اقپاننىڭ 11-14 ارالىعىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا وتكەن بايقاۋدا نازارباەۆ زياتكەرلىك مەكتەپتەرىنىڭ شاكىرتتەرى, الماتى قالاسى مەن شىعىس قازاقستان وبلىسىنىڭ وقۋشىلارى باسىمدىق تانىتىپ, ءبىلىم گرانتتارىنا يە بولدى.
بايقاۋ «عىلىمي-تەحنيكالىق پروگرەسس – ەكونوميكالىق ءوسۋدىڭ نەگىزگى بۋىنى», «ەكونوميكالىق جانە الەۋمەتتىك پروتسەستەردى ماتەماتيكالىق مودەلدەۋ», «تازا تابيعي ورتا – قازاقستان - 2050 ستراتەگياسىن ىسكە اسىرۋدىڭ نەگىزى», «قازاقستاننىڭ تاريحي ەسكەرتكىشتەرى جانە بولاشاق دامۋى بار ساياحات باعدارلارى» باعىتتارى بويىنشا ۇيىمداستىرىلدى.
وقۋشىلاردى عىلىمعا قۇلشىندىرۋ ماقساتىندا وتكەن زياتكەرلىك سايىسقا قر ۇلتتىق عىلىم اكادەمياسى قولداۋ كورسەتتى.
ماراپاتتاۋ سالتاناتى قازاقستان رەسپۋبليكاسىنىڭ ۇعا اكادەميگى, عىلىم مەن تەحنيكا سالاسىنداعى قازاقستان رەسپۋبليكاسىنىڭ مەملەكەتتىك سىيلىعىنىڭ يەگەرى, كونكۋرستىڭ «عىلىمي-تەحنيكالىق پروگرەسس – ەكونوميكالىق ءوسۋدىڭ نەگىزگى بۋىنى», «ەكونوميكالىق جانە الەۋمەتتىك پروتسەستەردى ماتەماتيكالىق مودەلدەۋ» باعىتىنىڭ جەتەكشىسى تولەگەن ابدىساعي ۇلى قوجامقۇلوۆتىڭ سوزىمەن اشىلدى. سونىمەن قاتار قازاقستان رەسپۋبليكاسىنىڭ ءبىلىم جانە عىلىم مينيسترلىگى اتىنان مەكتەپكە دەيىنگى جانە ورتا ءبىلىم كوميتەتىنىڭ باس ساراپشىسى گۇلميرا قۇلساريەۆا قۇتتىقتادى.
كونكۋرستىڭ مەكتەپشىلىك كەزەڭىنە 21 604, ەكىنشى اۋداندىق كەزەڭىندە 7332 وقۋشى, وبلىستىق كەزەڭىنە 3381 وقۋشى قاتىستى. كونكۋرستىڭ اقتىق سىنىندا ەلىمىزدىڭ بارلىق ايماقتارىنان ەڭ ۇزدىك 584 جوبا ۇسىنعان 737 دارىندى وقۋشى باق سىنادى.
كونكۋرستىڭ قازىلار القاسىنىڭ شەشىمىمەن قازاقستان رەسپۋبليكاسىنىڭ بعم I دارەجەلى ديپلومدارى جانە التىن مەدالدارمەن 57 جەڭىمپاز, ءىى دارەجەلى ديپلومدارى جانە كۇمىس مەدالدارمەن 103 جۇلدەگەر, ءىىى دارەجەلى ديپلومدارى جانە قولا مەدالدارمەن 175 جۇلدەگەر ماراپاتتالدى.
قازاقستان-بريتان تەحنيكالىق ۋنيۆەرسيتەتى مەن «استانا IT ۋنيۆەرسيتەت» باسشىلىعىنىڭ شەشىمىمەن كونكۋرستىڭ جۇلدەگەر تۇلەكتەرىنە جابىلۋ سالتاناتىندا جوعارى وقۋ ورىندارىندا ءبىلىم الۋ گرانتتارى بەرىلدى.
