تالقىلاۋعا ساراپشىلار, سالالىق قاۋىمداستىقتار, نارىقتىڭ ءتۇرلى سەگمەنتتەرىنىڭ وكىلدەرى, «قازمۇنايگاز» ۇك اق جانە مەملەكەتتىك ورگاندار قاتىستى.
نەگىزگى نازار اي-92 ماركالى بەنزين مەن ديزەل وتىنىنىڭ باعاسىن رەتتەۋ ماسەلەلەرىنە اۋدارىلدى.
نارىق قاتىسۋشىلارى قولدانىستاعى باعا شەكتەۋلەرى وندىرىستىك, لوگيستيكالىق جانە وپەراتسيالىق شىعىنداردىڭ وسۋىمەن قاتار بارلىق قاتىسۋشىلارعا قوسىمشا جۇكتەمە ءتۇسىرىپ, جالپى سالانىڭ تۇراقتىلىعىنا كەرى اسەر ەتەتىنىن اتاپ ءوتتى.
سونداي-اق ماكروەكونوميكالىق فاكتورلاردىڭ ىقپالى جانە رەتتەۋ شارتتارىنىڭ وزگەرۋى مۇناي ونىمدەرىنىڭ وزىندىك قۇنى مەن جەتكىزۋ تىزبەگىنىڭ جۇمىس ىستەۋىنە اسەر ەتەتىنى ەرەكشە ايتىلدى.
اقتاۋدا Qazaq Oil جانارماي بەكەتىندە ءورت شىعىپ, جەڭىل كولىك ورتەندى
ساراپشى نۇرلان جۇماعۇلوۆتىڭ پىكىرىنشە, نارىقتىق فاكتورلاردى ەلەمەۋ جانە كورشى ەلدەرمەن باعا ايىرماشىلىعىنىڭ ايتارلىقتاي بولۋى «سۇر» ەكسپورتقا جاعداي جاسايدى. ياعني ارزان وتىن زاڭسىز تۇردە ەلدەن شىعارىلىپ, ىشكى نارىقتا جاساندى تاپشىلىق قاۋپىن تۋدىرادى. باعالاردى كەزەڭ-كەزەڭىمەن تەڭەستىرۋ بۇل تاۋەكەلدەردى ازايتىپ, ىشكى نارىقتى تۇراقتى قامتاماسىز ەتۋگە مۇمكىندىك بەرەدى.
ساراپشى ەرلان جاۋكين اتاپ وتكەندەي, باعانى رەتتەۋ سالانىڭ ينۆەستيتسيالىق مۇمكىندىكتەرىن شەكتەيدى. ال قولدانىستاعى ءۇش مۇناي وڭدەۋ زاۋىتىن جاڭعىرتۋ جانە كەڭەيتۋ, سونداي-اق جاڭا, ءتورتىنشى ءموز سالۋ ءۇشىن قوماقتى رەسۋرستار قاجەت.
نارىقتىق جاعدايلاردى دامىتۋ مۇنايدى وڭدەۋ تەرەڭدىگىن ارتتىرۋعا جانە ينۆەستيتسيالار تارتۋعا قوسىمشا ىنتالاندىرۋ بەرەدى. بۇل ەلدىڭ ەنەرگەتيكالىق قاۋىپسىزدىگىن قامتاماسىز ەتۋدىڭ نەگىزگى فاكتورلارىنىڭ ءبىرى سانالادى.
وسىعان بايلانىستى قاتىسۋشىلار موراتوري مەرزىمى اياقتالعاننان كەيىن نارىقتىق باعا قالىپتاستىرۋعا كوشۋ نارىقتىڭ تۇراقتىلىعىن ارتتىرۋدىڭ ماڭىزدى فاكتورى بولۋى ءتيىس ەكەنىن اتاپ ءوتتى. بۇل باعانىڭ اشىق قالىپتاسۋىن, ونىڭ ەكونوميكالىق نەگىزدىلىگىن جانە ۇزاق مەرزىمدى تۇراقتىلىعىن قامتاماسىز ەتەدى.
سونىمەن قاتار, ماسەلەنىڭ الەۋمەتتىك سەزىمتالدىعىن ەسكەرە وتىرىپ, باعانى كەزەڭ-كەزەڭىمەن ارتتىرۋ قاجەتتىلىگى ەرەكشە اتاپ ءوتىلدى. نارىقتىق تەتىكتەرگە كوشۋ حالىق تابىسى مەن اعىمداعى ەكونوميكالىق جاعدايدى ەسكەرە وتىرىپ, بىرتىندەپ جۇزەگە اسىرىلادى. بۇل باعانىڭ كۇرت وزگەرۋىن بولدىرماي, تۇتىنۋشىلار ءۇشىن كۇيزەلىستى ستسەناريلەردىڭ الدىن الۋعا مۇمكىندىك بەرەدى.
كەزدەسۋ قورىتىندىسى بويىنشا قاتىسۋشىلار ۇستانىمداردى بىرىكتىرىپ, باعا قالىپتاستىرۋ تەتىكتەرىن جەتىلدىرۋ بويىنشا كەلىسىلگەن ۇسىنىستار دايىنداپ, ولاردى ۋاكىلەتتى مەملەكەتتىك ورگانعا جولداۋعا كەلىستى.
جالپى العاندا, جانارماي نارىعىندا ەركىن باعا قالىپتاستىرۋ مۇناي وڭدەۋ سالاسىن دامىتۋعا, ينۆەستيتسيالار تارتۋعا جانە الەۋمەتتىك تۇراقتىلىقتى ساقتاي وتىرىپ, تۇتىنۋشىلار مۇددەسىن قورعاۋعا باعىتتالعان ستراتەگيالىق قادام رەتىندە قاراستىرىلادى.
