قوعام • 21 اقپان، 2020

الماتىدا مۇگەدەكتىگى بار بالالاردى وڭالتۋ ماسەلەلەرى تالقىلاندى

9 رەتكورسەتىلدى

الماتىدا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆتىڭ، سونداي-اق ەلىمىزدىڭ بارلىق ايماقتارىنان كەلگەن جۇمىسپەن قامتۋدى ۇيلەستىرۋ جانە الەۋمەتتىك باعدارلامالار، دەنساۋلىق ساقتاۋ جانە ءبىلىم باسقارمالارى باسشىلارى ورىنباسارلارىنىڭ قاتىسۋىمەن «وڭالتۋ پروتسەستەرىنىڭ ۇيىمداستىرۋشىلىق جانە تەحنولوگيالىق نەگىزدەرى» تاقىرىبىندا رەسپۋبليكالىق سەمينار-كەڭەس ءوتتى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.

ءىس-شارا بارىسىندا مۇمكىندىكتەرى شەكتەۋلى بالالاردى وڭالتۋ جانە ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ جانە ءبىلىم مينيسترلىكتەرىنىڭ وسى باعىتتاعى ءوزارا ءىس-قيمىلى ماسەلەلەرى تالقىلاندى. 

ەڭبەك جانە حالىقتى الەۋمەتتىك قورعاۋ مينيسترلىگى «قامقورلىق» وڭىرلىك جول كارتالارىن ازىرلەدى. ولاردىڭ نەگىزگى ماقساتى جەرگىلىكتى جەرلەردە ۆەدومستۆوارالىق ءوزارا ءىس-قيمىلدى كۇشەيتۋ بولىپ تابىلادى، بۇل بالالار ءۇشىن وڭالتۋ قىزمەتتەرىنىڭ ساپاسىن ارتتىرۋعا مۇمكىندىك بەرەدى.

«قامقورلىق» رەسپۋبليكالىق جوباسى اياسىندا وبلىستىق بالالار اۋرۋحانالارى مەن پەريناتالدىق ورتالىقتار بازاسىندا وڭالتۋ ورتالىقتارى مەن كاتامنەستيكالىق كابينەتتەر، سونداي-اق 8 وڭىردە ينكليۋزيۆتى كابينەتتەر اشۋ قاراستىرىلعان. 

بۇدان باسقا، «قامقورلىق» جول كارتالارىنا سايكەس اعىمداعى جىلى ءاربىر وڭىردە الماتى قالاسىنىڭ ۇلگىسىمەن مەملەكەتتىك الەۋمەتتىك تاپسىرىستى ورنالاستىرۋ ەسەبىنەن الەۋمەتتىك وڭالتۋ جانە ەرتە ارالاسۋ جەكەمەنشىك ورتالىقتارىن اشۋ جوسپارلانۋدا.

مامانداردىڭ باعالاۋى بويىنشا، وڭىرلەردە جول كارتالارىن ىسكە اسىرۋ 2020 جىلى وڭ ناتيجە بەرەدى.

سەمينار-كەڭەس بارىسىندا سونداي-اق ءبىلىم بەرۋ ۇيىمدارىندا ەرەكشە قاجەتتىلىكتەرى بار بالالاردى وقىتۋ ماسەلەلەرى، بالالاردىڭ پسيحوفيزيكالىق بۇزىلىستارىن ەرتە دياگنوستيكالاۋ، ەستۋ قابىلەتى بۇزىلعان بالالاردىڭ ەستۋ-سويلەۋىن وڭالتۋ ماسەلەلەرى ەگجەي-تەگجەيلى قارالدى.

ساراپشىلار كوماندالىق باعا نەگىزىندە پانارالىق كوماندالار جۇمىسىن جانە جەكە دامۋ باعدارلامالارىن ازىرلەۋ ادىستەمەسىن تانىستىردى.

سەسسيالار مەن پانەلدىك پىكىرتالاستاردان باسقا «مباق» جانە «ابەو» كوپسالالى وڭالتۋ ورتالىقتارىندا پراكتيكالىق ساباقتار ءوتتى.

ءىس-شاراعا قاتىسۋشىلار ەگدە جاستاعى ادامدار ءۇشىن بەلسەندى ۇزاق ءومىر ءسۇرۋ ورتالىعىنا جانە «كەڭەس» ورتالىعىنا باردى.

سوڭعى جاڭالىقتار

ۇقساس جاڭالىقتار