساۋداسىنا قاتىستى 73 قىلمىستىق ءىس قوزعادى

8 رەتكورسەتىلدى

پوليتسيا دەپارتامەنتىنىڭ اقپاراتىنا سايكەس، سوڭعى ۋاقىتتا ەسىرتكىنىڭ ءداستۇرلى تۇرلەرىمەن قاتار سينتەتيكالىق ەسىرتكىلەر مەن ولاردىڭ انالوگتارى كەڭىنەن تارالىپ كەلەدى. اتاپ ايتقاندا، وتكەن جىلدىڭ شىلدە ايىنان وسى ۋاقىتقا دەيىن سينتەتيكالىق ەسىرتكى زاتتارمەن بايلانىستى 73 قىلمىستىق ءىس تىركەلدى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.

2019 جىلى قالا اۋماعىندا 180 كگ جۋىق ەسىرتكى تاركىلەندى، ونىڭ ىشىندە 3 كگ استام گەروين جانە 2،5 كگ جۋىق سينتەتيكالىق ەسىرتكى بار. اعىمداعى جىلى پوليتسيا قىزمەتكەرلەرى 19 كگ جۋىق ەسىرتكى زاتتارىن تاركىلەدى، ونىڭ ىشىندە 18،5 كگ سينتەتيكالىق ەسىرتكى بولىپ تابىلادى.

سونداي-اق ەلوردادا ەسىرتكى قۇرالدارىن، پسيحوتروپتىق زاتتار مەن پرەكۋرسورلاردى زاڭسىز جارنامالاۋ فاكتىلەرى انىقتالدى. ودان بولەك، سوڭعى ۋاقىتتا ينتەرنەت ارقىلى سينتەتيكالىق ەسىرتكىنىڭ تارالۋ قاۋپى ايتارلىقتاي ءوستى. ۇگىتتەۋشىلەر ەسىرتكى ساۋداسىن زاڭدى تابىس تابۋ جولى دەپ تانىستىرىپ جاسوسپىرىمدەرگە جۇمىس ۇسىنعان.

مىسالى، وتكەن جىلى ازاماتتاردىڭ كومەگىمەن ەلوردالىق پوليتسەيلەر 120 ينتەرنەت-سايتتان ەسىرتكى جارناماسىنا قاتىستى 400-گە جۋىق گراففيتي-سۋرەتتەردى انىقتاپ الىپ تاستادى. سينتەتيكالىق ەسىرتكى ۇسىناتىن ينتەرنەت-رەسۋرستاردى جارنامالاۋمەن اينالىساتىن 10 ادام جاۋاپكەرشىلىككە تارتىلدى.

ايتا كەتسەك، ينتەرنەت-تەحنولوگيالاردى پايدالانۋ ارقىلى جاسالعان ەسىرتكى قىلمىستارى ءۇشىن ازامات 3 جىلدان 6 جىلعا دەيىنگى مەرزىمگە باس بوستاندىعىنان ايىرىلادى. ەسىرتكى جانە پسيحوتروپتىق زاتتاردى ساقتاۋ نەمەسە ساتۋ فاكتىلەرى بويىنشا ازاماتتار پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ جاسىرىن سەنىم تەلەفوندارىنا حابارلاسا الادى.

سوڭعى جاڭالىقتار

ۇقساس جاڭالىقتار