ءىس قالالىق ءبىلىم باسقارماسىنىڭ تالاپ ارىزى نەگىزىندە قارالىپ, ونى كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوت قارادى.
سوت مالىمەتىنشە, جاۋاپكەر ءتورت كامەلەتكە تولماعان بالانىڭ اناسى. بالالاردىڭ اكەسى شەتەلدە تۇرادى جانە وتباسىنداعى جاعدايدان حاباردار بولعان.
سوت بارىسىندا ايەلدىڭ بالالارعا قاتىگەزدىك كورسەتكەنى دالەلدەندى. ول ءوز ارەكەتىن «تاربيەلىك شارالارى» دەپ تۇسىندىرگەن.
سوت بالالاردىڭ مۇددەسىن ەسكەرە وتىرىپ, تالاپ ارىزدى قاناعاتتاندىردى. ناتيجەسىندە ايەل اتا-انا قۇقىعىنان شەكتەلىپ, اليمەنت تولەۋگە مىندەتتەلدى.
«شەشىم قابىلداۋ كەزىندە «نەكە (ەرلى-زايىپتىلىق) جانە وتباسى تۋرالى» قر كودەكسىنىڭ نورمالارى جانە بالالاردىڭ قۇقىقتارىن قورعاۋ باسىمدىعى ەسكەرىلدى», دەپ حابارلادى سوت وكىلدەرى.
قازىرگى ۋاقىتتا سوت شەشىمى زاڭدى كۇشىنە ەنگەن جوق.
سونىمەن قاتار, 29 جاستاعى ايەلگە قاتىستى دەنە جاراقاتىن كەلتىرۋ جانە كامەلەتكە تولماعانداردى تاربيەلەۋ مىندەتتەرىن تيىسىنشە ورىنداماۋ فاكتىلەرى بويىنشا قىلمىستىق ءىس تەرگەلىپ جاتىر. تەرگەۋ مالىمەتىنشە, ءتورت بالا اناسىنىڭ تاراپىنان جۇيەلى تۇردە زورلىق-زومبىلىق كورگەن.
پسيحيكالىق اۋىتقۋ نۇسقاسى راستالمادى — ساراپتاما ايەلدى ەسى دۇرىس دەپ تانىدى. الدىن الا اقپارات بويىنشا, كۇيەۋى فرانتسياعا جۇمىس ىستەۋگە كەتكەن. ۇزاققا سوزىلعان جانجال سالدارىنان ايەل اشۋىن بالالاردان العان.
جاركەنتتەگى قاتىگەزدىك: بالاسىن اياۋسىز ۇرعان ايەل 7 جىلعا سوتتالۋى مۇمكىن
