قازاقستان • 11 اقپان، 2020

الماتىعا قونعان 150-دەن استام حالىقارالىق رەيستىڭ 17 مىڭداي جولاۋشىسى تەكسەرىلدى

54 رەتكورسەتىلدى

بۇگىن الماتىدا كوروناۆيرۋستىڭ الدىن الۋ ءۇشىن ەپيدەمياعا قارسى ءىس-شارالاردى پىسىقتاۋعا ارنالعان وقىتۋ-جاتتىعۋ شارالارى ءوتتى.

جانە الماتى قالاسىنىڭ حالىقارالىق اۋەجايىندا قالا اكىمىنىڭ ورىنباسارى ەرجان باباقۇماروۆتىڭ توراعالىعىمەن كوروناۆيرۋستى ينفەكتسيانىڭ تارالۋىنىڭ الدىن الۋ جونىندەگى وڭىرلىك شتابتىڭ وتىرىسى ءوتتى.

جيىندا اۋەجايعا كەلەتىن بارلىق حالىقارالىق رەيستەردى باقىلاۋدىڭ اعىمداعى ماسەلەلەرى تالقىلاندى. سونداي-اق اۋەجايدىڭ سانيتارلىق جانە شەكارا قىزمەتتەرىنىڭ كوروناۆيرۋستى ينفەكتسيالاردىڭ تارالۋىنىڭ الدىن الۋى بويىنشا جۇمىس مەحانيزمى تەكسەرىلدى.

قوعامدىق دەنساۋلىق باسقارماسىنىڭ باسشىسى تىلەۋحان ابىلداەۆ قالا ستاتسيونارلارىندا كوروناۆيرۋستى ينفەكتسيانىڭ تارالۋ قاۋپى بار ايماقتاردان كەلگەن جرۆي مەن تۇماۋ بەلگىلەرى بار 8 ەمدەلۋشى بار ەكەنىن حابارلادى.

«ەمدەلۋشىلەردىڭ جاعدايى الاڭداۋشىلىق تۋعىزبايدى. جاعدايلارى جاقسارىپ، قالپىنا كەلىپ جاتىر. ولاردىڭ التاۋى ەرەسەك، ءبىر بالا اتا-اناسىمەن بىرگە بالالار جۇقپالى اۋرۋلار اۋرۋحاناسىندا جاتىر»، دەدى تىلەۋحان ابىلداەۆ.

سونىمەن قاتار، ينفەكتسيالىق باقىلاۋدىڭ بارلىق تالاپتارىنا سايكەس، رەزەرۆتىك ەمحانا دايىندالدى. قالانىڭ مەديتسينالىق مەكەمەلەرى قاجەتتى ءدارى-دارمەكتەرمەن، كەلۋشىلەرگە دە، مەديتسينا قىزمەتكەرلەرىنە دە جەكە قورعانۋ قۇرالدارىمەن قامتاماسىز ەتىلدى.

ءوز كەزەگىندە، تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا الماتى حالىقارالىق اۋەجايىنا 150-دەن استام حالىقارالىق رەيس قونعانىن، 17 مىڭعا جۋىق جولاۋشىنىڭ تەكسەرىلگەنىن جانە ولاردىڭ 200-گە جۋىعى قىتاي ازاماتى ەكەنىن اتاپ ءوتتى.

وتىرىس قورىتىندىسى بويىنشا، وڭىرلىك شتابتىڭ توراعاسى ەرجان باباقۇماروۆ جۇمىس قارقىنىن تومەندەتپەۋدى، بارلىق حالىقارالىق رەيستەرگە كۇشەيتىلگەن سانيتارلىق-كارانتيندىك باقىلاۋدى جالعاستىرۋدى تاپسىردى.

سونىمەن قاتار، سانيتارلىق جانە شەكارا مەن ەكيپاج، مەديتسينا قىزمەتكەرلەرىنىڭ، ونىڭ ىشىندە جەدەل جاردەم قىزمەتىنىڭ ءوزارا ءىس-قيمىلىن پىسىقتاۋ، ۆيرۋستىق ينفەكتسيالاردىڭ الدىن-الۋ جانە دياگنوستيكا بويىنشا ەپيدەمياعا قارسى شارالارىن ساقتاۋ تۋرالى وقىتۋ وتكىزىلدى.

ايقىن سيمپتومى بار ادامداردى تاسىمالداۋ ءۇشىن جەدەل جاردەم ىسكە قوسىلدى. ولار اۋەجاي اۋماعىندا تاۋلىك بويى كەزەكشىلىكپەن جۇمىس ىستەيدى.

سونداي-اق، وقۋ-جاتتىعۋلار اۋماقتىق ەمحانالاردا دا ءوتتى. الماتىدا كوروناۆيرۋستى جۇقتىرۋ جاعدايى تىركەلگەن جوق. قالانىڭ بارلىق قىزمەتتەرى بەكىتىلگەن الگوريتمگە ساي جۇمىس ىستەيدى. مەگاپوليستەگى جاعداي بيلىكتىڭ باقىلاۋىندا.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار