سوتيريۋ كيپر استاناسى نيكوسيا قالاسىنىڭ «وليمپياكوس» كومانداسىنىڭ تۇلەگى. ول ءدال وسى كلۋب ساپىندا ءوز مانسابىن باستاپ, ارتىنشا ىشكى چەمپيوناتتىڭ كوشباسشىسى, ەلوردا جانكۇيەرلەرىنە جاقسى تانىس اپوەل ساپىنا اۋىسادى.
ءبىر ايتا كەتەتىن ءجايت, پيەروس كيپر چەمپيونى ساپىندا «استاناعا» قارسى ءۇش كەزدەسۋدە الاڭعا شىققان. الايدا ناتيجەلى ويىنىمەن كوزگە تۇسكەن جوق. دەگەنمەن, ول ەۋرو-2020 ىرىكتەۋ كەزەڭى اياسىندا وتكەن قازاقستان جانە كيپر قۇرامالارى اراسىنداعى ەكى كەزدەسۋدە دە گول سوققان. سوتيريۋ اپوەل ساپىنان كەيىن, دانيا چەمپيوناتىنىڭ كوشباسشىسى «كوپەنگاگەن» فۋتبول كلۋبىنىڭ قاتارىن تولىقتىردى.
27 جاستاعى شابۋىلشى ءتورت مارتە كيپر چەمپيوناتىندا توپ جارسا, ءبىر مارتە دانيا چەمپيونى اتانعان. پيەروس ۋەفا اياسىنداعى 60 كەزدەسۋدە الاڭعا شىعىپ, 13 گول سوققان تاجىريبەلى ويىنشى. سونداي-اق, كيپر قۇراماسى ساپىندا وتكىزگەن 40 كەزدەسۋدە 10 گول سوققان.
سوتيريۋ مەن «استانا» اراسىنداعى كەلىسىمشارت مەرزىمى 3 جىل.
