ۆ.سۋريكوۆ اتىنداعى ماسكەۋ مەملەكەتتىك كوركەمسۋرەت ينستيتۋتىن بىتىرگەن ە.مەرگەنوۆتىڭ كسرو جوعارعى كەڭەسىنىڭ دەپۋتاتى بولۋى, ەكى مارتە قازاقستان سۋرەتشىلەر وداعىن باسقارۋى رۋحى مەن كوزقاراسى ەركىندىكتى سۇيگەن سۋرەتشىنىڭ ۇنەمى قوعاممەن بىرگە قوزعالىستا بولعانىنىڭ دالەلى ىسپەتتى. قازاق ءمۇسىن ونەرىندەگى مودەرنيزمنىڭ نەگىزىن قالاعان ەركىن تىلەك ۇلىنىڭ تۋىندىلارى قازاق ونەرىندەگى عانا ەمەس, كۇللى پوستكەڭەستىك مەملەكەتتەر مەن الەمنىڭ كوپتەگەن ەلدەرىندە قۇبىلىس بولىپ قابىلدانۋى ومىرشەڭدىگى مەن ماڭىزىن جوعالتپاي كەلەدى. ونىڭ جەكە كورمەلەرى لاتۆيادا, ۋكراينادا, رەسەيدىڭ ماسكەۋى مەن سانت-پەتەربۋرگىندە تالاي مارتە تابىسپەن ءوتىپ, ۇلتتىق ءمۇسىن ونەرىنىڭ ورنىن ايشىقتاۋدا ۇلكەن ءرول اتقاردى.
ارحيتەكتۋرا سالاسىنىڭ دوكتورى ا.ءسابيتوۆانىڭ پىكىرىنشە, «ەركىن مەرگەنوۆ – ەكى مادەنيەتكە ءتان سۋرەتشى. ونىڭ جۇمىسىنىڭ كوپشىلىگى حح عاسىردا ورىن العان ەۋروپالىق پلاستيكاداعى فورمالدى ىزدەنىستەرمەن سايكەس كەلۋى مۇمكىن, الايدا تاقىرىپتىق جانە وزەكتىلىگى جاعىنان ول شىعىسقا, دالا مادەنيەتىنە جاقىن. ءمۇسىنشى شىعارماشىلىق جولىنىڭ باستاۋىندا ءبىر-بىرىنە ۇقسامايتىن مادەنيەتتەردىڭ اراسىنداعى كەرەعارلىقتى ەڭسەرىپ, ءوزىنىڭ ادامي مادەني بىرەگەيلىگىن ۇعىنۋعا دەن قويسا, سوڭعى ۋاقىتتاعى جۇمىستارىندا ءداستۇر, مادەنيەت جانە گۋمانيزمنىڭ ادەمى سينتەزىن جاسادى», دەيدى.
بۋىرقانىسقا, جاڭاشىلدىققا تولى ە.مەرگەنوۆتىڭ شىعارماشىلىعى ونەر زەرتتەۋشىلەرى مەن سىنشىلاردىڭ نازارىنان تىسقارى قالعان ەمەس. «مەرگەنوۆتىڭ اۆتورلىق ستيليستيكاسى ول ءۇشىن ماڭىزدى ەكى فاكتورمەن – كەڭىستىك پەن ۋاقىتقا نەگىزدەلگەن. ءمۇسىنشى ءۇشىن كەڭىستىك ءوزى قولداناتىن قولا نەمەسە قالايى سياقتى سەزىلەتىن ماتەريال, ول ءمۇسىننىڭ وبرازدى مانەرىن جاساۋدا قاجەتتى ءپىشىن قۇرايتىن مىندەتتى ورىندايدى. ءمۇسىنشىنىڭ شىعارماشىلىعىنداعى كەڭىستىكتى قۇرال عانا دەسەك, قاتەلەسەمىز, ونى ەۆوليۋتسيالىق, ۋاقيعالىق دامۋ پروتسەسىندە دە سەزىنۋگە بولادى. سۋرەتشىنىڭ كوزقاراسىنداعى كەشە, بۇگىن جانە بولاشاق سياقتى ءۇش بىرلىكتىڭ توعىسىنداعى ۋاقىت مۇسىندەرگە ماڭگىلىك سەنىم تىنىسىن بەرەدى, ونىڭ جاسامپازدىعىن ارتتىرادى, ال تاماشالاعان ادامنىڭ ساناسى بيىك ويمەن بايىتىلا تۇسەدى» دەيدى ءمۇسىنشى تۋىندىلارىنىڭ وزەگىن تانۋمەن اينالىسقان ونەر زەرتتەۋشىسى كاميللا لي.
كورمە 14 ناۋرىزعا دەيىن جالعاسادى.
الماتى
