پارلامەنت • 24 اقپان، 2020

د. نازارباەۆا: قازاقستان بيزنەسى ەاەو اياسىنداعى ساۋدادا نەگىزسىز شەكتەۋلەرگە تاپ بولۋدا

28 رەتكورسەتىلدى

قازاقستان رەسپۋبليكاسى پارلامەنتى سەناتىنىڭ توراعاسى داريعا نازارباەۆا ەۋرازيا ەكونوميكالىق كوميسسيا القاسىنىڭ توراعاسى ميحايل مياسنيكوۆيچپەن كەزدەستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

شاراعا حالىقارالىق قاتىناستار، قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد، ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ حاتشىسى داۋرەن ادىلبەكوۆ، ەاەك القا توراعاسىنىڭ حاتشىلىق جەتەكشىسى ۆلاديمير زينوۆسكي، سىرتقى ىستەر ءمينيسترىنىڭ ورىنباسارى مارات سىزدىقوۆ قاتىستى.

د.نازارباەۆا ءوز سوزىندە ميحايل مياسنيكوۆيچتى ەۋرازيا ەكونوميكالىق كوميسسيا القاسىنىڭ توراعاسى بولىپ تاعايىندالۋىمەن قۇتتىقتادى جانە جۇمىسىنىڭ تابىستى ءارى ناتيجەلى بولۋىنا تىلەكتەستىگىن ءبىلدىردى.

كەزدەسۋ بارىسىندا ەاەو-عا قاتىسۋشى مەملەكەتتەردىڭ وداق اياسىنداعى كەلىسىمدەردىڭ ورىندالۋىن قامتاماسىز ەتۋدىڭ وزەكتى ماسەلەلەرى مەن ەۋرازيالىق وداق ەلدەرىمەن ساۋدا بارىسىندا قازاقستاندىق بيزنەس تاپ بولاتىن كەدەرگىلەر تالقىلاندى.

سەنات باسشىسى بۇگىنگى تاڭدا ەاوە-نىڭ ىشكى نارىعى اياسىنداعى كەدەرگىلەردى جويۋ ءۇشىن جوسپارلى تۇردە ىلگەرىلەۋ كەرەكتىگىن اتاپ ءوتتى.

«اتقارىلعان جۇمىستارعا قاراماستان، كەدەرگىلەر مەن توسقاۋىلدار ازايعان جوق، قايتا كوبەيە تۇسۋدە. بۇگىندە كەلىسىلگەن كەدەرگىلەر ءتىزىلىمى 66 تارماقتان تۇرادى. كەزىندە بۇل ءتىزىلىم 60-تان باستالاتىن. بۇل كورسەتكىشتى ازايتۋدىڭ ورنىنا، ءبىز جىل ساناپ جاڭا كەدەرگىلەر جاساپ نەمەسە بۇرىنعىلاردى جويا الماي، سانىن كوبەيتىپ وتىرمىز»، دەدى د. نازارباەۆا.

قازاقستان تاۋارلارىنىڭ رەسەي نارىعىنا قول جەتكىزۋدەگى كەدەرگىلەر، قازاقستاندىق بىرقاتار تاۋار ونىمدەرى ترانزيتىنە تىيىم نەمەسە شەكتەۋ قويۋ،  ەلەكتروندى دەكلاراتسيالاۋ قاعيداتىنىڭ ساقتالماۋى، بەلگىلى ءبىر تاۋارلاردى جەتكىزۋدە ءتۇرلى تالاپ قويۋ ارقىلى كەدەرگىلەردى تەحنيكالىق رەتتەۋمەن بۇركەمەلەۋ ماسەلەسى وتاندىق بيزنەستىڭ الدىنداعى نەگىزگى قيىندىقتاردىڭ ءبىرى رەتىندە اتاپ ءوتىلدى.  

ەاەك القاسىنىڭ توراعاسى ەلىمىزدەگى ارمەنيادان اكەلىنگەن اۆكولىكتەر ماسەلەسىن قوزعادى. «بۇل جەردە راسىمدەر دۇرىس ساقتالماعان دەپ ويلايمىن. جەكە تۇلعالاردىڭ ەۋرازيالىق ەكونوميكالىق وداق اياسىنداعى اۆتوكولىك تاسىمالداۋى بويىنشا ارمەنيا جەڭىلدىك تارتىبىنە يە بولعان ەدى. 1 قاڭتاردان باستاپ ول جەڭىلدىك جويىلدى. بىراق، شەكارا ايماعىندا نەمەسە جولدا جەتپەي قالعان اۆتوكولىكتەر بار»، دەدى ول.

ميحايل مياسنيكوۆيچ ەۋرازيالىق ەكونوميكالىق وداق اياسىندا قول قويىلعان 25-كە جۋىق كەلىسىم مەن شارتتار بۇگىنگى كۇنگە دەيىن راتيفيكاتسيالانباي وتىرعانىنا نازار اۋداردى. سونىمەن قاتار القا باسشىسى ەكونوميكالىق داۋلاردى شەشۋ ءۇشىن ەاەك-نىڭ سوتقا جۇگىنۋ قۇقىعىنىڭ بولۋى كەرەكتىگىن جانە ەاەك اربيتراجىن قۇرۋ قاجەتتىگىن اتاپ ءوتتى.

د.نازارباەۆا اتالعان باستاماعا قولداۋ ءبىلدىردى جانە شەشىمدەردى قابىلداۋ ءراسىمى تىم بيۋروكراتيالانعانى مەن ونىڭ ۇزاق ۋاقىتقا سوزىلاتىنىن ايتتى.

سەنات توراعاسى سونداي-اق قازاقستاندىق اۋىر جۇك كولىكتەرىن جۇرگىزۋشىلەردىڭ رەسەي-بەلارۋس شەكاراسىنداعى پروبلەمالارىنا ەرەكشە توقتالدى. «وداقتىق مەملەكەتتەردىڭ ءىس-قيمىلى بويىنشا بۇل شەكارادا حالىقارالىق تەكسەرۋ بەكەتىنىڭ بولماۋىنا بايلانىستى شەكارادان تەك رەسەي جانە بەلارۋس ەلىنىڭ ازاماتتارى عانا وتە الادى. بۇگىنگى كۇنى قازاقستاندىق جۇرگىزۋشىلەرگە شەكارادان وتۋگە ۋاقىتشا رۇقسات بار، دەگەنمەن ونىڭ ءوزى رەتتەلمەگەن تۇردە»، دەدى د. نازارباەۆا.

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار