سپورت • 18 اقپان، 2020

بوكس: وليمپياداعا ىرىكتەۋ تۋرنيرىنە باراتىندار انىقتالدى

657 رەتكورسەتىلدى

بوكستان يوردانيادا وتەتىن ليتسەنزيالىق تۋرنيرگە قاتىساتىن بوكسشىلار ءتىزىمى انىقتالدى. باس باپكەر عالىمبەك كەنجەباەۆ توكيو وليمپياداسىنىڭ جولداماسىنا تالاساتىن سپورتشىلاردىڭ ەسىمىن اتادى، دەپ حابارلادى قازاقستان ۇوك ءباسپاسوز قىزمەتى.

28 اقپان كۇنى بوكستان قازاقستان قۇراماسى توكيو وليمپياداسىنا جولداما بەرەتىن ازيا جانە تىنىق مۇحيت ايماعى ىرىكتەۋ تۋرنيرىنە اتتانادى. اممان شارشى الاڭىندا ليتسەنزيا ءۇشىن 52 كيلودا الەم چەمپيوناتىنىڭ قولا جۇلدەگەرى ساكەن بيبوسىنوۆ، 57 كيلودا بىرنەشە حالىقارالىق تۋرنيرلەردىڭ جەڭىمپازى سەرىك تەمىرجانوۆ باق سىنايدى. 63 كيلو سالماقتا ازيا چەمپيوناتىنىڭ كۇمىس جۇلدەگەرى زاكىر سافيۋللينگە سەنىم ارتىلعان.

«قازاقتىڭ سالماعى» اتانىپ كەتكەن 69 كيلودا الەم چەمپيوناتىنىڭ ەكى دۇركىن قولا جۇلدەگەرى ابىلايحان ءجۇسىپوۆ جۇدىرىقتاسادى. 75 كيلودا باپكەر تاڭداۋى الەم چەمپيوناتىنىڭ جانە ازيا ويىندارىنىڭ كۇمىس جۇلدەگەرى ءابىلحان امانقۇلعا، 81 كيلودا 2019 جىلعى الەم چەمپيونى بەكزات نۇرداۋلەتوۆكە تۇسكەن.  ال 91 كيلودا ريو وليمپياداسىنىڭ كۇمىس جۇلدەگەرى ۆاسيلي لەۆيت پەن اسا اۋىر سالماقتا قۇراما كاپيتانى، الەم چەمپيوناتىنىڭ ەكى مارتە كۇمىس جۇلدەگەرى قامشىبەك قوڭقاباەۆ جولداماعا تالاسادى.

«2020 جىلعى توكيو وليمپياداسىنىڭ جولداماسىنا تالاساتىن جىگىتتەردىڭ بارلىعى ءوز سالماعىندا مىقتى سانالادى. بارلىعى دا تاجىريبەلى بوكسشىلار. ارقايسىسى ءوزىن جاقسى جاعىنان كورسەتە الادى»، دەدى باس باپكەر عالىمبەك كەنجەباەۆ.

تۋرنيردە بوكسشىلارعا 63 جولداما بەرىلەدى. مىسالى، 52، 57 جانە 60 كيلو سالماقتاعى بوكسشىلارعا 6 جولداما، ياعني جارتىلاي فينالعا شىققان 4 جانە شيرەك فينالدا جەڭىسكە جەتكەن ەكى مىقتى بوكسشى جولداماعا يە بولادى. ال 69، 75 جانە 81 كيلو سالماقتاعى بوكسشىلارعا 5 جولداما بەرىلەدى. 91 جانە 91 كيلودان جوعارى سالماقتاعى بوكسشىلارعا 4 جولداما قاراستىرىلعان. ياعني جارتىلاي فينالعا شىققان ءتورت بوكسشى توكيوعا بارادى. قالعان جولدامالار قىزدار بوكسىنا تيەسىلى.

ايتا كەتەلىك، توكيو وليمپياداسىنا ىرىكتەۋ ءتۋرنيرى 3-11 ناۋرىز ارالىعىندا يوردانيانىڭ اممان قالاسىندا وتەدى.

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار