قازاقستان • 27 اقپان، 2020

ا. مامين بالىق شارۋاشىلىعى سالاسىن دامىتۋ ماسەلەسى جونىندە كەڭەس وتكىزدى

16 رەتكورسەتىلدى

پرەمەر-مينيستر اتىراۋ وبلىسىنا جۇمىس ساپارى اياسىندا قازاقستان رەسپۋبليكاسىندا بالىق شارۋاشىلىعى سالاسىن دامىتۋ ماسەلەلەرى جونىندە كەڭەس وتكىزدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

بالىق شارۋاشىلىعىن دامىتۋدىڭ جاي-كۇيى مەن پەرسپەكتيۆالارى تۋرالى ەكولوگيا، گەولوگيا جانە تابيعي رەسۋرستار ءمينيسترى م. مىرزاعاليەۆ پەن «بالىق شارۋاشىلىعى قاۋىمداستىعى – BD» زتب اتقارۋشى ديرەكتورى ن. جۇماعالي ۇلى، وڭىرلەردەگى بالىق شارۋاشىلىعىنىڭ پروبلەمالىق ماسەلەلەرى تۋرالى اتىراۋ، شىعىس قازاقستان، قىزىلوردا، تۇركىستان وبلىستارىنىڭ بالىق بيزنەسىنىڭ وكىلدەرى، ەلىمىزدە بالىق شارۋاشىلىعىن دامىتۋ تۋرالى رەسەيلىك پروفەسسور ا. ليتۆينەنكو مەن پارلامەنت سەناتىنىڭ دەپۋتاتى س. ەڭسەگەنوۆ باياندادى.

قازاقستاننىڭ بالىق جانە بالىق ونىمدەرى نارىعىنىڭ جالپى كولەمى شامامەن 66 مىڭ توننانى قۇرايدى، ونىڭ 45 مىڭ تونناسى بالىق اۋلاۋ كاسىبىنە، 7،4 مىڭ تونناسى بالىق شارۋاشىلىعىنا تيەسىلى. سونىمەن قاتار 30 مىڭ تونناسى ەكسپورتقا شىعارىلسا، 43،5 مىڭ توننا ءونىم يمپورتتالادى.

ورتا مەرزىمدى پەرسپەكتيۆادا وتاندىق نارىق كولەمىن 120 مىڭ تونناعا دەيىن ۇلعايتۋ الەۋەتى بار، بۇل الابالىق پەن اتلانت اقسەركەسىن ءوسۋىنىڭ ارقاسىندا يمپورت كولەمىن تومەندەتۋگە مۇمكىندىك بەرەدى، سونىمەن قوسا الەمدىك نارىقتارعا، اتاپ ايتقاندا، قىتايعا، رەسەيگە جانە ەۋروپاعا ەكسپورت كولەمىن ارتتىرادى.

كاسىپشىلىك بالىق اۋلاۋمەن بالىق شارۋاشىلىعىنىڭ 1 مىڭنان استام سۋبەكتىسى اينالىسادى، ولارعا 1646 بالىق شارۋاشىلىعى سۋ ايدىندارى مەن ولاردىڭ ۋچاسكەلەرى بەكىتىلگەن. اتالعان سالادا 11 مىڭ ادام جۇمىس ىستەيدى.

بالىق اۋلاۋ نەگىزىنەن كاسپي جانە ارال تەڭىزدەرىندە، بالقاش جانە زايسان كولدەرىندە، بۇقتىرما، قاپشاعاي جانە شاردارا سۋ قويمالارىندا، الاكول كولدەر جۇيەسىندە، جايىق جانە قيعاش وزەندەرىندە قولعا الىنعان. نەگىزگى كاسىپتىك وڭىرلەر — اتىراۋ – 13،1 مىڭ توننا (29،2%)، شىعىس قازاقستان – 8،2 مىڭ توننا (18،3%)، قىزىلوردا – 7،4 مىڭ توننا (16،4%)، الماتى – 6،6 مىڭ توننا (14،6%)، ماڭعىستاۋ – 2،3 مىڭ توننا (5،2%) جانە تۇركىستان وبلىستارى – 2 مىڭ توننا (4،5%).

قازاقستاندا بالىق شارۋاشىلىعى قارقىندى دامۋدا — سوڭعى 7 جىلدا وسىرىلگەن بالىق كولەمى 9 ەسە 800 توننادان 7 مىڭ تونناعا دەيىن ارتتى. ەلىمىزدە بالىق وسىرۋمەن 180 بالىق شارۋاشىلىعى اينالىسادى، ولاردا 1 مىڭنان اسا ادام جۇمىسپەن قامتىلعان. 

ۇكىمەت باسشىسى ەلىمىزدە بالىق شارۋاشىلىعىن دامىتۋ ءۇشىن جۇيەلى شارالارى قابىلداۋ قاجەتتىگىن اتاپ ءوتىپ، بيىل 1 ساۋىرگە قاراي  بالىق شارۋاشىلىعىن دامىتۋ تۇجىرىمداماسىنىڭ جوباسىن دايىنداۋدى تاپسىردى.

«وزەندەردىڭ سۋى قورعالاتىن ايماقتارىندا جۇمىس ىستەۋگە بالىق شارۋاشىلىقتارىنا تىيىم سالۋدى الىپ تاستاۋ، سونداي-اق بالىق شارۋاشىلىعى سۋبەكتىلەرىنىڭ سۋ رەسۋرستارىن پايدالانعانى ءۇشىن جاسايتىن تولەمدەرىن قىسقارتىپ، تەك ناقتى سۋ شىعىندارى ءۇشىن تولەمدەردى قالدىرۋ ماسەلەسىن قاراستىرۋ قاجەت. تولەم مولشەرلەمەسىن ازايتۋدى قوسا العاندا، بالىق رەسۋرستارىن پايدالانعانى ءۇشىن تولەم جاساۋ تەتىگىن جەتىلدىرۋ كەرەك»، — دەدى ا. مامين. 

پرەمەر-مينيستر بالىق ونىمدەرىن باقىلاۋ اقپاراتتىق جۇيەسىن ازىرلەۋدى جانە ەنگىزۋدى تاپسىردى.

ء«بىر اي ىشىندە كاسپي تەڭىزىندە جانە جايىق وزەنىندە بالىق اۋلاۋ مەرزىمدەرىن ۇزارتۋ، سونداي-اق تۇنگى ۋاقىتتا بالىق اۋلاۋعا رۇقسات ەتۋ بويىنشا ۇسىنىستاردى ازىرلەۋ قاجەت. بالىق شارۋاشىلىعى سۋبەكتىلەرىن مەملەكەتتىك قولداۋ شارالارىن ارتتىرۋ جانە بالىق شارۋاشىلىعىن ەكونوميكانىڭ باسىمدىقتى سالالارىنىڭ قاتارىنا جاتقىزۋ كەرەك»، — دەدى ا. مامين.

ۇكىمەت باسشىسى بالىق شارۋاشىلىعى مەليوراتسياسىن تۇراقتى جۇرگىزۋ ماقساتىندا سۋ ءتۇبىن تەرەڭدەتۋ تەحنيكاسىن ساتىپ الۋ ماسەلەسىن قاراستىرۋدى، سونداي-اق بالىق ءوسىرۋ زاۋىتتارى مەن بالىق شارۋاشىلىعىنىڭ اۋماقتىق ينسپەكتسيالارىن ماتەريالدىق-تەحنيكالىق جاراقتاندىرۋدى قارجىلاندىرۋ تۋرالى ۇسىنىستار ازىرلەۋدى تاپسىردى. 

جۇمىس ساپارى اياسىندا ا. مامين اتىراۋ بەكىرە بالىق ءوسىرۋ زاۋىتىنا، «امانگەلدى اتىنداعى» جشس، «Caspian Royal Fish» كاسىپورىندارىنا باردى، سونداي-اق بالىق شارۋاشىلىعى سالاسىنداعى جەتىستىكتەر كورمەسىن ارالاپ كوردى.

سوڭعى جاڭالىقتار

ۇقساس جاڭالىقتار